Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ De grouwelijckheyt ende grootheyt der straffinge ende des iammers dat ouer alle menscen gaen sal, Waerom alle dinghen tot rouwe, claghen, ende bedructheyt vermaent worden, Maer indien datmen tot Godt keert, Soo sal daer noch ghenade te verhopen zijn.

1

⁺ BLaest metter^† Basuynen te Sion, roept op mijnen heylighen Berch, beuet alle Inwoonders inden Lande.^† Wandt den dach des HEEREN coemt, ende is na by.

+ A vers 1

† Iohel. 2.c.15.

† Seph. 1.c.14. Amos. 5.c.18. Esaie. 13.b.6. Iere. 30.b.7.

2

Eenen duysteren dach, eenen donckeren dach, Eenen wolcachtighen dach, eenen neuelachtighen dach, ghelijck als hem de dagheraet wt breydet ouer de Berghen, te weten, een groot ende machtich volck, dies ghelijck te voren niet gheweest en is, ende voortaen niet zijn en sal tot eewighen tijden voort ende voort.

3

^† Voor hem henen gaet een verterende vier, ende achter hem een bernende vlamme. Dat Lant is voor hem ghelijck eenen Lusthof, maer achter hem ghelijck een woeste Wildernisse, ende niemant en sal hem ontgaen.

† Deut. 4.d.24 9.a.3. Psal. 50.a.3. Hebr. 12.d.29

4

Sy zijn ghestelt als Peerden, ende rennen als Ruyters.

5

Sy springhen daer henen, bouen op de Berghen, gelijc de Wagens ratelen, ende ghelijck een vlamme craect int stroo, als een machtich volc, dat totten strijdt gherust is.

6

De volcken sullen haer van hem ontsetten. Alle aensichten zijn soo bleeck, als de pot.

7

Sy sullen loopen ghelijck als de Ruesen, ende de mueren beclimmen, als de Crijghers.

8

⁺ Een yeghelijck sal stracx voor hem daer henen trecken, ende niet vertoeuen. Niemandt en sal den anderen verhinderen, maer een yeghelijck sal in zijn ordinancie henen trecken. Ende sullen door de wapenen breken, ende niet ghewont worden.

+ B vers 8

9

Sy sullen inder Stadt rontsom rijden, opter Mueren loopen, ende inde huysen climmen, ende ghelijck als een dief, door de vensteren daer in breken.

10

Voor hem dauert dat Lant, ende den Hemel beeft.^† De Sonne ende Mane worden duyster, ende de Sterren verhouden haer schijnsel.

† Ioel. 3.c.15. mat. 24.b.29. Esaie. 13.b.10 Ezech. 32.a.8.

11

Wandt de HEEre sal sinen donder voor zijn heyr laten gaen, want zijn heyr is gansch groot ende machtich, dwelcke zijn beuel volbrenghen sal. Wandt den dach des HEEren is groot, ende seer^* verschrickelijck, wie can hem verdraghen?

* Iohel. 2.f.31.

12

⁺ Ende nv spreect de HEEre:^† Bekeert v tot my van gantscher herten, met vasten, met weenen, ende met claghen.

+ C vers 12

† Ezech. 18.e.30 Iere. 18.b.11. 25.a.5. 35.b.15 Deut. 4.c.29. 30.a.2. Ionas. 3.b.8. 4.Re. 17.c.13.

13

Verschuert uwe herten, ende niet uwe cleederen, ende bekeert v totten HEEre uwen Godt.^* Wandt hy is ghenadich, bermhertich, verduldich, ende van groter goetheyt, ende de straffe berout hem haest.

* Psal. 86.a.5 c.15. 103.a.8. 145.a.8. Ione. 3.b.9. 4.a.2. Exod. 34.a.6

14

^‡ Wie weet, het mach hem noch weder berouwen, ende een segheninghe nae hem laten, om te offeren Spijsoffer ende Dranckoffer den HEERE uwen Godt.

‡ Ionas. 3.a.9

15

^† Blaest met Basuynen te Sion, Heylicht een vasten, Roept de gemeynte te samen, vergadert dat volc,

† Iohel. 1.c.14

16

^* Heylicht de ghemeynte, vergadert de Outsten, brengt de Ionge kinderen ende soochkinderen te hoope.^* De Bruydegom gae wt zijnder Camere, ende de Bruyt wt hare slaepcamer.

* Exo. 19.b.10

* 1.Cor. 7.a.5.

17

^* Laet de Priesters des HEEren dienaers, weenen tusschen dat portael ende den Altaer, ende segghen: HEERE spaert dijn volc, ende en laet dijn erfdeel niet te schanden worden, dat de Heydenen ouer haer heerschappen. Waerom wilt ghy onder de volcken laten segghen:^† Waer is nv haer Godt?

* Iohel. 1.b.13.

† Psal. 42.a.4 79.b.10. 115.a.2. Deut. 32.c.27.

18

⁺ So sal dan de HEEre ouer zijn Lant een ieloersche liefde hebben, ende zijn volck sparen.

+ D vers 18

19

Ende de HEERE sal antwoorden, ende tot sinen volcke segghen: Siet, Ick wil v Coorns, Mosts ende Olijs planteyt seynden, dat ghy genoech daer aen hebben sult, ende en wil v niet meer onder de Heydenen laten te schanden worden.

20

Ende ick wil den ghenen vant Noorden verre van v wech drijuen, ende hem in een dorre ende woeste Lant verstooten, te weten, Sijn aensicht teghen de Oostersche zee, Ende zijn eynde nae de wterste zee toe. Hy sal verrotten ende stincken, want hy heeft groote dinghen ghedaen.

21

En veruaert v niet ghy lieue Lant, maer weest vrolijck, ende hebt eenen

[p. 81r]

goeden moet, want de HEEre can oock groote dinghen doen.

22

En veruaert v niet, ghy dieren opten Velde, wandt de wooningen inder woestijnen sullen groen worden, ende de boomen hare vruchten brenghen, ende de Vijgheboomen ende Wijnstocken sullen oock draghen.

23

^* Ende ghy kinderen Sions verhuecht v, ende weest vrolijck inden HEEre uwen Godt,⁺ die v eenen^† Leeraer ter gherechticheyt gheeft, ende v af seynt^‡ vroegen reghen ende spaden reghen, als te voren,

* Soph. 3.c.14 Sacha. 2.b.10 9.b.9.

+ E vers 23

† Esa. 30.d.20 Ioan. 14.c.36 1.Ioan. 2.d.27.

‡ Leu. 26.a.4 Deut. 11.b.14 28.b.12.

24

Dat de Schueren vol Coorns, ende de Wijnperssen oueruloedicheyt van Most ende Olie, hebben sullen.

25

Ende ick wil v de Iaren weder geuen,^* welche de Sprinchanen, Keuers, Wormen ende Rupsen (die mijn groot heyr waren, dat ick onder v seynde) gegeten hebben.

* Iohel. 1.a.4

26

Dat ghy ghenoech te eten hebben sult, Ende den Naem des HEEren ws Gods prijst, die wonder onder v ghedaen heeft, ende mijn volc en sal niet meer te schanden worden.

27

Ende ghy sultet beuinden,^* dat ick midden onder Israel sy, ende dat ic de HEEre uwe Godt sy, ende niemant meer, Ende mijn volc en sal niet meer te schanden worden.

* Leuit. 26.b.12

28

⁺ Ende nae desen,^† wil ick mijnen gheest wtgieten ouer alle dat vleesch, ende uwe sonen ende dochteren sullen propheteren, uwe Outsten sullen droomen hebben, ende uwe Ionghelingen sullen gesichten sien.

+ F vers 28

† Num. 11.f.25. Esai. 44.a.3 Ezec. 36.d.26. Acto. 2.b.17.

29

Ooc wil ick ter seluer tijt, beyde ouer knechten ende dienstmaechden, mijnen geest wt ghieten.

30

Ende ick wil wonderteekenen gheuen inden Hemel ende op Aerden, te weten, bloet, vier ende roockdamp.

31

De^* Sonne sal in duysternisse, ende de Mane in bloet verandert worden,^† eer dat den grooten ende verschrickelijken dach des HEEren coemt.

* Apoca. 6.c.12.

† Sop. 1.c.14 Mala. 4.a.5.

32

Ende het sal gheschieden.^* So wie den Naem des HEEren aenroepen sal, die sal beurijt worden. Want opten Berch Sion ende te Ierusalem, sal een^† verlossinghe zijn, ghelijc als de HEERE toegheseyt heeft: Oock by den anderen ouergebleuene, die de HEERE roepen sal.

* Rom. 10.b.13. Sopho. 3.b.9

† 2.Pet. 1.c.18.