Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlvij. Capittel.

1

⁺ENde hi bracht mi weder totter duere des Tempels, Ende siet, Daer vliete een water wt onder den dorpel des Tempels, teghent Oosten, Want de duere des Tempels was oock tegent Oosten. Ende dat water liep aen de rechte zijde des Tempels, neffens den Altaer henen, nae Tzuyden.

+ A vers 1

2

Ende hy bracht my buyten aen de Noortpoorte, van de buytenste Oostpoorte,^† Ende siet, dat water spranc daer wt van de rechter zijde.

† Sach. 13.a.1. 14.b.8.

3

Ende de man ghinck wt tegent Oosten,^* ende hadde dat meetsnoer inder hant, Ende hy mat duysent ellen. Ende hy bracht my door dat water, tot dattet my aen de enckelen ghinck.

* Apoca. 22.a.1. Ezech. 40.a.5 Sach. 2.a.1. Apoca. 11.a.1. 21.c.15.

4

Ende hy mat noch eens duysent [ellen] Ende bracht my doort water, tot dattet my aen de knien ghinc.

5

Ende mat noch eens duysent [ellen] Ende hy liet my daer door gaen, tot dattet my aen de lendenen ghinc. Doen mat hy noch duysent [ellen] ende het wert soo diepe, dat ickt niet meer ghegronden en conde, Wandt dat water was te hooch, datmen daer ouer swemmen moeste, ende en condet niet gronden.

6

Ende hy sprack tot my: Du menschen kint, Dat hebt ghy ymmer gesien.⁺ Ende hy bracht my weder te rugghe, aenden Oeuer der beken,

+ B vers 6

7

^† Ende siet, daer stonden gantsch veel boomen, aenden Oeuer op beyde zijden.

† Apoca. 22.a.1.

8

Ende hy sprack tot my: Dit water, dat daer teghent Oosten wt vliet, sal door dat blacke velt inder zee loopen, Ende van de een zee in dandere. Ende alst in de zee coemt, soo sullen de selue wateren gesont worden,

9

Ia alle tgene dat daer in leeft, ende sweuet, daer dese stroomen henen comen, dat sal leuen, Ende het sal gansch veel visschen hebben. Ende alle dinck sal ghesont worden ende leuen, soo waer dat desen stroom henen coemt.

10

Ende de^† visschers sullen aen de selue staen, van Engeddi aen, tot EnEglaim toe salmen dat vischgaren wtspannen. Wandt seer veel visschen sullen aldaer zijn, ghelijck als in een groot Meyr.

† Mat. 4.b.19. Marc. 1.b.17. Iere. 16.c.16.

11

Maer de moerassen ende poelen daer neffens, en sullen niet ghesont worden, maer sout blijuen.

12

⁺Ende aen den seluen stroome aen den Oeuer op beyde zijden,^† sullen alderley vruchtbare boomen wassen, ende hare bladeren en sullen niet verwelcken, noch hare vruchten verrotten, ende sullen alle maenden nieuwe vruchten brengen: Want hare water vloeyt wt dat Heylichdom. Hare vrucht sal ter spijse dienen, ende hare bladeren tot Medecine.

+ C vers 12

† Psalm. 1.a.3. Apoca. 22.a.2. Ierem. 17.b.8

13

Alsoo spreeckt de HEEre HEEre: Dit zijn de Lantpalen, waer na ghy dat lant wt deylen sult, den twaelf stammen Israels.^* Wandt twee deelen behooren den stamme Iosephs.

* Gene. 48.a.1.

14

Ende ghy sultet ghelijck wt deylen, den eenen als den anderen.^† Want ick hebbe mijn hant op gheheuen, dat Lant uwen vooruaderen, ende v lieden tot een erfdeel te gheuen.

† Gene. 22.c.16

15

Dit is nv de pale des landts Noortwaerts, van de groote zee aen, van Hethlon, tot Sedad toe, te weten,

16

Hemath, Berotha, Sibraim, die met Damasco ende Hemath palen, ende Hazar Tichon, die met Haueran paelt, Dat sal de pale zijn vander zee aen, tot HazarEnon toe.

17

Ende Damascus ende Hemath, sullen de eynden zijn Noordtwaerts.

18

Maer de palen Oostwaerts, sult ghy meten tusschen Haueran ende Damascon, Ende tusschen Gilead, ende tusschen den Lande Israel, van de Iordaen af, tot de zee teghent Oosten toe, dat sal de pale Oostwaerts zijn.

19

⁺Maer de pale Suytwaerts, is van Thamar, tot aent^* kijfwater, tot Kades toe, Ende teghen dwater aen de groote zee, dat sal de pale Suytwaerts zijn.

+ D vers 19

* Exod. 17.b.7. Num. 20.b.13

20

Ende de pale Westwaerts is van dat groot meyr aen, stracx tot Hemath toe, dat sy de pale Westwaerts.

21

^* Alsoo sult ghy dat Landt wtdeylen, onder de stammen Israels.

* Num. 33.f.54

22

Ende als ghy dat lot worpt, dat Landt onder v te deylen,^† Soo sult ghy de vreemdelingen die by v woonen, ende kinderen onder v winnen, houden, ghelijck als de^* Lantbesitters onder de kinderen Israels.

† Leui. 19.g.34 Deut. 10.d.19

* Landtsaten.

23

Ende si sullen oock haer deel aenden Lande hebben, een yegelijcke onder dien stamme daer hy by woont, spreeckt de HEERE HEERE.