Den Bibel, Inhoudende dat Oude ende Nieuwe Testament (Biestkensbijbel)

¶ Dat .xliij. Capittel.

1

⁺ENde hy bracht my weder aender Oostpoorte.

+ A vers 1

2

Ende siet, de heerlijckheyt des Godts Israels quam vanden Oosten, ende bruysde ghelijck als een groot water bruyst. Ende het wert gantsch licht opter Aerden van zijnder heerlijcheyt.

3

^† Ende het was effen gelijck dat ghesichte, dat ick ghesien hadde aen dat^‡ water Chebar, doen ick quam, dat de stadt soude verdestrueert worden. Doen viel ick neder op mijn aensicht.

† Ezec. 9. 10. 11.

‡ Ezech. 1.a.3.

4

^† Ende de heerlijcheyt des HEEren quam in totten huyse door de Oostpoorte.^*

† Ezech. 10.c.18. 11.d.23.

* Ezech. 8.a.3. 11.a.1.d.24.

5

Doen nam my eenen wint op, ende bracht my inden binnensten voorhof. Ende siet, de heerlijcheyt des HEEren veruulde dat huys.

6

Ende ick hoorde eenen met my spreken van binnen wt den huyse, ende een man stont neffens my,

7

Die sprack tot my: Du menschen kint,^* Dat is de plaetse mijns throons, ende de stede mijnder voetsolen, daer op ick eewelijck woonen wil, onder de kinderen Israels.⁺ Ende dat huys Israels en sal mijnen heylighen Naem niet meer veronreynighen, noch sy, noch hare Coninghen, door de hoererije, ende door de^† Lijcken haerder Coninghen in hare hoochten,

* Esaie. 6.a.1. 66.a.1. Ierem. 3.b.12. Apoc. 21.a.3.

+ B vers 7

† Doode lichamen.

8

De welcke hare dorpels aen mijne dorpels, ende haer stijlen aen mijne stijlen gheset hebben, Also oock dat daer maer eenen wandt tusscen my ende haer en was. Ende hebben also mijnen heylighen Naem ontsuyuert door hare grouwelen die sy deden. Waerom dat ickse oock in mijnen thoorne verteert hebbe.

9

Maer nv sullen sy hare hoererye, ende de Lijcken haerder Coninghen verre van my wech doen, ende ick wil eewelijck onder haer woonen.

10

^* Ende du menschen kint, Wijset den huyse Israels den Tempel, op dat si haer haerder misdaet schamen, ende laetse daer een ghelijcke monster af nemen.

* Sach. 1.a.4.

11

Ende als sy nv alle haers doens haer schamen, soo wijst haer de ghedaente ende dat monster des huys, ende zijnen wtganc ende inganck, ende alle zijne wijsen, ende alle zijne seden, ende alle zijne wijsen, ende alle zijne Wetten. Ende schrijuet haer voor, op dat sy alle zijne wijsen, ende alle zijne gheboden houden, Ende daer na doen.

12

Ende dat sal de Wet des huys zijn. Op de hoochte des Berchs, so wijdt alst hem omuanghen heeft, sal dat Alderheylichste zijn, dat is de Wet des huys.

13

⁺Maer dit is de mate des Altaers, na der ellen, De welcke een hant breet langer is dan een ghemeyn elle. Sijnen voet is een elle hooch, ende een elle breet, Ende den Altaer opwaerts tot aen den randt, dat is een spanne breet rontsom. Ende dat is zijn hoochte.

+ C vers 13

14

Ende vanden voet aen opter Aerden tot aen dat onderste^† afsetsel, zijn twee ellen hooch, ende een elle breet. Maer van dat selue cleyn afsetsel, tot aen dat grootste afsetsel, zijnt vier ellen hooch, ende een elle breet.

† Vertreck.

15

^† Ende de Hariel vier ellen hooch, ende vanden Ariel opwaerts vier hoornen.

† Exod. 27.a.1.

16

Ende de Ariel was twelf ellen lanc, ende twelf ellen breet int viercant.

17

Ende dat bouenste afsetsel was veerthien ellen lanck, ende veerthien ellen breet int viercant. Ende daer ghinc eenen rant ouer al rontsom, een half elle breet.⁺ Ende zijnen voet was een elle hoog, Ende zijn trappen waren Oostwaerts.

+ D vers 17

18

Ende hy sprack tot my: Du menschen kint, Alsoo spreect de HEEre HEEre:

[p. 68r]

Dit sullen de seden des Altaers zijn, opten dach als hy gemaect is, datmen Brantoffer daer op legghe, Ende dat bloet daer op sprenge.

19

Ende den Priesteren, van Leui, wt den sade^† Sadok, die voor my treden, dat sy my dienen spreect de HEEre HEEre, sult ghy gheuen eenen Ionghen Osse, tot eenen Sondoffer.

† Ezec. 44.c.15 48.b.11.

20

Ende van des seluen bloet sult ghy nemen, ende zijne vier hoornen daermede besprengen, Ende de vier hoecken aen dat bouenste afsetsel, ende rontsom de lijsten daer sult ghijt mede ontsondighen ende versoenen.

21

Ende^* ghy sult den Osse des Sondoffers nemen, ende hem verbranden, op een bysonder plaetse inden huyse, die daer toe gheordineert is, buyten dat Heylichdom.

* Leui. 16.f.27.

22

⁺Maer tsanderdaechs sult ghy eenen gheyten bock offeren, die sonder ghebrec sy tot eenen Sondoffer, Ende den Altaer daermede ontsondighen, gelijck alst met den Osse ontsondicht is.

+ E vers 22

23

Ende^† als dat ontsondighen volbracht is, soo sult ghy eenen Ionghen Osse offeren, die sonder ghebreck sy, Ende eenen Ramme vander Cudde, sonder ghebreck,

† Leui. 22.c.20.

24

Ende ghy sult die beyde voor den HEERE offeren, Ende de Priesters sullen daer^† sout op stroyen, Ende sullense also den HEEre offeren, tot eenen Brantoffer.

† Leuit. 2.d.13.

25

Also sult ghy seuen dagen achter een, daghelijcx eenen Bock tot eenen Sondoffer offeren. Ende sy sullen eenen Ionghen Osse, ende eenen Ramme vander Cudde, die alle beyde sonder gebreck zijn offeren.

26

Ende sy sullen alsoo seuen daghen lanck den Altaer versoenen, ende hem reynighen, ende zijne handen vullen.

27

Ende na de seuen daghen, sullen de Priesters opten achsten dach, ende daer na voort aen, op den Altaer offeren, uwe Brandtofferen, ende uwe Danckofferen. Also wil ick uwer ghenadich zijn, spreect de HEEre HEEre.