Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ Hier wordt van Christo ende den Euangelio te kennen ghegheuen, om dat onder de Heydenen ende Ioden te prediken, welcker hooft ende Coninck Christus is, ende de verstootinghe der Ioden wordt verhaelt, waer sy haer niet en beteren, ende de verkiesinghe der Heydenen in haerder plaetse.

1

⁺MAer dat getal der kinderen Israels sal zijn,^† ghelijck dat sant aender zee, datmen noch ghemeten, noch ghetellen en can.^* Ende het sal gheschieden, datmen in de plaetse, daermen tot haer gheseyt heeft: Ghy en zijt mijn volc niet, segghen sal: O ghy kinderen des leuenden Gods.

+ A vers 1

† Genes. 22.c.17

* Roma. 9.c.26

2

Want de kinderen Iuda, ende de kinderen Israels sullen te hoope comen,^† Ende sullen haer tsamen aen een hooft houden, Ende wt den Lande opwaerts trecken. Want den dach Iesreels sal eenen grooten dach zijn.

† Ezech. 37.c.19

3

Segt uwen Broederen, dat si mijn volck zijn, Ende tot uwer Susteren, dat si in ghenaden is.

4

^* Spreect dat oordeel ouer uwe moeder, dat si mijn wijf niet en is, Ende ick en wilse niet hebben. Beueelt haer, datse haer hoererije van haer wech doe. Ende haer ouerspeelderie van haren borsten,

* Ierem. 2.e.35.

5

Op dat icse niet naect wt en trecke, ende daer henen en sette,^† gelijck si was, doen si gheboren wert. Ende dat ickse niet en make, ghelijck een woestijne, ende ghelijc een dorre Lant, dat icse niet van dorst en late steruen,

† Ezech. 16.a.4

6

Ende haerder kinderen niet en ontferme. Wandt si zijn hoerenkinderen,

7

Ende hare moeder is een hoere. Ende diese ghedragen heeft, hout haer schandelijcken, Ende spreeckt: Ick wil mijne boelen nae loopen, die my gheuen broot, water, wolle, vlasch, olie, ende te drincken.

8

Daerom siet, ick wil uwen wech met doornen toe maken, ende eenen wandt daer voor trecken, dat si haren padt niet vinden en sal.

9

Ende als si hare boeleerders na loopt, dat si die niet grijpen, Ende als si die soect, niet gheuinden en can, Ende segghen moet:^* Ick wil wederom tot mijnen voorgaenden man gaen, daer my beter by was, dan my nv is.

* Luce. 15.c.18.

10

Want si en wil niet weten, dat ict sy, die haer gheeft coorn, most ende olie, ende haer veel siluers ende gouts ghegheuen

[p. 77v]

hebbe^* dat sy Baal ter eeren gebruyct hebben.

* Ezec. 16.b.17.

11

Daerom wil ick mijn coorn, ende mijnen most weder nemen tot zijnder tijt, Ende mijn wolle ende vlasch ontnemen, daer mede sy haer schamelheyt bedecten.

12

^+† Nu wil ic hare schande ontdecken voor den ooghen haerder boelen, Ende niemant en salse van mijnder hant verlossen.

+ B vers 12

† Iere. 13.d.26.

13

Ende ick wil daer een eynde af maken van alle haerder vruechden,^† Feesten, Nieumaenden, Sabbathen, ende alle hare vierdaghen.

† Deut. 16.c.10.

14

Ick wil hare wijnstocken ende vijchboomen verwoesten. Aenghesien dat sy seyt: Dat is mynen loon, dat my mijne boeleerders gheuen. Ick wil een wildernisse daer af maken, dattet de wilde beesten verslinden sullen.

15

Also wil ick besoecken ouer haer de daghen.^† Baalim, den welcken sy rueckwerck doet, ende verciert haer met voorhooftsbanden, ende halsbanden, ende loopt haren boelen nae, ende vergetet mijnder, spreect de HEERE.

† Iudic. 2.b.11. 10.b.10.

16

Daerom siet, ick wilse locken, ende wilse in eender woestijnen leyden, ende vriendelijcken met haer spreken.

17

Aldaer wil ick haer geuen hare wijnbergen wt de selue plaetse, Ende dat dal^† Achor om de Hope op te doen.^* Aldaer sal sy singhen ghelijc als ter tijt haerder ioncheyt^‡ doen sy wt Egypten Lant tooch

† Iosu. 7.d.26.

* Iudic. 5.a.1.

‡ Exod. 13.a.3.

18

Als dan, spreect de HEEre, sult ghy my noemen: Mijn man, ende my niet meer, mijn Baal heeten.

19

Want ick wil de namen der Baalim van haren monde wech doen, datmen der seluer namen niet meer gedencken en sal.

20

⁺ Ende ick wil hen ter seluer tijt, een verbondt maken, met den^† dieren op den velde, met den vogelen onder den Hemel, ende met den Wormen opter Aerden.^* Ende ick wil de boghen, swerden, ende orloghe vanden Lande in stucken breken, Ende wilse sonder sorghe laten woonen.

+ C vers 20

† Leui. 26.a.6.

* Esai. 2.a.4. Sach. 9.b.10.

21

Ick wil my aen v verlouen inder eewicheyt. Ick wil my aen v verlouen, in gerechticheyt ende gerichte, in genade ende bermherticheyt,

22

^† Ia in gelooue wil ick my aen v verlouen, Ende ghy sult den HEEre bekennen.

† Ezec. 16.b.6.

23

Ter seluer tijt spreect de HEEre, wil ick verhooren. Ick wil den Hemel verhooren, Ende den Hemel sal de Aerde verhooren.

24

Ende de Aerde sal dat coorn, den most, ende olie verhooren, Ende die selue sullen Iesreel verhooren.

25

Ende ick wil haer my op Aerden tot saet behouden, ende haerder ontfermen, die in ongenaden was, ende tot dien segghen,^* dwelc mijn volck niet en was: Ghy zijt mijn volck. Ende het sal segghen: Ghy zijt mijn Godt.

* Rom. 9.d.25.