Den Bibel, Inhoudende dat Oude ende Nieuwe Testament (Biestkensbijbel)

¶ Dat .xliiij. Capittel.

1

⁺ENde hy bracht my wederom totter poorten des buytensten Heylichdoms Oostwaerts. Ende die was toeghesloten.

+ A vers 1

2

Ende de HEEre sprack tot my: Dese poorte sal toeghesloten blijuen, ende niet opghedaen worden. Ende niemandt en sal daer door gaen, dan alleen de HEEre de Godt Israels sal daer door gaen, ende sal toeghesloten blijuen,

3

Nochtans den Vorst wtghenomen. Want de Vorst sal daer onder sitten, op dat hy broot ete voor den HEERE. Door dat portael, sal hy ingaen, Ende door dat selue weder wtgaen.

4

Daer na bracht hy my aender poorten int Noorden voor dat huys. Ende ick sach,^† Ende siet, des HEEren huys wert vol der heerlijcheyt des HEEren, ende ick viel op mijn aensicht.

† Exo. 24.d.16. 40.e.34. Num. 9.c.15. 3.Reg. 8.b.10. 2.Par. 7.a.2.

5

Ende de HEEre sprac tot my: Du menscen kint, Merct wel daer op, ende siet, ende hoort neerstelijck, op al tghene dat ick v seggen wil, van alle Seden ende Wetten, inden huyse des HEEren, ende merct ooc wel hoemen ingaen sal, ende op alle wtgan-ghen des Heylichdoms.

6

Ende segt den onghehoorsamen huyse Israels: Also spreect de HEEre HEEre: Ghy makes te vele, ghy vanden huyse Israels, met alle uwe grouwelen.

7

Wandt ghy brengt vreemde lieden, van een onbesneden herte ende onbesneden vleessche in mijn Heylichdom, waer door dat ghy mijn huys ontheylicht.

8

⁺Als ghy mijn broot, vette, ende bloed offert. Ende breect also mijn verbont, met alle uwe grouwelen, Ende ghy en hout de seden mijns Heylichdoms niet, Maer ghy maect v seluen nieuwe seden, in mijn Heylichdom.

+ B vers 8

9

Daerom spreect de HEEre HEEre alsoo: Daer en sal gheen vreemde, van een onbesneden herte, ende onbesneden vleesche, in mijn Heylichdom comen, van alle vreemdelinghen die onder de kinderen Israels zijn,

10

Ia oock niet de Leuiten, die van my gheweken, Ende met Israel van my dolende ghegaen zijn nae haren Afgoden, Daerom sullen sy hare sonden draghen.

11

Maer sy sullen in mijn Heylichdom dienen, aenden officien, inde poorten des huys, ende den huyse dienen. Ende sullen slechs dat Brandtoffer, ende ander offer dattet volck brengt, slaen, Ende voor de Priesters staen, op dat sy haer dienen.

12

Daerom dat sy de ghene voor hare Afgoden gedient, ende den huyse Israels een erghernisse ter sonden gegheuen hebben. Daerom hebbe ick mijn handt ouer haer wtghestrect, spreect de HEERE HEERE, dat sy hare sonden moeten draghen.

13

Ende sy en sullen my niet ghenaken, om Priesterofficie te bedienen noch tot eenich mijn Heylichdom comen tot dat Alderheylichste, Maer sy sullen hare schande draghen, ende hare grouwelen, die sy ghedaen hebben.

14

Daerom heb ickse tot Wachters ghemaect, aen allen dienste des huys, ende tot al tghene, datmen daer in doen sal.

15

⁺Maer de Priesters wt de Leuiten, de kinderen^† Sadok, die de seden mijns Heylichdoms ghehouden hebben, doen de kinderen Israels van my af vielen, die sullen voor my treden ende my dienen, ende voor my staen, op dat sy my dat vette ende bloet offeren, spreect de HEEre HEERE.

+ C vers 15

† Ezec. 43.d.19. 48.b.11.

16

Ende sy sullen ingaen, in mijn Heylichdom, Ende voor mijn Tafel treden, om my te dienen, Ende mijne seden te houden.

17

Ende als sy door de poorten des binnensten voorhofs gaen willen, soo sullen sy lijnen cleederen aen te trecken, ende gheen wollen aen hebben, dewijle sy inde poorten inden binnensten voorhof dienen.

18

Ende sullen lijnen chieragien op haer hooft hebben, Ende lijnen nedercleederen om hare lendenen, Ende sy en sullen haer niet in tsweet gorden.

19

Ende als sy wt den buytensten voorhof totten volcke wt gaen, dan sullen sy de cleederen daer sy in ghedient hebben, wt trecken, Ende de selue inde Camer des

[p. 68v]

Heylichdoms legghen, Ende andere cleederen weder aen trecken, ende dat volck niet heylighen in haer eyghen cleederen.

20

^* Haer hooft en sullen sy niet sceren, Ende en sullen ooc de hayren niet lanc laten wassen, maer sullen de hayren rontom laten corten.^+† Ende daer en sal ooc geen Priester wijn drincken, als sy inden binnensten voorhof dienen sullen.

* Leui. 19.f.27. 21.a.5.

+ D vers 20

† Leui. 10.c.9.

21

^* Ende sy en sullen gheen Weduwen, noch verstootene, te houwelijck nemen, maer Maechden vanden sade des huys Israels,

* Leuit. 21.a.7. Hose. 1.a.2. 3.a.1.

22

Oft eens Priesters achterghelaten Weduwe.

23

Ende^† sy sullen mijn volck leeren, dat sy weten onderscheyt te houden tusschen dat heylighe ende onheylighe, ende tusschen dat reyne ende onreyne.

† Deut. 17.c.14

24

Ende als daer een sake voor haer coemt, Soo sullen sy staen, ende rechten, ende na mijne rechten spreken, ende mijne gheboden ende seden houden, ende alle mijne Feesten houden, ende mijne Sabbathen heylighen.

25

^* Ende sy en sullen tot geenen dooden gaen, ende haer veronreynighen. Maer alleen tot Vader ende Moeder, sone oft dochter, broeder oft suster, die noch gheenen Man ghehat en hebben, ouer dien moghen sy haer veronreynigen.

* Leui. 21.a.1. Num. 6.b.6.

26

Ende na zijnder reyninge salmen hem tellen seuen dagen.

27

Ende als hi weder in tot dat Heylichdom, inden binnensten voorhof gaet, op dat hy int Heylichdom diene, So sal hy zijn Sondoffer offeren, spreect de HEEre HEEre.

28

^† Maer dat erfdeel dat sy hebben sullen, dat wil ick selfs zijn, Daerom en sult ghy haer gheen eyghen landt gheuen in Israel. Want ick ben haer erfdeel.

† Deut. 18.a.2. Num. 18.c.20. Iosue. 13.b.14

29

Sy sullen haer neringhe hebben, van dat Spijsoffer, Sondoffer, ende Schuldoffer, Ende al dat verbannen in Israel, sal haer zijn.

30

Ende alle eerste vruchten, ende eerstgheboren van alle Hefofferen, sullen der Hriesteren zijn. Ghy sult oock den Priesteren de eerstelinghen gheuen, van al tghene datmen etet, op dat de segheninghe in uwen huyse blijue.

31

^* Maer so wat een aes, oft verschuert is, het sy van voghelen, oft dieren, dat en sullen de Priesters niet eten.

* Exod. 22.d.31. Leui. 22.c.8.