Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ Van Antichristus, ende van de verlossinghe der Babyloonscher geuanckenissen, Ende de destructie Ierusalems, ende vanden laetsten dach.

1

⁺ENde de Coninck sal doen wat hy wil, Ende sal hem^† verheffen ende oprechten tegen al tghene dat God is, Ende teghen den^* Godt alder Goden sal hy grouwelijcken spreken. Ende het sal hem gelucken, ter tijt toe dat de^† gramschap wt is. Wandt het is besloten hoe langhe dattet dueren sal.

+ A vers 1

† 2.Tes. 2.a.4.

* Deut. 10.d.17 Dan. 2.g.47.

† Apoc. 15.a.1.

2

Ende de Godt zijnder Vooruaderen en sal hy niet achten, Hy en sal noch der vrouwen liefde, noch eenigen Godt achten, Wandt hy sal hem teghen alle dinck oprichten.

3

Maer sinen eyghenen Godt Maosim sal hy in diens stede eeren. Wandt hy sal eenen Godt, daer sine Vooruaders niet af gheweten en hebben, eeren, met gout, siluer, edel gesteenten, ende Cleynodien.

4

Ende hy sal den ghenen die hem Maosim helpen stercken, met den vreemden Godt, die hy vercoren heeft, groote eere doen, Ende haer tot Heeren maken, ouer groot goet, ende haer dat Landt te loon wt deylen.

5

Ende int eynde sal de Coninc teghent Suyden met hem stooten. Ende de Coninck teghent Noorden sal hem oock teghen hem stellen, met Waghens, Ruyters, ende veel Schepen, Ende sal inde Landen vallen, ende verderuen, ende door trecken.

6

Ende sal in dat weerde Lant vallen, Ende vele sullen daer vergaen.^† Maer dese sullen zijnder handt ontcomen: Edom, Moab, ende de eerstelingen der kinderen Ammon.

† Apoca. 12.c.11

7

Ende hy sal sine macht inde Landen seynden, Ende Egipten en sal hem niet ontcomen.

8

Maer hy sal door sinen toch heerschappen ouer de gulden ende siluere schatten, ende ouer alle Cleynodien Egipti, Libie, ende der Moren.

9

^+* Maer een ghecrijsch vant Oosten ende Tnoorden sal hem veruaren, Ende hy sal met grooter verbolghentheydt wt trecken, op dat hy daer vele verniele ende verderue.

+ B vers 9

* Apoca. 11.c.11.

10

Ende hy sal de Tenten van sinen Palleyse opslaen tusscen twee zeen, rontsom den heyligen berch, tot dattet met hem een eynde worde,^† Ende niemant en sal hem helpen.

† Apoc. 19.d.20 20.c.12.

11

Ter seluer tijt sal de groote^* Vorst Michael, die voor dijn volck staet, hem opmaken,^† Want het sal een alsulcken bedroefden tijt zijn, als oyt geweest is, sint datter Lieden gheweest zijn, tot op die selue tijt toe. Ter seluer tijt sal dijn volc beschermt worden, alle die int boeck gescreuen staen.

* Dan. 10.b.13

† Mat. 24.b.21

12

Ende^† vele, die onder der Aerden liggen en slapen, sullen wacker worden, sommighe totten eewighen leuen, sommighe tot eewiger versmaetheyt ende schande.

† Ioan. 5.c.25. 1.Cor. 15.e.52. 1.Tes. 4.c.16.

13

^* Maer de Leeraers sulle blincken, als des Hemels claerheyt, Ende de ghene, dieder vele tot der gherechticheyt wijsen, als de Sterren, altijt ende eewelijck.

* Mat. 13.e.43. Sapi. 3.a.7.

14

⁺Ende ghy Daniel, verbercht dese woorden, ende beseghelt dit schrift, tot op de laetste tijt, soo sullender vele ouer comen, ende groot verstant vinden.

+ C vers 14

15

Ende ick Daniel sach, ende siet, Daer stonden twee andere, Deene aen desen oeuer des waters, Dander aen ghenen oeuer.

16

^* Ende hy sprack tot den Man in de lijnen cleederen, die bouen opt water stont:^† Wanneer wilt dan een eynde zijn, met sulcke wonderlijcke wercken?

* Danie. 10.a.5.

† Apoca. 6.c.10.

17

Ende ick aenhoorde den Man in dat lijnwaet ghecleedt, die bouen opt water stont.^* Ende hi hief zijn rechte ende slincke hant op nae den Hemel, ende swoer by den ghenen die eewelijck leeft,^† dattet eenen tijt ende sommighe tijt, ende een halue tijt dueren sal. Ende als de verstroyinghe des heyligen volcx een eynde heeft, dan sal sulcx al gheschieden.

* Apoca. 10.a.5

† Apoca. 11.c.11 12.d.19.

18

Ende ick hoordet, maer ick en ver-

[p. 77r]

stonts niet. Ende sprack: Mijn Heere, hoe salt daer na vergaen?

19

Ende hi seyde: Gaet henen Daniel, Want het is verborghen, ende beseghelt, tot op de laetste tijt.

20

Vele^* sullender ghereynicht, gheloutert ende gheproeft worden. Ende de godtloose sullen een godtloos wesen voeren,^* Ende de godloosen en sullent niet^† achten. Maer de verstandige sullent achten.

* Dan. 11.e.35

* Math. 13.b.11

† Verstaen.

21

Ende van die tijt aen, als dat daghelijcx offer afgedaen, ende eenen grouwel der verwoestinghe daer gheset wort, zijn duysent, twee hondert, ende tnegentich daghen.

22

^* Wel den ghenen die daer verwacht, ende duysent, drie hondert ende vijfendertich dagen verreyct.

* Math. 10.c.22

23

Maer ghy Daniel, gaet henen, tot dattet eynde coemt, Ende rust, dat ghy opstaet in dijn deel aent eynde der daghen.

¶ Eynde des Propheets Daniel.