Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Hy roept dat volck aen, ende vermaentse tot wederkeeringe, want hyse ghenadelijck wil weder ontfanghen.

1

⁺ BEkeert^† v Israel tot den HEEre uwen Godt. Want ghy zijt gheuallen om uwer misdaets wille.

+ A vers 1

† Ozee. 12.a.6. Iere. 18.b.11. Ezech. 18.e.30 33.c.12.

2

Neemt dese woorden met v, ende bekeert v tot den HEERE, ende segt tot hem: Vergheeft ons alle sonde, ende doet ons wel,^† So willen wy offeren de Osschen onser lippen.

† Hebre. 13.b.15 Psal. 50.b.14

3

Assur en sal ons niet helpen, ende wy en willen niet meer op Peerden rijden, Oock niet meer segghen tot de wercken onser handen: Ghy zijt onse God, Maer laet de Weesen by v ghenade vinden.

4

Soo wil ick haer ouertreden weder heelen. Gheerne wil icse liefhebben, Dan sal hem mijnen toorne van hen weynden.

5

Ick wil Israel ghelijck eenen dauwe zijn, dat hy sal bloeyen, ghelijck als een Roose, ende sine wortelen sullen wtbreken, ghelijck Libanon,

6

Ende sine spruyten hen wtbreyden, dat hy sy so schoone, als eenen Olijfboom, ende sal sulcken goeden rueck gheuen, als Lybanon. Ende sullen weder onder sine schaduwe sitten. Van Coorn sullen si hen gheneren, ende bloeyen, als eenen wijnstock, Sijne ghedachtenisse sal zijn, als den wijn aenden Lybanon.

7

Ephraim, wat sullen my voortaen den Afgoden? Ick wil hem verhooren, ende leyden. Ick wil zijn, ghelijc een groenende Denne, Aen my salmen dijne vrucht vinden.

8

Wie is wijs, die dit verstae, ende cloeck, die dit mercke?^† Want de weghen des HEEREN zijn recht,^* ende de rechtuaerdigen wandelen daer inne: Maer de ouertreders vallen daer in.

† Apoca. 15.a.3.

* Eccl. 40.b.14

¶ Eynde des Propheets Hosea.