Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxix. Capittel.

¶ Hoe ancxstelijck dat der voorghenoemder volck ende vianden Godts straffinghe zijn sal.

1

⁺ENde du menschen kint, propheteert teghen^* Gog, ende spreect: Also seyt de HEEre HEEre: Siet, ick wil aen v Gog, ghy die ouerste Vorst zijt in Mesech ende Thubal, Siet,

+ A vers 1

* Ezech. 38.a.3.

2

Ick wil v omwenden ende locken, ende wt de eynden van Noorden brenghen, ende op de berghen Israels laten comen.

3

Ende ick wil v den boghe wt dijnder slincker handt slaen, ende dijne pijlen wt dijnder rechter handt werpen.

4

Op de berghen Israels suldy neder gheleyt worden, ghy met alle dijnen heyre, ende met den volcke dat by v is. Ick wil v den voghelen, soo werwaerts dat sy vlieghen, ende den dieren opten velde, te verslinden gheuen.

5

Ghy sult opten velde ter neder ligghen, Wandt ick de HEERE HEEre hebt ghesproken.

6

⁺Ende ick wil vyer werpen op^† Magog, ende op den ghenen, die inde Eylanden seker woonen, Ende sullent weten, dat ick de HEERE ben.

+ B vers 6

† Apoc. 20.c.8.

7

Wandt ick wil mijnen heylighen Name bekent maken, onder mijnen volcke Israels, Ende ick en wil mijnen heylighen Name niet langer laten scheynden. Maer de Heydenen sullen onderuinden, dat ick de HEEre ben, de heylighe in Israel.

8

Siet, Het is alreede gecomen ende gheschiet, spreect de HEEre HEEre: Dat is den dach, daer ick af ghesproken hebbe.

9

Ende de Borgers inde steden Israels sullen wt gaen, ende vyer maken, ende verbernen, de wapenen, schilden, tartsen, boghen, pijlen, vuyststanghen, ende langhe spiessen. Ende sullen seuen Iaer lanc vyerwerc daer mede houden,

10

Dat sy geen hout en doruen halen opten velde, noch int woudt houwen, maer van de wapenen sullen sy vyer houden. Ende sullen de ghene beroouen, vanden welcken sy berooft zijn, ende plonderen de ghene, van dien sy geplondert zijn spreect de HEEre HEEre.

11

⁺Ende het sal tot dier tijt gheschieden, dat ick Gog wil een plaetse gheuen, ter begraeffenisse in Israel, te weten, dat dal daermen gaet aen de See tegent Oosten. Also dat de gene, die daer voor by gaen, haer daer voor schouwen sullen, dewijle datmen aldaer Gog met zijnen hoopen begrauen heeft, Ende sal heeten Gogs hoopendal.

+ C vers 11

12

Maer dat huys Israels salse begrauen seuen Maenden lanck, op dat dat Lant ghereynich worde.

[p. 66r]

13

Ia alle dat volck inden lande sal aen haer te begrauen hebben, Ende sullen eenen prijs daer af hebben, dat ick op dien dach mijne heerlijckheyt bewesen hebbe, spreect de HEEre HEEre.

14

Ende sy sullen lieden wt scheyden, die ghestadelijck inden lande rontsom gaen, Ende metten seluen de doodenbegrauers, om te begrauen de ouerghebleuen opten lande, op dattet ghereynicht worde.

15

Na seuen maenden sullen sy daer nae ondersoecken. Ende de ghene die inden lande rontsom gaen, ende erghens eens menschen been sien, sullen sy een Teecken daer by oprichten,

16

Op dattet de doodengrauers oock in Gogs hoopendal begrauen. Daerom sal oock de stadt heeten:^† Hamona. Alsoo sullen sy dat Lant reynighen.

† Een menichte oft grooten hoop.

17

Nv, du menschen kint, Also spreect de HEEre HEEre:^* Segt allen vogelen, werwaerts sy vliegen, ende allen dieren opten Velde:⁺ Verghadert v, ende coemt herwaerts,^† Hoopt v ouer al te samen, tot mijnen slachoffer die ick v slae, Eenen grooten slachoffer op de Berghen Israels, Ende sloct vleesch, ende suypt bloet.

* Apo. 19.b.17

+ D vers 17

† Soph. 1.b.7.

18

Dat vleesch der stercken sult ghy verslinden, ende dat bloet der Vorsten op Aerden, sult ghy suypen, der Rammen, der Hamelen, der Bocken, der Ossen, die altemael vet ende wel ghemest zijn.

19

Ende ghy sult dat vette slocken, dat ghy sat wort, Ende dat bloet suypen, dat ghy droncken wordt, vanden slachoffer, dien ick v slae.

20

Versaet v nv ouer mijn Tafel, van Peerden, van Ruyteren, van stercken, ende alderley Crijchslieden spreect de HEEre HEEre.

21

Ende ick wil mijn heerlijcheyt onder de Heydenen brenghen, dat alle Heydenen sien sullen, mijn oordeel, dat ick heb laten gaen, Ende mijn hant, die ic aen haer gheslegen hebbe,

22

Ende dat also dat huys Israels beuinde, dat ick de HEEre hare Godt ben, van dien dach aen, ende voort aen.

23

Ende oock alle Heydenen beuinden, hoe dat huys Israels om zijnder misdaets wille wech sy gheuoert, Ende om dat sy haer aen my besondicht hadden.⁺ Daerom hebbe ick mijn aensicht voor haer verborghen, ende hebse ouer ghegheuen inde handen haerder Vianden, dat sy altemael doort sweert vallen moesten.

+ E vers 23

24

Ick hebbe haer ghedaen gelijck als hare sonden ende ouertredinghen verdient hebben, Ende hebbe also mijn aensicht voor haer verborghen.

25

Daerom spreect de HEEre HEEre alsoo: Nv wil ick de gheuanckenisse Iacobs weynden, ende des gantschen huys Israels ontfermen, Ende om mijnen heylighen Naem ijueren.

26

Maer sy sullen hare versmaetheyt, ende alle hare sonden daer sy haer aen my mede besondicht hebben, draghen, als sy slechts sonder sorghe in haren Lande woonen moghen, datse niemandt en verschricke.

27

Ende ickse slechts weder vanden volcken gebracht, ende wt de landen haerder Vianden vergadert hebbe, Ende ick in haer ghehey-licht gheworden ben, voor de ooghen veler Heydenen.

28

Alsoo sullen sy beuinden, dat ick de HEEre hare Godt ben, ick diese heb onder de Heydenen laten wech voeren, Ende wederom in haer lant laten vergaderen, Ende niet eenen van haer daer ghelaten en hebbe.

29

Ende ick en wil mijn aensicht niet meer voor haer verbergen.^† Want ick heb mijnen gheest ouer dat huys Israels wtghegoten, spreect de HEEre HEEre.

† Ezec. 36.d.26. Esai. 44.a.3. Ioel. 2.f.28. Acto. 2.b.17.