Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ Een ander openbaringhe die den Propheet Daniel gheschiet is.

1

⁺INden derden iare des Conincx Cores wt Persen, wert den Daniel, diemen^† Beltsazer heet, wat geopenbaert, dat ghewisse is, ende van groote saken: Ende hy mercte daer op, ende verstont dat gesichte wel.

+ A vers 1

† Danie. 1.b.7. 2.d.26.

2

Ter seluer tijt was ick Daniel truerich drie weken lanc:

3

Ick en adt gheen lustighe spijse, vleesch ende Wijn en quam in mijnen monde niet, ende ick en salfde my oock noyt, tot dat de drie weken om waren.

4

Opten vierentwintichsten dach der eerster maent, was ick by dat groot water Hydekel,

5

Ende ick hief mijn oogen op, ende sach.^* Ende siet, daer stont een man in lijnwaet, Ende hadde eenen gulden gordel om zijn lendenen.

* Danie. 7.b.9. Apoca. 1.c.13.

6

Sijn lichaem was gelijc eenen Turkoys: Sijn aensicht sach als eenen blicxem: Sijn ooghen als een vierighe Fackel: Sijn armen ende^* voeten ghelijck als een gloeyendich metael, Ende zijn sprake, was ghelijck een groot gheruysch.

* Apoca. 1.c.15.

7

⁺Maer ic Daniel sach sulcken Visioen alleen,^† Ende de mannen die by my waren en sagens niet. Nochtans soo viel een groote veruaernisse op haer, also dat si vloden, ende verborgen haer.

+ B vers 7

† Dani. 3.e.90. Acto. 9.a.7.

8

Ende ick bleef alleen, ende sach dit groot ghesicht. Maer daer en bleef gheen cracht in my, ende ic wert seer onghestelt, ende en hadde gheen cracht meer.

9

Ende ick hoorde zijn sprake, ende dewijle, dat icse hoorde^* sanck ick neder op mijn aensicht ter Aerden.

* Danie. 8.c.18.

10

Ende siet, een hant roerde my aen, ende holp my op de knien ende op de handen,

11

Ende^† sprack tot my: Ghy lieue Daniel, merct op de woorden die ick met v spreke, Ende recht v op, Want ick ben nv tot v ghesonden. Ende doen hy sulcx met my sprac, soo rechtede ick my op, ende beefde.

† Danie. 9.d.21

12

Ende hy sprack tot my: En vreest niet Daniel, want vanden eersten dach aen, doen ghy van herten begheerde te verstaen, ende v castijde voor uwen Gode, zijn uwe woorden verhoort, ende ick ben om uwen wille ghecomen.

13

Maer de Vorst des Coninckrijcks in Persen Landt, heeft my eenentwintich daghen lanc^† wederstaen. Ende siet,^* Michael een vande principaelste Vorsten quam mi te hulpe. Doen behielt ick den strijt byden Coninck in Persen.

† 2.Tess. 2.a.4.

* Iosu. 5.d.14 Danie. 12.b.11

14

Maer nv come ick, om v te onderwijsen, hoe dattet dijnen volcke hier namaels gaen sal.^* Want dat ghesicht sal nae sommighe tijt gheschieden.

* Abac. 2.a.3.

15

⁺Ende als hy sulcks met my sprack, sloech ick mijn aensicht neder ter Aerden, ende sweech stille.

+ C vers 15

16

Ende siet, een ghelijck een mensche,^† roerde mijne lippen aen. Doen dede ick mijnen mont op, ende sprac, ende seyde tot den ghenen die voor my stont: Mijn Heere, mijn ledematen beuen my van dat ghesichte, ende ic en hebbe geen cracht meer.

† Esaie. 6.b.7. Ierem. 1.a.9.

17

Ende hoe can de knecht mijns Heeren met mijnen Heere spreken, Aenghesien dat daer gheen cracht meer in my en is, ende en hebbe oock gheenen adem meer?

18

Doen roerde my noch eens een aen, ghelijck een mensche ghestelt, ende stercte my, ende sprack:

19

En vreest v niet, ghy^† lieue man, vrede sy met v, ende zijt ghetroost: Sijt ghetroost. Ende als hy met my sprack, soo vermande ick my, ende sprac: Mijn Heere spreect, Want ghy hebt my ghesterct.

† Danie. 9.d.23

20

Ende hy sprac: Weet ghy ooc, waerom dat ick tot v ghecomen ben? Nv wil ick weder wech, ende met den Vorsten in Persen Lant strijden. Maer als ic wech trecke, Siet, soo sal de Vorst wt Griecken Lant comen,

21

Nochtans wil ick v te kennen gheuen, wat daer gheschreuen staet, dat ghewisselijck gheschieden sal. Ende daer en is niemandt, die my helpt teghen de ghene, dan alleen uwe^† Vorste Michael.

† Dani. 10.b.13. 12.b.11.

22

Want ick stont hem ooc by inden eersten Iare Darios des Mediers,

[p. 76r]

op dat ick hem holp, ende hem stercte. Ende nv wil ick v vertoonen, wat ghewisselijck gheschieden sal.