Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ Hy vermaent haer de oude trouwe ende weldaden, die hy haer bewesen heeft, oft hi haer doch weder brengen mochte.

1

⁺ DOen Israel ionck was, hadde ick hen lief,^† ende riep hem, mijnen sone wt Egipten.

+ A vers 1

† Exodi. 3.b.7. 6.b.7. Matth. 2.c.15

2

Maer alsmense nv roept, soo weynden si hen daer af,^* ende offeren den Baalim, ende roocken de Beelden.

* Exo. 32.b.6. 3.Reg. 12.d.32 4.Re. 10.c.18

3

Ic nam Ephraim by zijn armen, ende leyddese, maer si en merctent niet, hoe ickse holp.

4

Ick lietse een menschelijck iock trecken, ende in zeelen der liefden gaen, ende holp hen dat iock aen haren halse draghen,^† ende gaf hen voeder,

† Exod. 16.c.13.

5

Op dat hi hem ymmers niet weder in Egipten Lande en soude keeren. Soo is nv Assur hare Coninck gheworden, want si en willen haer niet bekeeren.

6

Daerom sal dat sweert ouer hare steden comen, ende sal hare grendelen te niet maken ende op eten, om haers voornemens wille.

7

Mijn volc is moede, hem tot mi te keeren, ende hoemen hen predict, so en richt hem niemandt op te hooren.

8

⁺ Wat sal ick van v maken Ephraim? Sal ick v beschutten Israel? En sal ick niet met recht een^† Adama van v maken, ende v ghelijc als Seboim, toebereyden?

+ B vers 8

† Gen. 19.e.24 Deut. 29.d.23.

9

Maer mijn herte is van eenen anderen sin, mijne barmherticheyt is te vierich, dat ick niet doen en wil na mijnen grammigen thoorne, noch my henen keeren, om Ephraim gansch te verderuen. Want ick ben Godt, ende niet een mensche, ende ben de Heylighe onder v.

10

Maer ic en wil inde stadt niet comen. Alsdan salmen den HEEre nauolgen, ende hy sal brullen als eenen^† Leeuwe. Ende als hy brullen sal, so sullen die verschricken, die teghent westen zijn.

† Apoca. 5.a.5.

11

Ende die in Egipten sullen oock verschricken, als een voghel, Ende die inden Lande Assur, als duyuen. Ende ick wilse in hare huysen setten, seyt de HEERE.