Den Bibel, Inhoudende dat Oude ende Nieuwe Testament (Biestkensbijbel)

¶ De Propheet Ioel.

¶ Dat eerste Capittel.

¶ Hy propheteert den volcke Israels dat alle haer heerlicheyt met den wtwendighen Godts dienst, ondergaen ende verstoort sal worden.

1

⁺ DIt is dat woort des HEEren, dat gheschiet is tot Ioel den sone Pethuel.

+ A vers 1

2

Hoort dit, ghy Outsten, ende aenmerct, alle Inwoonders, inden Lande. Oft een sulcks wel gheschiet sy, by uwen tijden, oft by uwer Vooruaderen tijden?

3

Segghet uwen kinderen daer af, ende latet uwe kinderen haren kinderen segghen, ende de selue kinderen haren anderen nacomelingen,

4

Namelijck, soo wat de Rupsen laten ouerblijuen, dat verslinden de^† Sprinchanen, Ende soo wat de Sprinckhanen laten ouerblijuen, dat verslinden de Keuers, Ende so wat de Keuers laten ouerblijuen, dat verslinden de Wormen.

† Exo. 10.d.14. Psa. 105.d.34 Sapi. 16.b.9. Apoca. 9.a.3.

5

Ontwaect ghy dronckene ende weent, ende huylet alle^† Wijnsuypers om den Most, want hy is v voor uwen monde wech ghenomen.

† Esaie. 5.b.11. 56.c.12.

6

Want een machtich volc, ende dat sonder getal, trect op in mijn lant,^† dat heeft tanden als Leeuwen, ende bactanden als Leeuwinnen.

† Deut. 32.d.24

7

^* Dat selue verwoest mijnen Wijnberch, ende stroopt mijnen Vijchboom af, schellet hem ende verwerpt hem, dat sine tacken daer wit staen.

* Esaie. 3.c.13. 5.a.1. Psal. 80.b.14

8

⁺ Huylt, ghelijc een Maecht, die eenen Sack aen treckt om haren Bruydegom.

+ B vers 8

9

Wandt dat Spijsoffer ende Drancoffer is vanden huyse des HEEren wech, ende de Priesters, des HEEren dienaers, trueren.

10

^† Dat Velt is verwoest, ende den Acker staet iammerlijc, Dat Coorn is verdoruen, den wijn staet iammerlijck, ende de Olie claechlijck.

† Leuit. 26.e.32 Esaie. 1.a.7.

11

De Ackerlieden sien iammerlijc, ende de Wijngaerdeniers huylen, om de Tarwe ende de Gerste, dat vanden oogste opten velde niet geworden en can.

12

Soo staet den Wijnstock oock iammerlijck,

[p. 80v]

ende de Vijchboomen claechlijck, Daer toe de Granaetboomen, Palmboomen, Appelboomen, ende alle boomen opten Velde, zijn verdorret. Want de vruechde der menschen is tot eenen iammer gheworden.

13

Omgordet v,^† ende claecht ghi Priesters, huylet ghy dienaers des Altaers, gaet henen in, ende ligghet in Sacken, ghy dienaers mijns Gods. Want beyde dat Spijsoffer ende Drancoffer is vanden huyse ws Godts wech.

† Iohel. 2.c.17.

14

^+† Heylicht een vasten, roept de ghemeynte tsamen, vergadert de Outsten, ende alle Inwoonders des Landts, totten huyse des HEEREN ws Gods, ende roept totten HEERE,

+ C vers 14

† Iohel. 2.c.15.

15

O wee des daechs.^† Want den dach des HEEren is nae by, ende coemt ghelijck een verderffenisse vanden Almachtighen.

† Iohel. 2.a.1. Iere. 30.b.7. Esaie. 13.b.6. Amos. 5.c.18. Soph. 1.c.14

16

Soo sal de spijse voor onsen ooghen wech ghenomen worden, ende vanden huyse onses Godts, vruechde ende ghenoechte.

17

Dat saet is onder der Aerden veruuylt, De Coornhuysen staen woest, de Schueren veruallen, want dat Coorn is verdoruen.

18

O^† hoe sucht dat Vee, de Runderen sien claechlijck, wandt si en hebben gheen weyde, ende de Schapen versmachten.

† 3.Reg. 18.a.5.

19

HEERE, v roepe ick aen, want dat vier heeft de Beemden inde woestijne verbrant, ende de vlamme heeft alle boomen opten Acker aenghesteken.

20

Oock crijsschen de wilde dieren tot v,^* wandt de waterbeken zijn wtghedroocht, ende dat vier heeft de Beemden inder woestijnen, verbrant.

* 3.Reg. 17.a.7