Den Bibel, Inhoudende dat Oude ende Nieuwe Testament (Biestkensbijbel)

¶ Dat .xl. Capittel.

¶ Van desen veertichsten Capittel totten eynde toe, wordt den Propheet in een Visioen vertoont, hoe de stadt Ierusalem, ende den Tempel weder ghetimmert, ende dat lant weder gheoeffent sal worden, ende alsoo wort met lieflijcke woorden, ende dinghen de schoonheyt ende chieraet der kercken Christi, ende oock de salicheyt ende weluaert der gheloouighen in Christo beschreuen ende ontworpen.

1

⁺INden vijfentwintichsten Iare onser gheuanckenissen, inden beghinne des iaers, opten thienden dach der maent, Dat is dat veerthiende iaer, na dien dat de stadt gheslaghen was. Effen opten seluen dach,^† quam des HEEren hant ouer my,

+ A vers 1

† Ezech. 1.a.3.

2

Ende^* voerde my aldaer henen door godlijcke ghesichten, te weten, int Lant Israels.^‡ Ende stelde my op eenen seer hooghen Berch, Daer wast op, ghelijck als een ghetimmerde stadt, vant Suyden herwaerts.

* Ezech. 8.a.3. 11.d.24.

‡ Apo. 21.b.10.

3

Ende doen hy my aldaer henen ghebracht hadde, Siet, doen was daer een Man, wiens ghedaente was, als Metael, die hadde een lijnen snoer, ende een meetroede in zijnder hant, ende stont onder de poorte.

4

Ende hy sprac tot my: Du menschen kint, Siet, ende hoort neerstelijcken toe, ende merct daer iuyst op, wat ick v toonen wil. Want daerom zijt ghy herwaerts ghebracht, dat ick v sulcx wijse, op dat ghy sulcx alle, wat ghy hier siet den huyse Israels vercondicht.

5

Ende siet, daer ghinc eenen muere buyten aenden huyse rontsom,^* Ende de man hadde de meetroede in zijn hant, die was ses ellen lanck. Een yeghelijcke elle was een hant breet langher, dan een gemeyn elle. Ende hy mat de timmeragie in de breyde, een roede, ende inde hoochte, oock een roede lanck.

* Apoc. 11.a.1. 21.c.15. Sacha. 2.a.1.

6

⁺Ende hy quam aende poorte, die tegent Oosten lach, ende ghinck henen op, op hare trappen, ende mat de^† Posten aender poorten, elcken Post eender roeden breet.

+ B vers 6

† Oft dorpelen.

7

Ende de Cameren, die op beyde sijden, neffens der poorten waren, mat hy oock, na der lengde, eender roeden, ende na der breyde eender roeden, ende de ruymte tusschen de Cameren was vijf ellen wijdt.

8

Ende hy mat oock de stijlen aen de poorte, byden^† portale van binnen aen de poorte een roede lanck.

† Voorhuyse.

9

Ende hy mat dat portael aender poorten, van binnen een roede wijt, ende mat dat portael aender poorten, acht ellen, ende zijne^† Pilaernen twee ellen wijdt.

† Ondersettinghen.

[p. 66v]

Maer dat portael stont binnen der poorten.

10

Ende der Cameren waren op elcke sijde drye, aender poorten teghent Oosten, deen soo wijt als dandere. Ende op beyde sijden stonden Pilaernen, die waren ghelijcke groot.

11

Daer na mat hi de wijdde der dueren inder poorten, namelijck, thien ellen, ende de lengde der poorten, derthien ellen.

12

Ende voor aen de Cameren waren ruymten op beyde sijden, elcke eender ellen breet. Maer de Cameren waren, elcke ses ellen wijt, op beyde sijden.

13

Daer en bouen mat hy de poorte, vant dack der Cameren, tot dat dack toe der poorten, dat waren vijfentwintich ellen. Ende de een duere stont tegen de andere.

14

Hy maecte oock Pilaernen, tsestich ellen hooch, ende voor een yeghelijcke Pilaerne, eenen voorhof aender poorten rontsom.

15

Ende tot aen dat portael aen de binnenste poorte, daermen henen in gaet, waren vijftich ellen.

16

Ende daer waren enghe vensterkens aen de Cameren ende Pilaernen inwaerts, aen de poorte rontsom. Also waren oock vensterkens inwendich aen de portalen rontsom. Ende aen de Pilaernen rontsom, was Palmloofwerck.

17

Ende hy bracht my voorder aenden buytensten voorhof, ende siet, daer waren Cameren, ende een plaueysel gemaect voor den voorhof rontsom, ende dertich Cameren op dat plaueysel.

18

Ende dat hoochste plaueysel aen de poorten, was so lanck, als de poorten waren, aent nederste plaueysel.

19

⁺Ende hy mat de breyde der onderster poorten, voor den binnensten voorhof wtwendich, namelijck, hondert ellen, beyde tegent Oosten ende Noorden.

+ C vers 19

20

Also mat hy ooc de poorte, die Noordwaerts lach, aenden buytensten voorhof na de lengde ende breydde.

21

Die hadde oock op elcke sijde drye Cameren. Ende hadde oock hare Pilaernen, ende portalen, effen so groot, als aende voorghenoemde poorte, vijftich ellen inder lengde, vijfentwintich ellen inde breyde.

22

Ende hadde oock hare vensteren, ende hare portalen, ende hare Palmloofwerck, ghelijck als de poorte teghent Oosten. Ende hadde seuen trappen, daermen henen op ghinc ende hadde hare portalen daer voor.

23

Ende het was de poorte aenden binnensten voorhof, teghen de poorte, die teghent Noorden ende Oosten stont. Ende mat hondert ellen vander eender poorte totter anderder.

24

Daer na bracht hy my oock teghent Suyden. Ende siet, daer was oock een poorte teghent Suyden.⁺ Ende hy mat hare Pilaernen ende portalen, ghelijck als de andere.

+ D vers 24

25

Die hadden oock vensteren ende portalen rontsom, ghelijc als ghene vensteren, vijftich ellen lanck, ende vijfentwintich ellen breet.

26

Ende daer waren oock seuen trappen opwaerts, ende een portael daer voor. Ende Palmloofwerck aen hare Pilaernen, op elcke sijde.

27

Ende hy mat oock de poorte aenden binnensten voorhof, teghent Suyden, te weten, hondert ellen, vander eender Suydpoorte totter anderder.

28

Ende hy bracht my voorder door de Suydpoorte, inden binnensten voorhof, ende mat de selue poorte teghent Suyden, effen so groot als de andere,

29

Met hare Cameren, Pilaernen ende portalen, ende met vensteren ende voorhouen daer aen, euen soo groot als ghene, rontsom vijftich ellen lanck, ende vijfentwintich ellen breet.

30

Ende daer ghinc een portael rontsom, vijfentwintich ellen lanc, ende vijf ellen breet.

31

Dat selue stont voor aen teghen den buytensten voorhof. Ende hadde oock Palmloofwerck aen de Pilaernen. Maer daer waren acht trappen op te gaen.

32

⁺Daer na bracht hy my aen de binnenste poorte, teghent Oosten. Ende mat de selue effen soo groot, als de andere,

+ E vers 32

33

Met hare Cameren, Pilaernen ende portalen, ende hare vensteren ende portalen rontsom, effen so groot, als de ander, vijftich ellen lanc, ende vijfentwintich ellen breet.

34

Ende hadde oock een portael, teghen den buytensten voorhof, ende Palmloofwerck op de Pilaernen, op beyde sijden, ende acht trappen opwaerts.

35

Daer na bracht hy my aen de poorte teghent Noorden, die mat hy effen soo groot als de ander,

36

Met hare Cameren, Pilaernen ende portalen, ende hare vensteren ende portalen rontsom, vijftich ellen lanck, ende vijfentwintich ellen breet.

37

Ende hadde ooc een portael teghen den buytensten voorhof, Ende Palmloofwerc aen de Pilaernen, op beyde sijden, ende acht trappen opwaerts.

38

Ende beneden aen de Pilaernen aen elcke poorte, was een Camer, met eender duere, daermen den Brantoffer in dede.

39

Maer in dat portael voor der poorten stonden op elcke sijde twee Tafelen, waer op men de Brantofferen, Sondofferen ende Schuldofferen slaen soude.

40

Ende buytenwaerts ter sijden, daermen op gaet ter Noordpoorte, daer stonden ooc twee Tafelen, ende aender anderder sijden onder dat portael der poorten, ooc twee Tafelen.

41

Alsoo stonden op elcke sijde voor der poorten, vier Tafelen. Dat zijn acht Tafelen tsamen, daermen op sloech.

42

Ende de vier Tafelen totten Brandtoffer ghemaect, waren van ghehouwen steenen, elcke anderhalf elle lanc ende breet, ende een elle hooch, Daermen op leyde alderley ghereetschap, daermen de Brantofferen ende ander offeren mede sloech.

43

Ende daer ghingen Lijsten rontsom, inwaerts gebogen, een hant breet hooch. Ende op de Tafelen soudemen dat offervleesch legghen.

44

Ende buyten voor de binnenste poorte, waren Cameren voor de Sanghers, inden binnensten voorhof. Deen aen de sijde neffens der poorten teghent Noorden, die sach Suydwaerts: Dander ter

[p. 67r]

sijden teghent Oosten, die sach Noordwaerts.

45

⁺Ende hy sprack tot my: De Camer teghent Suyden, behoort den Priesteren toe, die int huys dienen sullen.

+ F vers 45

46

Maer de Camer teghent Noorden, hoort den Priesters toe, die opten Altaer dienen.^† Dit zijn de kinderen Sadok, die alleen vanden kinderen Leui, voor den HEEre treden sullen, hem te dienen.

† 1.Par. 25.a.3. 3.Reg. 2.f.35.

47

Ende hy mat de^† Pleyne inden huyse, te weten, hondert ellen lanck, Ende hondert ellen breet, int viercant. Ende den Altaer stondt effen voor aen, voor den Tempel.

† Plaetse.

48

Ende hy bracht my henen int portael des Tempels, Ende mat dat portael, vijf ellen op elcke sijde, ende de poorte drie ellen wijt, op elcke sijde.

49

Maer dat portael was twintich ellen lanck, ende elf ellen wijdt, Ende hadde trappen daermen opwaerts ghinc. Ende daer stonden Columnen beneden aen de^† Pilaernen, op elcke sijde een.

† Ondersettinghen.