Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlj. Capittel.

1

⁺ENde hy bracht my inden Tempel, ende mat de Pilaernen aen de Wanden, die waren op elcke syde ses ellen wijt, soo wijt als dat gantsche huys was.

+ A vers 1

2

Ende de duere was thien ellen wijt. Maer de wanden aen beyde sijden vander dueren, was elck vijf ellen breet. Ende hy mat de ruymte inden Tempel, die hadde veertich ellen inde lengde, Ende twintich ellen inde breyde.

3

Ende hy ghinck daer binnen in, ende mat de duere twee ellen, Ende de duere hadde ses ellen, Ende de wijde der dueren seuen ellen.

4

Ende hy mat twintich ellen inde lengde, Ende twintich ellen in de breyde, aenden Tempel. Ende hy sprack tot my: Dit is dat Alderheylichste.

5

Ende hy mat de wandt des huys ses ellen hooch, Daer op waren ghanghen ouer al rontsom, ghedeylt in Cameren, die waren ouer al vier ellen wijt.

6

⁺Ende der seluer Cameren waren op elcke sijde dryeendertich, deen aen dandere. Ende daer stonden Pilaernen onder by de wanden aen dat huys ouer al rontsom, diese droeghen.

+ B vers 6

7

Ende bouen dese waren noch meer ghanghen rontsom.

8

Ende bouen waren de ghanghen wijder, alsoo datmen vanden ondersten inden middelsten, ende vanden middelsten inden ouersten ghinc. Ende elck stont ses ellen bouen den anderen.

9

Ende de wijdde der bouenster ganghen, was vijf ellen. Ende de Pilaernen droeghen de ghanghen aenden huyse.

10

Ende het was altijt vanden eenen Want aent huys, tot den anderen, twintich ellen.

11

Ende daer waren twee dueren aen de wendelsteenen opwaerts, Deen teghent Noorden, Dander teghent Suyden, Ende den wendelsteen was vijf ellen wijt.

12

Ende de muer teghent Westen was vijfentseuentich ellen breet, ende tneghentich ellen lanck.

13

⁺Ende hy mat de lengde des huys, die hadde doorgaende hondert ellen, de muer, ende al wat daer aen was.

+ C vers 13

14

Ende de wijde voor aenden huyse tegent Oosten, met dat ghene dat daer aen stont, was oock hondert ellen.

15

Ende hy mat de lengde der timmeragien, met alle tghene dat daer aen stont, vanden eenen hoeck totten anderen, dat was op elcke sijde hondert ellen,

16

Metten binnensten Tempel, ende portalen inden voorhoue, met de dueren, vensteren, hoecken, ende de drie gangen, ende dat schrijnwerck ouer al rontsom.

17

Ende hy mat oock, hoe hooch dattet vander Aerden totten vensteren was, Ende hoe breet dat de vensteren zijn souden. Ende mat vander poorten aen, tot dat Alderheylichste toe, binnen ende buyten rontsom.

18

Ende aen dat gantsche huys rontsom van onder op tot bouen toe, aen de dueren, ende aen de wanden,

19

⁺Waren Cherubim ende Palmloofwerck onder de Cherubim ghemaect. Ende elcke Cherub hadde twee Coppen,

+ D vers 19

20

Op^* deen sijde als eens menschen Cop, Op dander sijde als eens Leeuwen Cop.

* Ezech. 1.b.10.

21

Ende de duere inden Tempel was viercant, Ende alle dinck was aerdich in malcanderen gheuoecht.

22

Ende den^† houten Altaer was drie ellen hooch, ende twee ellen lanck ende breet. Ende zijne hoecken, ende alle zijn sijden waren houten. Ende hy sprack tot my: Dat is de Tafel, die voor den HEEre staen sal.

† Exod. 25.c.23.

23

Ende de duere beyde aenden Tempel, ende dat Alderheylichste, hadde twee^† vloghelen, diemen op ende toe dede.

† Bladeren of voudoren.

24

Ende elck doorblat hadde noch twee bladers, diemen ouer een sloech altijdt twee ende twee op beyde sijden.

25

Ende daer waren ooc Cherubim, ende Palmloofwerck aen, ghelijck als aen de Wanden. Ende daer waren stercke grendelen voor, teghen dat portael.

26

Ende daer waren enge vensteren, Ende veel Palmloofwercx rontsom, aent portael, ende aen de wanden.