Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlv. Capittel.

1

⁺VVanneer ghy nv dat Landt doort lot wt deylt,^* So sult ghy een Hefoffer van den lande af scheyden, dat den HEEre heylich zijn sal, vijfentwintich duysent [roeden] lanck, ende thien duysent breet. Dese^† plaetse sal heylich zijn, soo wijdt als sy reyct.

+ A vers 1

* Ezec. 48.b.9.

† Pleyne.

2

Ende van dese sullen tot dat Heylichdom comen, elcke reyse vijf hondert [roeden] int viercant, Ende daer toe een vrye ruymte rontsom vijftich ellen.

3

Ende op de selue plaetse, die vijfentwintich duysent [roeden] lanck, ende thien duysent breet is, sal dat Heylichdom staen, ende dat Alderheylichste.

4

Maer dat ouerschot vanden gheheylichden lande, sal den Priesteren toebehooren, die in dat Heylichdom dienen, Ende voor den HEEre treden om hem te dienen, op dat sy ruymte tot huysen hebben, ende sal ooc heylich zijn.

5

Maer de Leuiten die voor dat huys dienen, sullen oock vijfentwintich duysent [roeden] lanck, ende thien duysent breet hebben, tot haren deel, tot twintich Cameren.

6

Ende der stadt sult ghy ooc een plaetse laten, voor dat gantsche huys Israels, vijf duysent [roeden] breedt, ende vijfentwintich duysent lanck, neffens de afghedeylde plaetse des Heylichdoms.

7

^* Maer den Vorsten sult ghy een plaetse gheuen, op beyde syden, tusschen de plaetse der Priesteren, ende tusschen de plaetse der stadt, teghen het Westen, ende teghen het Oosten. Ende sullen beyde teghent Oosten ende tegent Westen, effen lanck zijn.

* Ezec. 48.d.22

8

Dat sal zijn eyghen deel zijn in Israel, op dat mijne Vorsten niet meer mijnen volcke dat hare en nemen, Maer sullen dat landt den huyse Israels laten, voor hare stammen.

9

⁺Want also spreect de HEEre HEEre: Ghy hebt langhe ghenoech euen veel dies gemaect, ghy Vorsten Israels. Laet af van onrecht ende ghewelt, Ende doet dat recht, ende goet is, Ende neemt wech van mijnen volcke uwe^† aenschrijuen, spreect de HEEre HEEre.

+ B vers 9

† Schattinghe.

10

^† Ghy sult een recht ghewicht, ende een recht Schepel, ende een rechte mate hebben.

† Leui. 19.g.36. Deut. 25.c.15. Pro. 20.b.10.

11

Epha, ende Bath sullen ghelijck zijn, alsoo dat een Bath dat thiende deel van een Homer houde, Ende dat Epha oock dat thiende deel van een Homer. Want na den Homer salmense alle beyde meten.

12

^* Ende een Sekel sal twintich Gera hebben. Ende een Mina maect twintich Sekel, vijfentwintich Sekel, ende vijfthien Sekel.

* Exod. 30.b.13. Leui. 27.d.25. Num. 3.g.47

13

Dat sal nv dat Hefoffer zijn, dat ghy Heffen sult, te weten, dat seste deel van een Epha, van een Homer Tarwen, Ende dat seste deel van een Epha, van een Homer ghersten.

14

Ende van Olie sult ghy gheuen een Bath, te weten, elcken thienden Bath van een Cor, Ende den thienden van een Homer. Wandt thien Bath maken een Homer.

15

Ende een Lam van elcke tweehondert schapen, wt der Cudde op de weyde Israels, tot een Spijsoffer, ende Brantoffer, ende Danckoffer, tot eender versoeninghe voor haer, spreeckt de HEERE HEERE.

16

Alle dat volc inden Lande sal sulcken Hefoffer tot den Vorsten in Israel brenghen.

17

Ende de Vorst sal zijnen Brantoffer, Spijsoffer, ende Drancoffer offeren, op de Feesten, Nieumaenden ende Sabbathen, Ende op alle hooge Feesten des huys Israels, Daer en bouen Sondoffer, ende Spijsoffer, Brandtoffer, ende Danckoffer doen, tot een versoeninghe des huys Israels.

18

⁺Also seyt de HEEre HEEre: Opten eersten dach der eerster maent, sult ghy

+ C vers 18

[p. 69r]

nemen eenen Ionghen Osse, die sonder ghebreck sy, ende dat Heylichdom ontsondighen.

19

Ende de Priester sal van dat bloet des Sondoffers nemen, ende de Posten aent huys daer mede besprenghen, Ende de vier hoecken des afsetsels aen den Altaer, met de Posten aen der poorten des binnensten voorhofs.

20

Alsoo sult ghy ooc doen opten seuenden dach der maent,^† oft hem yemant onwetende vergrepen hadde, op dat ghy dat huys ontsondicht.

† Nu. 15.c.24.

21

^* Opten veerthienden dach der eerster maent, sult ghy dat Passah houden, Ende seuen daghen vieren, ende onghesuert broot eten.

* Exod. 12.a.3. Leuit. 23.a.5. Deut. 16.a.2.

22

Ende opten seluen dach sal de Vorst voor hem seluen, ende voor al tvolc inden lande eenen Osse tot eenen Sondofer offeren.

23

Maer inde seuen daghen des Feests sal hy den HEERE daghelijcks eenen Brandtoffer doen, seuen Ossen, ende seuen Rammen, die sonder ghebreck zijn, Ende eenen geyten bock tot elcken Sondoffer.

24

Maer tot een Spijsoffer sal hy een Epha tot elcken Osse, ende een Epha tot elcken Ramme offeren, Ende een Hin Olie tot elcken Epha.

25

Opten vijfthienden dach der seuender maent, sal hy seuen dagen achter een vieren, ghelijck als de andere seuen daghen, ende euen alsoo houden, met dat Sondoffer, Brantoffer, Spijsoffer, tsamen met de Olie.