Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ Hy vertoont den volcke sine weldaden, ende verwijdt den seluen volcke Israels haer ondancbaerheyt ende Afgoderie.

1

⁺ ISrael is eenen verwoesten^† wijnstoc gheworden, sine vrucht is effen oock alsoo. Want soo vele vruchten als hy heeft, soo vele Altaren had hy gemaect.

+ A vers 1

† Esaie. 5.a.1.

2

Waer dat Lant aent alder beste was, daer stichten si de alder schoonste kercken. Hare herte is gedeylt, Nv salse hare schult vinden. Hare Altaren sullen in stucken ghebroken, ende hare kercken sullen verdestrueert worden.

3

Als dan moeten si segghen: Wy en hebben gheenen Coninck, wandt wy en vreesden den HEEre niet, Wat mach ons de Coninck nv helpen?

4

Sy sweeren te vergeefs, ende maken een verbont, Ende soodanighen Raet groeyt op alle voren inden velde, ghelijck als galle.

5

De Inwoonders te Samaria, sorgen voor de^† Calueren te Bethauen. Want zijn volck truert om hem, ouer welcken hen nochtans sine Camarim pleghen te verhueghen, van siner heerlijckheyt weghen, wandt het is van hem wech gheuoert.

† 3.Reg. 12.d.28

6

⁺ Ia dat Calf is in Assyrien ghebracht, tot een gheschencke den Coninck te Iareb. Also moet Ephraim met scande staen, ende Israel schandelijcken gaen met zijn voornemen.

+ B vers 3

7

Wandt de Coninck te Samaria is daer henen, ghelijc eenen schuym opt water.

8

^* De hoochten te Auen zijn vernielt, daer hem Israel mede besondichde. Dijstelen ende doornen wassen op hare Altaren, Ende si sullen segghen:^† Ghy berghen bedect ons, ende ghi Hueuelen, valt op ons.

* Esaie. 2.c.18. Soph. 2.b.11.

† Luce. 23.c.29. Apoca. 6.c.16

9

Israel, ghy hebt sint ter tijt^* Gibea gesondicht, daer zijn sy ooc by gebleuen. Maer des strijts te Gibea gelijcken, die teghen de boose Lieden gheschiede, en salse niet aengrijpen.

* Iudi. 19.f.25.

10

Maer ick wilse castien na mijn wenschen, dat daer volcken sullen ouer haer vergadert comen, als icse straffen sal om hare twee sonden.

11

Ephraim is een Calf gewent, dat het gheerne dorschet. Ick wil hem ouer sinen schoonen hals varen, Ick wil Ephraim rijden, ende Iuda sal ploeghen, ende Iacob eggen.

12

Daeromme^† saeyt gherechticheyt, ende oogst Liefde, ende ploeghet anders, de wijle dat het tijt is, den HEERE te soecken, tot dat hy come, ende reghene ouer v gherechticheyt.

† Ierem. 4.a.4

13

Want ghy ploecht boose dinghen, ende mayt quade daet, ende eet luegen vruchten. Aengesien dat ghy v dan verlaet op dijn wesen, ende op de menichte dijnder Helden,

14

Soo sal hem een Rumoer verheffen in uwen volcke, dat alle uwe Stercten verdestrueert worden.^† Ghelijck als Salman dat huys Arbeel ver-

† Iudi. 8.b.12.

[p. 79v]

stoorde, ter tijt des strijts, doen de Moeder ouer de kinderen te gronde ghinck.

15

Effen also salt v te BethEl ooc gaen, om uwer grooter boosheyts wille, dat de Coninck Israels, smorghens vroech ondergae.