Den Bibel, Inhoudende dat Oude ende Nieuwe Testament (Biestkensbijbel)

¶ De Propheet Hozea.

¶ Dat eerste Capittel.

¶ God de HEERE verthoont den Propheet Hosea onder een ghelijckenisse, dat de Ioden verstooten, ende de Heydenen te houwelijck met God vergadert sullen worden.

1

⁺DIt is dat woort des HEEren dat gheschiet is tot Hozea, den sone Beheri, ter tijt Vsie, Iotham, Ahas, ende Hiskia der Coninghen Iuda, Ende ter tijt Ierobeams, des soons Ioas, des Conincks Israels.

+ A vers 1

2

Ende doen de HEEre begost te spreken door Hosea, sprac hy tot hem:^† Gaet henen, ende neemt een Hoerenwijf, ende Hoerekinderen, Want het Landt loopt vanden HEEre nae de hoererie.

† Leuit. 21.b.7. Eze. 44.d.21 Ozee. 3.a.1.

3

Ende hy ghinc henen, ende nam Gomer de dochter Diblaim. Die werdt beurucht, ende baerde hem eenen sone.

4

Ende de HEEre sprac tot hem: Noemt hem^† Iesreel, Wandt het is noch om een cleyne tijt te doen, so wil ic de bloetschulden in Iesreel versoecken, ouer dat huys Iehu, Ende ick wil met dat Conincrijck des huys Israels een eynde maken.

† 3.Reg. 21.b.6.

5

Ter seluer tijt wil ick den boghe Israels in stucken breken, int dal Iesreel.

6

⁺Ende si wert noch eens beurucht, ende baerde een dochter. Ende hy sprac tot hem: Noemtse LoRyhamo. Want ick en wil des huys^* Israels niet meer ontfermen, Maer ick wilse wech worpen.

+ B vers 1

* 4.Regum. 17 a.6.

7

^* Nochtans wil ick dat huys Iuda ontfermen, Ende wil hen helpen, door den HEEre haren Godt,^† Maer ick en wil haer niet helpen door Boghe, Sweerdt, Strijt, Peerden oft Ruyters.

* Gen. 49.a.8

† 4.Regum. 19.g.35.

8

Ende als si LoRyhamo gespeent had, wert si weder beurucht, ende baerde eenen sone.

9

Ende hy sprack: Noemt hem LoAmi. Wandt ghy en zijt mijn volck niet, Daeromme en wil ick oock de uwe niet zijn.