Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ Hoe dat dat volc weder gebracht wort, Ende hoe de Vianden die haer misdaen ende gheschadicht hebben ghestraft sullen worden.

1

⁺ VVant siet, in dien daghen ende ter seluer tijt, als ic de gheuanckenisse Iuda ende Ierusalems weynden sal,

+ A vers 1

2

So wil ick alle Heydenen tsamen brenghen, ende wilse af int dal Iosaphat leyden,^* ende wil met haer aldaer rechten, van wegen mijns volcx, ende mijns erfdeels Israels, dat si onder de Heydenen verstroyt, ende haer in mijn Lant gedeylt,

* Math. 25.c.31

3

Ende dat Lot om mijn volck geworpen hebben. Ende hebben de Ionge knechtkens om spijse gegeuen, Ende de Ionghe meyskens om wijn vercocht, ende verdroncken.

4

^† Ende ghy van Sor ende Sidon, ende alle Lantpalen der Philistijnen, wat hebt ghi met my te doen? Wilt ghy my terghen? Wel aen, Indien ghy terghet, Soo wil ickt v haest, ende corts weder betalen op uwen Cop,

† Ezech. 26.a.2 27. 28. Amos. 1.b.9.

5

Ghy die mijn siluer, ende gout, ende mijne schoone Cleynodien genomen, ende in uwe kercken ghebracht hebt.

6

Daer toe ooc de kinderen Iuda, ende de kinderen Ierusalems, vercocht hebt den Griecken, op dat ghise ymmers verre van haren Lantpalen sout brengen.

7

⁺ Siet, ic wilse verwecken, wt de plaetse, daer ghijse henen vercocht hebt,^* Ende ick wilt v verghelden op uwen Cop,

+ B vers 7

* Iere. 50.c.15. Abdi. 1.c.15.

8

Ende wil uwe sonen ende dochteren wederom vercoopen, door de kinderen Iuda, die sullense, dien int Rijck Arabia, eenen volcke in verren Landen vercoopen, Want de HEEre heuet ghesproken.

9

Roept dit wt onder de Heydenen, Heyliget eenen strijt, verwect de Stercke, Laet herwaerts comen ende op trecken alle Crijchslieden.

10

^† Maeckt van uwe ploechysers sweerden, ende van uwe sickelen Spiessen. De swacke segge: Ic ben sterck,

† Esaie. 2.a.4.

11

Rottet v te hoope, ende coemt herwaerts alle Heydenen, rontom, ende vergadert v, Aldaer sal de HEEre uwe stercke neder legghen.

12

De Heydenen sullen haer opmaken ende op comen tot dat dal Iosaphat.^† Want aldaer wil ick sitten, om te ordeelen alle Heydenen, rontom.

† Matt. 25.c.31.

13

^* Slaet met den sickelen aen,^† Want den oogst is rijpe. Coemt hier af, want de Wijnpersse is vol, ende si loopt ouer,

⁺ Want haer boosheyt is groot.

* Apoc. 14.d.15

† Mat. 13.e.39

+ C vers 13

14

Het sullen hier ende daer hoopen volcx zijn, int dal des oordeels, want des HEEren dach is naby, int dal des oordeels.

15

^† De Sonne ende Mane sullen verduysteren, Ende de Sterren sullen haren schijn weerhouden.

† Ioel. 2.b.10. Esaie. 13.b.10

16

^* Ende de HEEre sal wt Sion brullen, ende wt Ierusalem zijn stemme laten hooren, Also dat, beyde Hemel ende Aerde beuen sal. Maer de HEEre sal sinen volcke een toeulucht zijn, ende een vasticheydt den kinderen Israels,

* Iere. 25.d.30 Amos. 1.a.2.

17

Ende ghy sult beuinden dat ick de HEERE uwe Godt,^* tot Sion op mijnen heylighen Berch woone.^† Als dan sal Ierusalem heylich zijn, Ende niemant vreemts meer door haer wandelen.

* Psalm. 9.b.12 76.a.3. Esaie. 8.b.10.

† Esaie. 52.a.1 Apoc. 21.b.10.

18

^‡ Ter seluer tijt sullen de Bergen van soeten Wijn druypen, Ende de Hueuelen van Melcke vloeyen. Ende alle Beken in Iuda sullen vol waters gaen.^† Ende daer sal een Fonteynadere vanden huyse des HEEREN wtgaen, die sal den stroom Sittim wateren.

‡ Amo. 9.c.14

† Ezec. 47.a.2. Sacha. 13.a.1 14.b.8.

19

^* Maer Egipten sal woest worden, ende Edom een woeste Wildernisse, om tghewelt ende onrecht aenden kinderen Iuda bedreuen,^* dat si onschuldich bloet in haren Lande vergoten hebben.

* Iere. 46.a.2

* Prou. 6.b.17 4.Re. 21.c.16. Ezech. 22.b.12.

20

Maer Iuda sal eewelijck bewoont worden, Ende Ierusalem van nv aen, tot inder eewicheyt.

21

^† Ende ick en wil haer bloet niet onghewroken laten.^* Ende de HEERE sal woonen tot Sion.

† 4.Esd. 15.b.9. Luce. 18.a.7. Apoca. 6.b.10 19.a.2.

* Apoc. 21.a.3.

¶ Eynde des Propheets Ioels.