Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Hy verwijt Iuda ende Israel, hare schalcheyt, Ende vercondicht haer hare straffinghe.

1

⁺ ALsoo spreeckt de HEEre: Om drie ende vier lastereringen wille Iuda, en wil ic zijnder niet sparen,^† daerom dat si des HEEren Wet verachten, ende sine rechten niet en houden, Ende laten haer hare lueghenen verleyden, Welcke haer vooruaders nagheuolcht hebben.

+ A vers 1

† Miche. 1.a.5.

2

Maer ick wil een vier in Iuda seynden, dat sal de Palleysen tot Ierusalem verslinden.

3

Alsoo spreect de HEEre: Om drie ende vier lasteren wille Israels, en wil ic haerder niet sparen, daerom dat si de rechtuaerdighe om ghelt, ende de armen om een paer schoen vercoopen.

4

Sy treden den Cop der Armen inden dreck, ende hinderen den wech der ellendighen ouer al. De Soon ende Vader slapen by eender deernen, daer mede si mijnen heylighen Naem ontheyligen.

5

Ende by alle Altaren brassen si van de verpande cleederen, Ende drincken wijn inden huyse haerder Goden, vanden bruecken.

6

⁺ Nv heb ic ymmer^† den Amorite voor haer henen verdaen,^* die so hooch was, als de Cederen, Ende sine macht als de Eycken. Ende ick verdede bouen zijne vrucht, ende onder sine wortelen.

+ B vers 6

† Nu. 21.d.24. Deut. 2.f.23.

* Nu. 13.d.32.

7

Ooc hebbe ic v wt^† Egipten lande gebracht,^* ende veertich iaren lanc inder woestijnen gheleyt, op dat ghy der Ammoriten lant besitten sout.

† Exo. 14.c.22.

* Deut. 8.a.2.

8

Ende ick heb wt uwe kinderen Propheten op verwect, ende Nazareen wt uwe Iongelingen. Ist also niet, ghi kinderen Israels, spreect de HEEre?

9

Maer ghi geeft den Nazareen^* wijn te drincken, ende gebiet den Propheten ende segt:^† Ghy en sult niet propheteren.

* Num. 6.a.4.

† Iere. 11.d.21. Amo. 7.b.16. Esaie. 30.b.10

10

⁺ Siet, ic wilt onder v kerrende maken,

+ C vers 10

[p. 82r]

ghelijck eenen waghen vol^† Schoouen kerret,

† Gherwen.

11

Alsoo dat de ghene die snel is, niet ontulieden, noch die sterc is, yet vermoghen en sal, Ende de machtighe zijn leuen niet en sal beschermen connen.

12

Ende de bogeschutters en sullen niet blijuen staen, Ende die snel loopen can, en sal niet ontloopen, Ende die daer rijdet, en sal zijn leuen niet beschermen,

13

Ende die onder de stercken, de alder manlijckste is, sal naect ontulieden moeten, op die tijt, spreect de HEERE.