Den Bibel, Inhoudende dat Oude ende Nieuwe Testament (Biestkensbijbel)

[p. 81v]

¶ De Propheet Amos.

¶ Dat eerste Capittel.

¶ Hy vercondicht Israel zijn straffinghen, Ende daer toe oock sommighe Heydenen.

1

⁺ DIt ist dat Amos^* die onder de Herders tot Thekoa was, ghesien heeft ouer Israel, inder tijt^† Vsie des Conincx Iuda, ende^* Ierobeams des soons Ioas, des Conincx Israels, twee Iaer^‡ voor de aertbeuinge.

+ A vers 1

* Amos. 7.c.14

† 4.Reg. 15.a.1

* 4.Re. 14.c.16.

‡ Sach. 14.a.5

2

Ende sprac:^* De HEEre sal wt Sion brullen, Ende zijn stemme wt Ierusalem laten hooren, Alsoo dat de Beemden der Herders iammerlijck staen sullen, ende dat de Charmel bouen verdorren sal.

* Iere. 25.d.30 Ioel. 3.c.16.

3

Alsoo spreect de HEERE: Om drie oft vier lasteren wille^† Damasci, en wil ick haerder niet sparen, Daerom dat sy Gilead met ijseren vleghelen ghedorscht hebben.

† Esaie. 17.a.1. Iere. 49.d.23

4

⁺ Maer ic wil een vier seynden in dat huys, Hasael, dat sal de Palleysen Benhadads verteren.

+ B vers 4

5

Ende ic wil de grendelen tot Damasco in stucken breken, Ende de Inwoonders op den velde Auen, met den genen die dat Scepter hout, wt den lustighen huyse wtroeyen. Also dattet volck in Syria sal in Kir wech gheuoert worden, seyt de HEERE.

6

Alsoo seyt de HEEre: Om drie ende vier lasteringhen wille^† Gaze, en wil ick haerder niet sparen. Daerom dat si de geuanghen noch meer gheuanghen, ende int Lant Edom verdreuen hebben.

† Sacha. 9.a.5.

7

Maer ick wil een vier binnen de mueren te Gaza seynden, dat sal hare Palleysen verteren.

8

Ende wil de Inwoonders tot Asdod, met den ghenen, die dat Scepter hout, wt Askalon wtroeyen, Ende mijn handt teghen Akron keeren. Also dattet vergaen sal, soo wat vanden Philisteen ouerghebleuen is, spreect de HEERE HEERE

9

Also spreect de HEEre: Om drie ende vier lasteren wille, der stadt^† Sor, en wil ick haerder niet sparen, Daerom dat si de gheuangen int Landt Edom voorder verdreuen hebben,^* Ende niet ghedacht en hebben aen dat verbondt der broederen,

† Ioel. 3.a.4.

* 3.Reg. 5.a.1.

10

Maer ic wil een vier inde mueren te Sor seynden, dat sal hare Palleysen verteren.

11

⁺ Alsoo spreect de HEEre: Om drie ende vier lasteren wille^† Edoms, en wil ick zijnder niet sparen,^* Daerom dat hi sine broeders metten sweerde veruolcht heeft, ende dat hy hare beuruchte verdaen, ende altijt verschuert heeft in sinen toorne, ende zijn verbolgentheyt eewich hout.

+ C vers 11

† Abdie. 1.a.1. Iere. 49.b.7.

* Gene. 27.g.41.

12

Mer ic wil een vier seynden na Theman, dat sal de Palleysen tot Bazra verteren.

13

Alsoo spreect de HEERE: Om drie ende vier lasteren wille, der kinderen^† Ammon, en wil ic haerder niet sparen, Daerom dat si de beuruchte vrouwen in Gilead verschuert hebben, op dat sy haer Lantpalen breeder maken souden.

† Iere. 49.a.1. Ezech. 21.d.32 25.a.2.

14

Maer ick wil een vier aensteken inde mueren Rabba, dat sal hare Palleysen verteren, alsmen roepen sal, ter tijt des strijts, Ende als dat onweder comen sal ter tijt des storms.

15

Soo sal dan hare Coninck met sine Vorsten gheuanghen wech geuoert worden, seyt de HEEre.

16

^* Also spreect de HEEre: Om drie ende vier lasteren wille Moabs, en wil ic haer niet sparen, Daerom dat si dat gebeente des Conincx tot Edom tot asschen verbrant hebben.

* Esaie. 16.a.1. Iere. 48.a.1. Ezech. 25.b.8.

17

Maer ick wil een vier seynden in Moab, dat sal de Palleysen tot Kirioth verteren, ende Moab sal steruen in een gheruyssche, Alarm geschrey, ende inder Basuynen geclanck,

18

Ende ic wil den Richter onder haer wtroeyen, ende alle hare Vorsten, met hem verworghen, spreect de HEEre.