Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ De openbaringhe ende Prophecie van de tseuentich weken, welcke haer op de verlossinghe des volcx strecken, ende op de verlossinge die door Christum gheschiet is.

1

⁺INden eersten Iare Darius des soons Ahasueros,^* wt den Stamme der Meden, die ouer dat Conincrijc der Chaldeen Coninck wert:

+ A vers 1

* Dani. 6.a.1.

2

Inden seluen eersten Iare zijns Conincrijcx, mercte ic Daniel inde boecken, op dat ghetal der Iaren, daer de HEERE totten Propheet^† Ieremiam af gesproken hadde, Dat Ierusalem soude tseuentich Iaer woest ligghen.

† Iere. 25.b.11 29.b.10

3

Ende ick keerde my tot Godt den HEEre, te bidden ende te smeecken, met vasten, inden Sacke, ende inder Asschen.

4

Ende ick badt tot den HEEre mijnen Godt, biechtede, ende sprack:^* Ach lieue HEERE, ghy groote ende verschrickelijcke Godt, ghy die dat verbont ende ghenade hout, den ghenen die v lief hebben, ende uwe gheboden houden.

* 2.Esdre. 1.a.5 9.e.32.

5

^† Wy hebben gesondicht, onrecht ghedaen, zijn godloos gheweest, ende afuallich gheworden, Wy zijn van uwe gheboden ende Rechten afgheweken.

† Baruc. 1.d.15. Psa. 106.a.6. Iudit. 7.e.20. Tren. 3.d.42.

6

Wy en volchden dijnen knechten den Propheten niet, welcke in uwen Naem onse Coningen, Vorsten, Vooruaderen, ende alle den volcke inden lande predicten.

7

Ghy^† HEERE zijt rechtuaerdich, maer wy moeten ons schamen, ghelijck alst ooc nv heden sdaechs gaet, dien van Iuda, ende dien van Ierusalem, ende den gantschen Israel, beyde den genen die na by ende verre zijn, in alle Landen, derwaerts ghy ons verstooten hebt, om haerder misdaden wille, die si aen v bedreuen hebben.

† Treno. 1.d.18. Daniel. 3.a.27

8

Ia HEERE, Wy, onse Coningen, ende Vorsten, ende onse Vooruaders, moeten ons schamen, dat wy ons aen v besondicht hebben.

9

Maer O HEEre onse Godt, dijn is de barmherticheyt ende vergheuinghe.

10

Want wy zijn afuallich geworden, ende en volchden der stemmen der HEEren onses Godts niet, dat wy gewandelt hadden in sine Wet, De welcke hy ons voorleyde,^† door sine knechten de Propheten,

† 2.Petri. 1.d.21 Sach. 7.b.12.

11

Mer dat gantsche Israel^‡ ouertradt uwe Wet, ende weken af, dat sy uwer stemmen niet en volchden.^+* Daerom treft ons ooc den vloec ende eedt, die inder Wet Mosi des knechts Gods gheschreuen staet, om dat wy aen hem ghesondicht hebben.

‡ Esai. 24.a.5

+ B vers 11

* Deutro. 27. 28

12

^† Ende hy heeft sine woorden ghehouden, die hy ghesproken heeft, teghen ons, ende onse Richters, die ons richten souden, dat hy sulcken grooten ongheluc ouer ons heeft laten gaen, dat dies ghelijcx onder den gantschen Hemel niet geschiet en is, ghelijck ouer Ierusalem gheschiet is.

† Baruch. 2.a.1

13

^* Ghelijck alst gheschreuen staet inde Wet Mosi, also is alle dit groot ongheluck ouer ons ghecomen. Soo en baden wy oock voor den HEEre onsen Godt niet, dat wy ons vanden sonden bekeerden, ende uwe waerheyt voornamen.

* Deut. 28.b.15

14

Daerom en heeft de HEERE oock niet vertoeft met dit ongheluck, ende heuet ouer ons laten gaen. Want de HEERE onse Godt is rechtuaerdich, in alle sine wercken die hy doet, Wandt wy en volchden zijnder stemmen niet.

15

^+* Ende nv O HEERE onse Godt, ghy die v volck wt Egipten Lande gheleyt hebt, met stercker hant, Ende ghi hebt v eenen Naem ghemaeckt, als hy nv is, Wy hebben ymmers gesondicht, ende zijn eylacen godloos gheweest.

+ C vers 15

* Baruc. 2.b.11.

16

Ach HEERE, om alle dijns gerechticheyts wille, laet af van dijnen toorne ende gramschappe ouer dijne stadt Ierusalem, ende dijnen heylighen Berch. Want om onser sonden wille, ende om onser Vooruaders misdaden wille, draecht Ierusalem ende v volck versmaetheydt, by allen die daer rontsom zijn.

17

Ende nv O onse Godt, hoort dat gebet dijns knechts, ende zijn smeecken, ende siet ghenadich aen dijn Heylichdom dat verstoort is, om des HEEren wille,

18

Neycht dijn ooren mijn God, ende hoort, doet dijne ooghen op, ende siet, hoe dat wy verdestrueert zijn, ende de stadt, die nae dijnen Naem genoemt is. Want wy ligghen voor v met onse ghebet, niet op onse gerechticheydt, Maer op dijne groote barmherticheyt.

19

Och HEERE hoort, Och HEERE weest ghenadich. Och HEERE aenmerckt ende doeghet, Ende en vertrectet niet om dijns selfs wille, O mijn Godt, want dijn stadt ende dijn volck is nae dijnen Naem ghenoemt.

20

⁺Als ick noch alsoo sprack ende badt, ende mijne, ende mijns volcx Israels sonden

+ D vers 20

[p. 75v]

bekende, ende lach met mijn ghebet voor den HEEre mijnen Godt, om des heylighen Berchs wille mijns Godts,

21

Effen doen ick noch also in mijn ghebet sprack,^† so vlooch de Man Gabriel toe, welcke ick te voren ghesien hadde inden ghesichte, ende hy taste my aen, ontrent den tijt des Auonts offers.

† Deut. 7.c.16. 8.c.16.

22

^* Ende hy onderwees my, ende sprack met my,^† ende seyde: O Daniel, nv ben ick wtghesonden v te onderwijsen,

* Dani. 7.c.16.

† Dan. 10.b.11

23

Wandt soo haest als ghy begonst te bidden, so ghinck dat beuel wt, Ende daerom come ick, dat ict v vercondighen soude,^* Want ghy zijt lief ende weert, Soo merct nv daer op, dat ghy dat ghesichte verstaen moghet.

* Danie. 10.c.19

24

Tseuentich weken zijn gheordineert ouer dijn volck, ende ouer dijne heylige stadt, Soo sal dat ouertreden ghekeert, ende de sonde toegheseghelt, Ende de misdaet versoent, ende de eewighe gherechticheyt ghebracht, ende de Visioenen ende Prophecien toeghesegelt, ende de Alderheylichste ghesalft worden.

25

Daerom weet nv, ende merckt,^* van die tijt aen, als dat beuel wt gaet, dat Ierusalem wederom sal ghetimmert worden.⁺ Tot op Christum den^† Vorst zijn seuen weken, ende tweentsestich weken, Soo sullen de straten ende mueren weder getimmert worden, hoe wel in commerlijcker tijt.

* 2.Pa. 36.d.23. 1.Esd. 1.a.2.

+ E vers 25

† Esaie. 9.b.5.

26

Ende nae de tweentsestich weken,^† sal Christus wtgheroeyt worden, Ende niet meer zijn.^* Ende een volck des Vorsten sal comen, ende de stadt, ende dat Heylichdom verdestrueren, dattet een eynde nemen sal, als door eenen vloet. Ende totten eynde des Crijchs toe salt woest blijuen.

† Mat. 27.d.27

* Ioan. 11.e.48

27

Maer hy sal velen dat verbont stercken, een weke lanck. Ende midden inde weke sal dat Offer ende Spijsoffer ophouden. Ende by den Vlueghelen sullen staen grouwelen der verwoestinghen.^* Ende het is besloten dattet totten eynde toe ouer de verwoestinghe druypen sal.

* Mat. 24.b.15 Mar. 13.b.14