Den Bibel, Inhoudende dat Oude ende Nieuwe Testament (Biestkensbijbel)

¶ Dat .iij. Capittel.

¶ De Coninck laet een mandament wt gaen, dat een yeghelijc dat steenen beelt eeren soude, dat hy opgherecht had. Ende als drie Ionghers dat niet doen en wouden, so werden si in eenen gloeyenden ouen gheworpen, ende van Godt verlost.

1

⁺DE Coninck NebucadNezar dede een gulden beelt maken, tsestich ellen hooge, ende ses ellen breet, Ende lietet setten inden lande te Babel, op een schoone woonstede.

+ A vers 1

2

Ende de Coninc NebucadNezar seynde nae de Vorsten, Heeren, Lantplegeren, Richteren, Voochden, Raetsheeren, Officieren, ende alle gheweldighe inden Lande, dat si tsamen comen souden, om dat beelt te wijen,

3

Dwelcke de Coninck NebucadNezar hadde laten setten. Doen quamen de Vorsten, Heeren, Landtpleghers, Richters, Voochden, Raetsheeren, Officieren, ende alle gheweldighe inden Lande te samen, om dat beelt te wijen, dwelcke de Coninc NebucadNezar hadde laten setten. Ende si moesten tegen dat Beelt ouer gaen staen, dat NebucadNezar hadde laten setten.

4

Ende de^† Heraut riep ouer luyt: Dat laet v gheseyt zijn ghi volcken,^* Lieden, ende tonghen.

† Wtroeper.

* Natien.

5

Wanneer ghy hooren sult dat geluyt der Basuynen, Trompetten, Herpen, Vedelen, Psalter, Luyten, ende alderley Musijckspel, Soo sult ghy neder vallen, ende dat gulden beelt aenbeden, Dwelc de Coninck NebucadNezar heeft laten setten.

6

^+† Maer soo wie als dan niet neder en valt, ende aenbiddet, Die sal van stonden aen inden gloeyenden ouen gheworpen worden.

+ B vers 6

† Sap. 14.c.16.

7

Doen si nv hoorden dat geluyt der Basuynen, Trompetten, Herpen, Vedelen, Psalters, ende alderley Musijcspel, doen vielen alle volcken, lieden, ende tongen, ter neder, Ende aenbaden dat gulden Beeldt, dat de Coninc NebucadNezar hadde laten setten.

8

Van stonden aen traden sommighe Chaldeeusche mannen toe, ende beclaechden de Ioden,

9

Begonnen, ende spraken totten Coninc NebucadNezar: Heer Coninck, God verleene v een lanc leuen.

10

^† Ghy hebt een gebot laten wtgaen, dat alle menscen, als si hooren sullen dat geluyt der Basuynen, Trompetten, Herpen, Vedelen, Psalters, Luyten, ende alderley Musijckspel, dat si dan souden neder vallen, ende dat gulden beelt aenbeden.

† Danie. 6.c.12

11

Maer soo wie niet neder en viele, ende aenbade, Die soude in eenen gloeyenden ouen gheworpen worden.

12

^† Nv zijn daer Iootsche mannen, welcke ghy ouer de Voochden inden lande tot Babel gheset hebt, Sadrach, Mesach, ende AbedNego, die selue verachten dijn ghebodt,^† Ende en eeren dijne goden niet, ende en bidden dat gulden beelt niet aen, dat ghi hebt laten setten.

† Dani. 2.g.49

† Baru. 6.a.4.

13

⁺Doen beual NebucadNezar met gramschap ende toorne, datmen Sadrach, Mesach, ende AbedNego, voor hem brengen soude, Ende de mannen werden voor den Coninck ghebracht.

+ C vers 13

14

Doen began NebucadNezar, ende sprack tot haer: Hoe? Wilt ghy Sadrach, Mesach, ende AbedNego, mijnen God niet eeren? Ende dat gulden beelt niet aenbeden, dat ick hebbe laten setten?

15

Wel aen, schickt v daer toe, soo haest als ghy hooren sult dat geluyt der Basuynen, Trompetten, Herpen, Vedelen, Psalters, Luyten, ende alderley

[p. 72r]

Musijcspel, soo valt neder, ende bidt dat beelt aen, dat ick hebbe laten maken, In dien ghijt niet aen en bidt, Soo sult ghy van stonden aen inden gloeyenden ouen gheworpen worden. Laet sien, wie de Godt sy, die v lieden wt mijnder handt verlossen sal.

16

Doen begonsten Sadrach, Mesach, ende AbedNego, ende spraken totten Coninck NebucadNezar: Ten is niet van nooden, dat wy v daer op antwoorden.

17

Siet, Onse Godt, die wy eeren,^† can ons wel verlossen wt den gloeyenden ouen, Daer toe oock van uwer hant wel verlossen.

† Nu. 16.g.47.

18

Ende in dien hijt niet doen en wil,^* so sult ghy nochtans weten, dat wy uwe goden niet eeren, noch dat gulden beelt, dat ghy hebt laten setten, niet aenbidden en willen.

* Baruc. 6.a.4

19

^+† Doen wert NebucadNezar vol gramschappen, ende stelde zijn aensicht seer fellijcken op Sadrach, Mesach ende AbedNego, Ende beual, datmen den ouen seuenmael heeter soude maken, danmen anders te doen plach.

+ D vers 19

† 2.Mac. 7.f.39

20

Ende beual den alderbesten crijchslieden, die in zijn Heyr waren, dat si Sadrach, Mesach, ende AbedNego binden, ende inden gloeyenden ouen worpen souden.

21

Alsoo werden dese Mannen in hare mantelen, schoenen, hoeden, ende andere cleederen, gebonden, ende inden gloeyenden ouen gheworpen,

22

Wandt men moest des Conincx ghebodt sonder vertoeuen volbrenghen. Ende men stoocte dat vier inden ouen so seer,^* dat de mannen, die Sadrach Mesach, ende AbedNego, verbernen souden, vande vlamme des viers verdoruen.

* Psal. 7.b.16. 1.Hest. 7.b.10 Dani. 6.e.24

23

Maer^† de drie mannen, Sadrach, Mesach, ende AbedNego, vielen af inden gloeyenden ouen, ghelijck als si ghebonden waren.

¶ Van dit .23. veersken tot het naestuolgende .89. suldy vinden int leste van Apocrypha, ende is Tgebet Asarie, ende den Lofsanck der drie Mannen int vier.

† Esa. 43.a.2. Psal. 66.b.12

89

Doen ontsettede hem de Coninck NebucadNezar, ende stont terstont op, ende sprack tot sine Raetsheeren:⁺ En hebben wy niet drie mannen gebonden int vier laten worpen? Sy antwoorden, ende spraken totten Coninck: Ia Heer Coninck.

+ E vers 89

90

Hy antwoorde, ende sprac: Ick sie nochtans vier mannen los inden viere gaen, Ende si zijn onghequetst,^† Ende de vierde is, ghelijck oft een soon der Goden ware.

† Acto. 9.a.7. Dan. 10.b.7.

91

Ende NebucadNezar trat toe, voor dat hol des gloeyenden ouens, ende sprack: Sadrach, Mesach, ende AbedNego, ghy knechten Gods des Alderhoochsten, gaet wt ende coemt herwaerts. Doen gingen Sadrach, Mesach, ende AbedNego wt, wt den viere.

92

Ende de Vorsten, Heeren, Voochden, ende Raetsheeren des Conincx quamen te samen,^† ende sagen, dat dat vier gheen macht aen de lichamen deser Mannen bewesen en hadde, dat ooc dat haer hayr op hare hoofden niet ghesengt, ende hare mantelen niet verseert en waren, Ia men en conde gheenen brant aen haer gheriecken.

† Hebr. 11.f.34.

93

⁺Doen began NebucadNezar, ende sprac: Ghelooft moet zijn de Godt Sadrachs, Mesachs, ende AbedNegos, die sinen Enghel wtghesonden, ende sine knechten verlost heeft, die hem betrout, Ende des Conincx ghebodt niet gehouden, maer hare lichamen daer voor gegeuen hebben, dat si geenen Godt eeren, noch aenbidden en wouden, dan haren God alleen.

+ F vers 93

94

^† Daeromme sy nv dit mijn gebot: So wie onder alle volcken, lieden ende tongen, den God Sadrachs, Mesachs ende AbedNegos lastert, die sal vergaen, ende zijn huys schandelijcken verstoort worden, wandt daer en is gheen ander God, die also beschermen can, als dese.

† Danie. 6.e.25

95

Ende de Coninc gaf Sadrach, Mesach, ende AbedNego groote macht inden Lande te Babel.