Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlvj. Capittel.

1

⁺ALsoo spreect de HEERE HEERE: De poorte aenden binnensten voorhof Oostwaerts, sal de ses werckdaghen ouer, toe ghesloten zijn, Maer opten Sabbaths dach ende inde Nieumaenden salmense opdoen.

+ A vers 1

2

Ende de Vorst sal buyten onder dat poortael der poorten treden, ende buyten by de Posten vander poorten blijuen staen. Ende de Priesters sullen zijn Brantoffer ende Dancoffer offeren, Maer hy sal opten dorpel der poorten aenbidden, Ende daer nae weder wtgaen, Maer de poorte sal open blijuen totten Auont toe.

3

Desghelijcx dat volck inden lande, sullen inder dueren der seluer poorten aenbidden voor den HEERE, op de Sabbathen ende Nieumaenden.

4

Maer dat Brandtoffer dat de Vorst voor den HEERE offeren sal opten Sabbaths dach, sal zijn ses Lammeren die sonder ghebreck zijn, Ende eenen Ramme sonder ghebreck,

5

Ende een Epha Spijsoffers tot elcken Ramme, tot een Spijsoffer: Maer tot de Lammeren, soo veel als zijn hant gheeft, tot het Spijsoffer, Ende een Hin Olie tot elcken Epha.

6

Maer op de Nieumaenden sal hy eenen Ionghen Osse offeren, die sonder gebreck sy, ende ses Lammeren, ende eenen Ramme, oock sonder ghebreck:

7

Ende een Epha tot elcken Osse, Ende een Epha tot elcken Ramme, tot het Spijsoffer: Maer totten Lammeren, so veel als zijn hant vermach, Ende een Hin Olie, tot elcken Epha.

8

⁺Ende als de Vorst daer in gaet, so sal hy door dat portael vander poorten ingaen, Ende door den seluen wech, weder wtgaen.

+ B vers 8

9

Maer dat volc inden lande, dat voor den HEERE coemt, op de hooge Feesten, ende ter poorten teghent Noorden ingaet, om aen te bidden, dat sal door de Suydtpoorte weder wtgaen. Ende de gene die ter Suydtpoorten ingaen, die sullen ter Noordtpoorten weder wtgaen. Ende sy en sullen niet weder ter poorten wtgaen, daer si door inghegaen zijn, Maer stracx voorwaerts wtgaen,

10

Ende de Vorst sal met haer beyde in ende wtgaen.

11

Maer op de vierdaghen ende hooghe Feesten, salmen tot het Spijsoffer tot elcken Osse een Epha, Ende tot elcken Ramme, een Epha offeren, Ende tot den Lammeren, soo veel als zijn hant geeft, Ende een Hin Olie tot elcken Epha.

12

Maer als de Vorst een vrywillich Brantoffer oft Danckoffer den HEEre doen wil, Soo salmen hem de Oostpoorte op doen, dat hy zijn Brandtoffer ende Danckoffer offere, ghelijck als hijt opten Sabbath plach te offeren. Ende als hy weder wt gaet, Soo salmen de poorte achter hem toe sluyten.

13

⁺Ende hy sal den HEERE dagelijcx een Brantoffer doen, te weten, een iarich Lam, sonder ghebreck, dat selue sal hy alle morghen offeren.

+ C vers 13

14

Ende sal alle morghen dat seste deel van eenen Epha tot een Spijsoffer daer op legghen, Ende een derdendeel van een Hin Olie, op dat^† Semelmeel druypen, den HEERE tot een Spijsoffer. Dat sal een eewich recht zijn, van dat daghelijcx Offer.

† Tarwen bloemen.

15

Ende also sullen si dat Lam, met dat Spijsoffer, ende Olie alle morgen offeren, tot een daghelijcx Brantoffer.

16

Also spreect de HEERE HEERE: Als de Vorst eenen van sinen sonen een gheschencke gheeft, van zijn erfgoet, Dat selue sal sinen sonen blijuen, ende sullent erflijck besitten.

17

Maer indien hy van sinen knechten yemanden yet van zijn erfgoet schenct, Dat sullen si besitten totten^* Vry Iare toe, Ende sal als dan weder aenden Vorste vallen. Want zijn deel sal alleen op zijn sonen eruen.

* Leui. 25.b.10. Num. 36.a.4

18

^† Ooc en sal de Vorste den volcke niet nemen van haer erfdeel, Noch haer wt haren eyghen goeden stooten: Maer hy sal zijn eyghen goet op sine kinderen eruen, op dat niet yemant mijns volcx van zijn eyghendom verstroyt en worde.

† 3.Reg. 21.a.1. 2.Reg. 9.b.7.

19

⁺Ende hy bracht my onder den inganck, aen de zijde der poorten tegent Noorden, tot de Cameren des Heylichdoms, die den Priesters toebehoorden, Ende siet, aldaer was een ruymte in eenen hoeck Westwaerts.

+ D vers 19

20

Ende hy seyde tot my: Dit is de plaetse daer de Priesters dat Schultoffer, ende Sondoffer coken sullen, ende dat Spijsoffer backen, Also dat si dat niet en behoeuen wt inden binnensten voorhof te draghen, om dat volck te heylighen.

[p. 69v]

21

Daer na bracht hy my wt inden buytensten voorhof, ende hiet my gaen, inde vier hoecken des voorhofs. Ende siet, daer was in elcken vanden vier hoecken des voorhofs,

22

Een ander voorhofken, te roocken, veertich ellen lanck ende dertich ellen breet, alle vier eenderley mate:

23

Ende daer ghinck een muerken, rontom eenen yegelijcken van viere, Daer waren heerdsteden aen rontom onder aender mueren ghemaect.

24

Ende hy sprack tot my: Dit is de kuecken waer in dat de dienaers inden huyse, coken sullen, soo wat het volck offert.