Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ De Coninck Darius stelt Danielem eenen Heere ende voorweser zijns gantschen Rijcx, Dwelcke hem dandere Heeren misgonnen, ende vermaken hem by den Coninck, dat hy geuanghen ende inder Leeuwen Cuyle gheworpen werdt, Nochtans van Godt onghequest behoet wort.

1

⁺ENde^† Darius wt Meden nam dat Rijck in, doen hy tweentsestich Iaer out was. Ende het docht Dario goet, dat hy ouer dat gantsche Conincrijc settede hondert ende twintich Lantvoochden.

+ A vers 1

† Iere. 50.a.2. Dani. 9.a.1.

2

Ouer dese settede hy drie Vorsten (de eene was Daniel) den welcken de Lantvoochden souden rekeninghe doen, op dat de Coninck der moeyten verlaren ware.

3

Maer Daniel ginck de Vorsten ende Lantvoochden alle te bouen, Want daer was eenen hoogheren gheest in hem. Daerom dacht de Coninck hem ouer dat gantsche Coninckrijck te setten.

4

Daeromme poochden de Vorsten ende Lantvoochden daer nae, hoe sy een sake aen Daniel mochten vinden, die teghen dat Conincrijck ware. Maer sy en conden gheen sake, noch misdaet gheuinden. Want hy was ghetrouwe, datmen gheen schult noch misdaet aen hem gheuinden en conde.

5

Doen spraken de mannen: Wy en sullen gheen sake op Daniel vinden, behaluen ouer zijnen Godsdienst.

6

⁺Doen quamen de Vorsten ende Lantvoochden met hoopen voor den Coninc, ende seyden tot hem also: Heer Coninck Darius Godt verleene v een lanck leuen.

+ B vers 6

7

De Vorsten des Coninckrijcx, de Heeren, de Lantvoochden, de Raedtsheeren, ende Hooftlieden alle, hebben^† bedacht, datmen een Conincklijck beuel sal laten wtgaen, ende een streng ghebot ordineren, dat, Soo wie binnen dertich daghen yet^* bidden sal, van eenighen Gode, oft Mensche, behaluen van v Coninck alleene, die sal totten Leeuwen inden Cuyle gheworpen worden.

† Besloten oft opgheset.

* Begeeren.

8

Daerom lieue Coninck, ghy sult alsulcken ghebot beuestighen, ende v^† onderschrijuen, op dattet niet weder verandert en worde, nae dat recht der Meden ende Persen, dat welcke nie-mant ouertreden en derf,

† Onderteeckenen.

9

Alsoo onderschreef hem de Coninck Darius.

10

Als nv Daniel vernam, dat sulcken gebot onderteeckent was,^* soo ghinck hy henen op in zijn huys, (Maer hy hadde in zijn Somerhuys, opene vensteren tegen Ierusalem)^* Ende hy knielde des daechs driemael op zijne knien, badt, loefde ende danckte zijnen Godt, ghelijckerwijs hy voormaels te doen plach.

* Matt. 6.a.6.

* Psa. 119.x.165

11

⁺Doen quamen dese Mannen met hoopen, ende vonden Daniel biddende, ende smeeckende voor zijnen Godt

+ C vers 11

12

^† Ende sy traden henen toe, ende sy spraecken met den Coninck van dat Conincklijcke ghebodt. Heer Coninck en hebt ghy niet een ghebodt onderteeckent, dat, Soo wie binnen dertich daghen yet bidden soude, van eenighen Gode oft Mensche, behaluen van v Coninck alleen, dat die selue soude tot den Leeuwen inden Cuyle gheworpen worden? De Coninck antwoorde, ende sprack: Het is waer. Ende dat recht der Meden ende Persen en sal niemandt ouertreden.

† Dani. 3.b.10.

13

Sy antwoorden ende spraken voor den Coninck: Daniel der gheuanghenen een wt Iuda, dien en acht noch v, noch v ghebot, dat ghy onderteeckent hebt, Want hy biddet des daechs driemael.

14

Doen de Coninck sulcx hoorde, wert hy seer bedroeft, ende dede groote neersticheyt dat hy Daniel verlossen soude, ende bemoeyde hem daer ouer tot dat de Sonne onder ghinck, op dat hy hem beschermen soude.

15

Maer de Mannen quamen met hoopen tot den Coninck, ende spraken tot hem: Ghy weet Heer Coninck, dattet der Meden ende Persen recht is, dat een yegelijck ghebot ende beuel, dat de Coninck besloten heeft, onuerandert zal blijuen.

16

Doen beual de Coninck datmen Daniel soude vort brenghen,^† ende worpen hem tot de Leeuwen in den Cuyl. Maer de Coninck sprack tot Daniel: V Godt, dien ghy sonder ophouden dient, die helpe v.

† Histo. vanden draeck. b.9

17

⁺Ende sy brachten eenen steen, dien leyden sy voor der dueren aenden Cuyl, dien besegelde de Coninck met zijnen eyghenen rinck, ende met den rinck zijnder geweldigen, op dat niemant anders aen Daniel moetwille en soude ghebruycken.

+ D vers 17

18

Ende de Coninck ghinck wech op zijn Palleys, ende en at niet, Ende en liet gheen eten voor hem brenghen, Ende en conde oock niet gheslapen.

19

Des morghens vroech doent dach wert, stont de Coninck op, ende ghinck haestelijck totter Cuylen, daer de Leeuwen waren.

20

Ende als hy by den Cuyl quam, riep hy Daniel met droeuigher stemmen. Ende de Coninck sprack tot Daniel: Daniel ghy knecht des leuendighen Gods, heeft v oock uwe Godt, die ghy sonder ophouden dient, wel moghen vanden Leeuwen beschermen?

21

Ende Daniel sprack met den Coninc: Heer Coninck: Godt verleene v een lanck leuen,

22

^* Mijn Godt heeft zijnen

* Actu. 12.c.11.

[p. 74r]

Engel ghesonden^† die den Leeuwen de kelen toegebonden heeft, also, dat sy my niet misdaen en hebben. Want voor hem ben ick onschuldich gheuonden, Desghelijcx en hebbe ick ooc tegen v, Heer Coninc, niet misdaen.

† 1.Re. 17.e.34 1.Mac. 2.f.60 Iudi. 13.c.20. Hebr. 11.f.33.

23

⁺Doen wert de Coninck seer blijde, ende hiet Daniel weder wt dien Cuyl trecken. Ende sy togen Daniel wt den Cuyl, Ende men en spuerde gheen letsel aen hem. Want hy hadde zijnen Godt betrout.

+ E vers 23

24

^* Doen dede de Coninck de mannen, die Daniel beclaecht hadden, voortbrenghen ende totten^† Leeuwen inde Cuylen werpen, met hare kinderen ende Wijuen. Ende eer sy beneden opter Aerden quamen grepense de leeuwen, ende vermaelden oock hare ghebeenten.

* Histo. vanden draeck c.21.

† 1.Hest. 7.b.10. Psal. 7.b.16. Eccle. 10.a.4. Susan. g.62.

25

^* Doen liet de Coninc Darius allen volcken, Natien ende tonghen schrijuen: Godt gheue v lieden veel vreedts.

* Dan. 3.f.94 4.a.1.

26

Dat sy mijn beuel, datmen inde gantsche heerschappie mijns Conincx den Godt Daniels, vreesen, ende ontsien sal. Want hy is de leuendighe Godt, die inder eewicheyt blijft,^* Ende zijn Conincrijck is onuerganckelijc, Ende zijn heerschappie en heeft gheen eynde.

* Esai. 9.b.6.

27

Hy is een verlosser ende Noothelper^* Ende hy doet teeckenen ende wonderlijcheden, beyde inden Hemel ende opter Aerden. Die heeft den Daniel vanden Leeuwen verlost.

* 2.Hest. 6.c.19

28

Ende Daniel was geweldich int Conincrijcke Darios,^* Ende oock int Conincrijck Cores der Persen.

* Bel. 1.a.1.