Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxviij. Capittel.

¶ Hier wort teghen de Rijcken ende Heydenen ghepredict, Ende haer hare straffinge vercondicht, welcke haer teghen dat volck Gods, (nae dien dat sy wt de Babyloonsche geuangenisse weder int lant ghecomen zijn) viandelijck gehat hebben, gelijck de Macedoniers ende Asianiers, ende meer andere.

1

⁺ENde des HEEren woort gheschiede tot my, ende sprack:

+ A vers 1

2

Du menschen kint, Keert v teghen Gog, die inden Lande Magog is, Ende de ouerste Vorst in Mesech, ende Thubal, ende propheteert van hem, ende segt:

3

Also spreect de HEEre HEEre: Siet, ic wil aen v,^* Gog, ghy die de ouerste Vorst zijt, vanden Heeren in Mesech ende Thubal.

* Ezech. 39.a.1. Apoc. 20.c.8.

4

Siet, ick wil v om keeren, ende wil v eenen toom inden mont doen, ende wil v herwaerts wt voeren, met dijnen gantschen heyre, peert, ende man, die alle tsamen wel ghecleet zijn, ende haerder is eenen grooten hoop, die altemale tartsen, ende schilden, ende sweerden voeren.

5

Ghy brenget met v Persen, Moren, ende Lybiers, die alle Schilden ende Helmetten voeren.

6

Daer toe Gomer ende alle zijn heyre, met den huyse Thogarma, dat teghent Noorden leget, met allen zijnen heyre,

7

Ia ghy brengt een groot volc met v. Wel aen, wapent v wel, ghy met alle dijne hoopen die by v zijn, Ende weest ghy haer Hooftman. Na langhen tijt suldy besocht worden.

8

Ter laetster tijt, sult ghy comen in dat lant, dat vanden sweerde weder gebracht ende wt vele volcken te samen ghecomen

[p. 65v]

is, te weten, op de berghen Israels, die langhe tijt woest gheweest zijn, ende nv wtgeleyt, van vele volcken, ende alle sonder sorge woonen.

9

⁺Ghy sult herwaerts op trecken, ende aen comen, met grooten storme, ende sult zijn gelijck als een wolcke, om dat lant te bedecken, ghy ende alle uwe heyre, ende dat groote volck met v.

+ B vers 9

10

Also spreect de HEEre HEEre: Tot dier tijt, sult ghy v sulcx voornemen, ende sultet boose inden sinne hebben, ende dencken:

11

Ick wil dat Lant sonder mueren oueruallen, ende ouer die comen, die seker ende stille woonen, als die alle sonder mueren daer sitten, ende en hebben noch grendelen noch poorten, op dat ghy roouen ende plonderen moget, ende dijn hant laten gaen ouer de verstoorde, die weder bewoont zijn, ende ouer dat volck, dat wt den Heydenen te samen gheraept is, ende hem ter neringen ende goederen geschict heeft, ende midden inden Lande woont.

12

Dat Rijc Arabia, Dedan, ende de cooplieden op de See, ende alle gheweldige, die aldaer zijn, die sullen tot v segghen: Ick meyne, dat ghy slechts ghecomen zijt om te roouen, ende hebt uwe hoopen vergadert om te plonderen, op dat ghy wech neemt, siluer ende goudt, ende vergadert beesten ende goedt, ende grooten Roof bedrijft.

13

⁺Daerom soo propheteert du menschen kint, ende segt tot Gog: Alsoo spreeckt de HEEre HEEre: Ist niet also? Dat ghy mercken sult, als mijn volck Israels sonder sorghe woonen sal,

+ C vers 13

14

Dan sult ghy van dijne plaetse comen, te weten, vanden eynden teghent Noorden, ghy ende groot volck met v, alle te peerde, eenen grooten hoope, ende een machtich heyr.

15

Ende ghy sult hier op trecken, ouer mijn volck Israels, ghelijc als een wolcke, die dat Landt bedect, Sulcx sal in de laetste tijt gheschieden. Maer ick wil v daeromme in mijn Lant laten comen, opdat my de Heydenen kennen, Hoe dat ic aen v, O Gog gheheylicht worde voor haren ooghen.

16

Alsoo spreect de HEERE HEEre: Ghy zijt het, van dien ick in voorleden tijden gheseyt hebbe, door mijne dienaers de Propheten in Israel, die ter seluer tijt propheteerden, dat ick v ouer haer woude laten comen.

17

⁺Ende het sal gheschieden, ter tijt, als Gog comen sal, ouer dat Lant Israels, seyt de HEERE HEEre, soo sal mijn toornicheyt op trecken in mijnder gramschappen.

+ D vers 17

18

Ende ick spreke sulcx in mijnen ijuer, ende inden vyere mijns thoorns. Wandt ter seluer tijt, sal groote beuinghe zijn inden Lande Israels,

19

Dat voor mijn aensicht beuen sullen de visschen inder See, de voghelen onder den Hemel, dat vee opten velde, ende al dat hem roert ende beweecht opten Lande, ende alle menschen, die opter Aerden zijn. Ende de berghen sullen om ghekeert worden, Ende de wanden ende alle mueren, neder vallen.

20

Maer ick wil ouer hem roepen, dat sweert, op alle mijne berghen, spreect de HEEre HEEre,^† dat eens yeghelijckens sweert, deen teghen dat andere sal zijn.

† Iudi. 7.c.22. 1.Re.14.c.20. 2.Pa. 20.d.22.

21

Ende ick wil hem richten, met pestilentie ende bloet, Ende wil laten reghenen slachreghen met haghelsteenen,^* vyer ende solfer op hem, ende zijn heyr,

* Apoc. 20.c.9

22

Ende op dat groote volck, dat met hem is. Alsoo wil ick dan heerlijck, heylich, ende bekent worden, voor veel Heydenen, dat sy beuinden sullen, dat ick de HEERE ben.