Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ Hy bewijst hen haer boosheydt, Ende vercondicht haer de straffinge.

1

⁺ DOen Ephraim verschrickelijc leerde, werdt hy in Israel verheuen, daer nae besondichden si hen door Baal, ende werden daerom ghedoodet.

+ A vers 1

2

Maer nv maken si der sonden vele meer,^† ende van haren siluer, Beelden, hoe zijt slechs verdencken connen, te weten, Afgoden,^* welcke doch enckel smidts wercken zijn. Noch prediken si vanden seluen: Wie de Calueren cussen wil, die sal Menschen offeren.

† Esaie. 46.a.5 Ezec. 16.b.17. Ozee. 2.b.10.

* Esai. 44.b.12. 46.a.5.

3

Die selfde sullen hebben de morgen wolcke, ende den dauwe, die vroech valt. Iae ghelijck dat caf, dat vanden dorschvloer verwayt wort, ende ghelijck den Roock vanden schoorsteen.

4

Maer^† ic ben de HEEre dijn God, van Egipten landt af. Ende ghy en sout ymmers gheenen anderen God kennen, dan my, ende gheenen Heylant, behaluen alleene my.

† Ozee. 12.b.9. Exod. 20.a.2.

5

^* Ick nam my oock uwer aen, in de woestijne, int dorre Landt.

* Deut. 8.a.2.

6

⁺ Maer^† de wijle dat si geweydet zijn, dat si sadt gheworden zijn, ende genoech hebben, so verheft hem hare herte, daeromme vergheten sy mijnder.

+ B vers 6

† Deut. 6.c.11. 8.c.16. Deut. 31.c.20. 32.b.15.

7

Daerom wil ick ooc teghen hen worden, ghelijck eenen Leeuwe, ende ghelijc eenen Luypaert opten weghe, wil ick op

[p. 80r]

hen loeren.

8

Ick wil hen ontmoeten, ghelijck eenen Beyre, dien sine ionghen ghenomen zijn, Ende wil haer verstockt hert verschueren, ende wilse aldaer als eenen Leeuwe verslinden. De wilde dieren sullense verschueren.

9

^* Israel ghy brengt v in ongheluck. Want dijn Heyl staet alleen by my.

* Iob. 22.b.5.

10

Waer is dijn Coninck henen? Die v helpen conne in alle uwe Steden. Ende alle uwe Richters? Daer ghy af seydet:^† Gheeft my Coninghen ende Vorsten:

† 1.Regum. 8.a.5 Acto. 13.c.21.

11

Wel aen, Ick gaf v eenen Coninc in mijnen toorne, ende wil v hem in mijnder gramschappen,^* wech nemen.

* 1.Reg. 15.f.26

12

De misdaet Ephraim is tsamen ghebonden, ende hare sonde is bewaert.

13

Want hen sal wee worden, ghelijck als eender die daer baert, wandt het zijn onuoorsichtighe kinderen. De tijt sal comen, dat si niet blijuen en sullen, voor den iammer der kinderen.

14

Maer ick wilse wt der Hellen verlossen, ende vanden doot beurijen.^† Doot, Ick wil v een fenijn zijn: Helle ick wil v een Pestilencie zijn. Doch is den troost, voor mijne ooghen verborgen,

† Esaie. 25.b.8. 1.Cor. 15.f.54

15

Want hy sal tusschen broederen vrucht brengen. Daer sal eenen Oosten wint comen, De HEERE sal wt de woestijne op varen, ende hare Fonteyne wt drooghen, ende hare wateradere verdrooghen, Die selue sal den schat alles costelijcken huysraets roouen.

16

^* Samaria sal woest worden, wandt si zijn haren Gode onghehoorsaem. Sy sullen door tsweert vallen, ende hare ionghe kinderen vermorselt, ende hare beuruchte vrouwen, verschuert worden.

* 4.Re. 17.a.6