Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ Hy verwijt haer hare ontrouwe ende afual ende vermaentse tot wederkeeringhe, om zijnder weldaden wille.

1

⁺ IN Ephraim is ouer al lueghene tegen my, ende inden huyse Israels valsche Godts dienst. Maer Iuda heerschapt noch met Gode, ende met den rechten Heyligen Gods dienst.

+ A vers 1

2

Maer Ephraim weydet hem seluen vanden winde, ende loopt den Oosten wint na, ende maect daghelijcx der Afgoderien ende der schaden meer.^* Sy maken met Assur een verbondt,^† ende brenghen Balsem in Egipten.

* 4.Re. 16.b.7

† Esai. 57.b.7

3

Daerom sal de HEEre de sake Iuda voeren, ende Iacob besoecken nae zijn wesen, ende hem vergelden nae sine verdienste.

4

^* Hy heeft in Moeders lichaem, sinen broeder ondertreden, ende van alle crachten met Godt ghecampt.

* Gene. 25.c.25.

5

Hy^† campte met den Enghel, ende ghewan, want hy weende ende badt hem. Alsdoen heeft hi hem ymmers te^* BethEl gheuonden, ende aldaer heeft hy met ons ghesprocken.

† Gene. 32.d.28

* Genes. 35.b.6

6

Maer de HEEre is de Godt Sebaoth, HEERE is sinen name.^* Soo bekeert v nv tot uwen Godt. Doet bermherticheyt ende recht, ende hopet ghestadelijc op uwen God.

* Sacha. 1.a.3. Malac. 3.b.7. Iere. 15.d.19.

7

⁺ Maer de Coopman heeft een valsche waghe in zijnder hant, ende bedriecht gheerne.

+ B vers 7

8

Wandt Ephraim seyt:^† Ick ben rijck, Ic heb genoech, Men en sal my gheene misdaet vinden, in alle mijnen arbeyt, dat sonde sy.

† Apoca. 3.c.17.

9

^† Maer ic de HEEre ben dijn God, van Egypten lande af, ende ick die v noch in de Hutten laet woonen, ghelijck alsmen ter Iaertijt plach,

† Exod. 20.a.2. Ozee. 13.a.4.

10

Ende spreke tot de Propheten. Ende ick bent, die soo vele Prophetien gheeft, ende door de Propheten my aenthoone.

11

In Gilead is enckel Afgoderie, ende te^† Gilgal offeren si Osschen te vergheefs, Ende hebben so vele Altaren, soo vele Oppers als opten velde staen.

† Amo. 4.b.4. Ozee. 9.c.15.

12

^* Iacob moeste vlieden in dat Landt Syria. Ende^† Israel moeste om een wijf dienen, om een wijf moeste hy hoeden.

* Gene. 28.b.10

† Ge. 29.b.18.

13

^* Maer daer nae leyde de HEERE Israel wt Egipten, door eenen Prophete, ende liet hem^† waerscouwen door eenen Propheet.

* Exod. 13.a.3.

† Bewaren.

14

Maer nv vertoornt hem Ephraim, door hare Afgoden, Daerom sal hare bloet ouer haer comen, ende haren^* Heere sal haer, haer spotten verghelden.

* De Coninck Assur.