Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ Hy verwijt hen haer ontrouwe, afual ende ghiericheyt, ende wat straffinghe haer ontmoeten sal, die bewijst hy haer.

1

⁺ GHy en derft v niet verhuegen, Israel, noch beroemen, gelijc de volcken, want ghy hoereert teghen uwen Godt, daer mede dat ghy hoeren-

+ A vers 1

[p. 79r]

loon soect, dat alle schueren vol Corens worden.

2

^† Daeromme en sullen v de schueren ende wijnperssen niet generen, Ende den wijn en sal v niet ghedijen.

† Hag. 2.c.17.

3

Ende en sult niet blijuen int Landt des HEEREN. Maer Ephraim moet weder in Egipten,^* ende moet in Assyria, soo wat onreyn is, eten,

* Ezech. 4.c.13.

4

Daer sy den HEEre gheen Dranckoffer van wijne, noch yet te wille gedoen en connen. Hare offerhande sal zijn ghelijc der bedroefder broot, van dwelcke onreyn worden, alle die daer af eten. Wandt hare broot moeten si voor hem seluen eten, ende en sal niet in des HEEREN huys ghebracht worden.

5

Wat wilt ghy dan inde Iaergetijden ende inde vierdaghen des HEEREN doen?

6

Siet, si moeten wech voor den verdestrueerder, Egipten salse vergaderen, ende Moab salse begrauen.⁺ Netelen sullen wassen, daer nv hare lieue Afgoden siluer staet, ende doornen in hare Hutten.

+ B vers 6

7

De tijt der besoeckingen is gecomen, de tijt der vergheldinghe, dat sal Israel wel gewaer worden. De Propheten zijn Sotten, ende de Rotgheesten zijn ontsinnich, om uwer grooter misdaet, ende om der grooter verdrietelijcker Afgoderije wille.

8

De Wachters in Ephraim, hielden hen voormaels aen mijnen Godt, Maer nv zijn si Propheten die stricken leggen, op alle hare weghen, door de verdrietelike Afgoderie, inden huyse haers Gods.

9

Sy verderuent te diepe ende seere, ghelijck ter tijt^* Gibea,^† Daeromme sal hy haerder misdaet ghedencken, ende hare sonde besoecken.

* Iudic. 19.f.25

† 4.Regum. 9.

10

Ick vant Israel in de woestijne, als druyuen, ende sach uwe vooruaders, als de eerste^† vijghen aen den vijchboom. Maer daer nae ghinghen si tot^* BaalPeor, ende beloofden hen den schandelijcken Afgode, ende werden ymmers so grouwelijck, als hare Boelen.

† Ierem. 24.a.3 29.c.17.

* Num. 25.a.3

11

Daeromme moet de heerlijckheyt Ephraims, als een voghel, wech vlieghen, Dat sy noch baren, noch dragen, noch beurucht worden en sullen.

12

Ende al voeden sy hare kinderen op, So wil icse nochtans sonder kinderen maken, dat si gheene Lieden zijn en sullen. Oock wee haer, wandt ick ben van haer gheweken.

13

⁺ Ephraim, ghelijck als ict aensie, is geplant ende schoone, ghelijck Tyrus, Maer moet nv hare kinderen wtgheuen den dootslagher.

+ C vers 13

14

HEERE gheeft haer, Maer wat wilt ghy haer geuen? Gheeft haer onuruchtbare Lichamen, ende verdroochde borsten.

15

Alle haer boosheyt geschiet tot^† Gilgal, aldaer ben ick hen viant. Ende ick wilse ooc om haers boosen wesens wille, wt mijnen huyse stooten, ende hen gheene liefde meer bewijsen, wandt alle hare Vorsten zijn afuallighe.

† Iosue. 4.d.19

16

Ephraim is gheslaghen, hare wortel is verdorret, also dat si geen vrucht meer brenghen en connen. Ende al baren si, So wil ick nochtans de lieue vrucht haers lichaems, dooden.

17

Mijn Godt salse verwerpen, daerom dat si hem niet hooren en willen, ende moeten onder de Heydenen verdwaelt gaen.