Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxvj. Capittel.

¶ Hy belooft den volcke Israels weder goet ende weluaert, Ende hy doet haer belooften, die in Christo veruult zijn, niet om haers, maer om zijns heylighen Naems wille.

1

⁺ENde du menschen kint, propheteert den berghen Israels, ende segt:^† O ghy berghen Israels, hoort des HEEren woordt:

+ A vers 1

† Ezech. 6.a.2.

2

Alsoo spreeckt de HEERE HEEre: Daeromme dat de Viandt hem ouer v beroemt. Ehe, Die eewighe Hoochten zijn nv onse erffenisse gheworden,

3

Daeromme propheteert ende segt: Alsoo spreect de HEEre HEEre: Aenghesien datmen v ouer al verwoest, ende vernielt, ende zijt den ouerghebleuen Heydenen te deel gheworden, ende zijt den lieden in den mont ghecomen, ende een quaet gherucht gheworden,

4

Daeromme hoort O ghy bergen Israels, dat woort des HEEren HEEren: Alsoo spreeckt de HEEre HEEre, beyde totten berghen ende houelen, tot de beken, ende dalen, tot die eenelijcke woestijnen, ende verlaten steden, die welcke den ouerghebleuen Heydenen rontsomme tot eenen roof ende spot gheworden zijn.

5

Ia alsoo spreect de HEEre HEEre: Ick hebbe in mijnen vierighen ijuer ghesproken, teghen de ouerghebleuen Heydenen,^* ende teghen dat gheheele Edom, die welcke mijn Landt in ghenomen hebben, met vruechden van geheelder herten ende met schamper lachen, om dat selue te verheeren, ende wt te pochen.

* Ezech. 35.a.2.

6

⁺Daerom propheteert vanden Lande Israels, ende segt totten berghen ende houelen, totten beken ende dalen: Alsoo spreeckt de HEEre HEEre: Siet, ick hebbe in mijnen ijuer, ende gramschappe, ghesproken, Wandt ghy [alsulcken] versmaetheyt vanden Heydenen verdraghen moet.

+ B vers 6

7

Daeromme spreect de HEEre HEEre alsoo: Ick heffe mijn hant op, dat uwe naghebueren de Heydenen rontsomme haer schande weder sullen moeten draghen.

8

Maer ghy berghen Israels sult weder groeyen, ende uwe vruchten brengen mijnen volcke Israels. Ende dat sal corts gheschieden.

9

Wandt siet, ick wil my weder tot v wenden, ende v aensien, op dat ghy ghebouwet, ende besaeyt wort,

10

Ende wil by v der lieden vele maecken, dat gheheele Israel al te mael. Ende de Steden sullen weder bewoont, ende de woestijnen ghebouwet worden.

11

Ia ick wil v een menichte geuen van lieden ende beesten, alsoo dat ghy v vermeerderen ende wassen sult. Ende ick wil v daer weder insetten, daer ghy te voren woonde, ende wil v meer goets doen, dan oyt te voren ende ghy sult beuinden, dat ick de HEEre sy.

12

Ick wil v lieden toebrengen, die mijn volck Israels sullen zijn, die sullen v besitten, ende ghy sult haer erfdeel zijn ende ghy en sult niet meer sonder erfghenamen zijn.

13

⁺Alsoo spreeckt de HEEre HEEre:

+ C vers 13

[p. 64v]

Want men dat van v seyt: Ghy hebt lieden verslonden, ende hebt v volc sonder erfghenamen ghemaect,

14

Daeromme en sult ghy [nv] niet meer lieden verslinden, noch v volck sonder erfghenamen maken, spreeckt de HEEre HEEre:

15

Ende ic en wil v niet meer laten hooren de smaetwoorden der Heydenen, ende ghy en sult den spot der Heydenen niet meer draghen. Ende ghy en sult dijn volc niet meer sonder erfghenamen maken, spreect de HEERE HEEre.

16

Ende des HEEren woort gheschiede voorder tot my:

17

Du menscen kint, Doen dat huys Israels in haren lande woonde, ende dat selue veronreynichde met haren wesen ende doen, also dat hare wesen voor my was, ghelijck als de onreynicheyt eender vrouwen in haerder cranckheyt,

18

Doen goot ick mijne gramschap ouer haer wt, om des bloets wille, dat sy inden lande vergoten, ende dat selue ontreynicht hadden door hare Afgoden.

19

Ende ic verstroydese onder de Heydenen, ende veriaechdese in de landen, ende oordeeldese na hare wesen ende doen.

20

Ende sy hielden haer ghelijc de Heydenen, derwaerts sy quamen,^† ende ontheylichden mijnen heylighen Name, alsoo datmen van haer seyde: Is dat des HEEren volck,⁺ dwelcke wt zijnen lande heeft moeten trecken?

† Esaie. 52.a.5. Rom. 2.c.24.

+ D vers 20

21

Maer ick spaerde om mijns heyligen naems wille, den welcken dat huys Israels ontheylichde, onder de Heydenen, derwaerts sy quamen.

22

Daerom sult ghy totten huyse Israels segghen: Also spreect de HEEre HEEre: Ic en doets niet om uwen wille, Ghy vanden huyse Israels. Maer om mijns heylighen Naems wille, dien ghy ontheylicht hebt onder de Heydenen, totten welcken ghy ghecomen zijt.

23

Wandt ick wil mijnen groten Name, die door v voor den Heydenen ontheylicht is, dien ghy onder den seluen ontheylicht hebt, heylich maecken. Ende de Heydenen sullen beuinden, dat ic de HEEre sy (spreect de HEERE HEEre) als ick my voor haer aen v bewijse, dat ick heylich sy.

24

Wandt ick wil v van den Heydenen halen, ende v wt alle landen vergaderen, ende weder in uwe landt brenghen.

25

^† Ende wil reyn water op v sprengen op dat ghy reyn wordet. Van alle uwe onreynicheden, ende van allen uwen Afgoden, wil ick v reynighen.

† Esai. 44.a.3. Iere. 17.c.13.

26

^+† Ende ick wil v een nieuwe hert, ende eenen nieuwen gheest in v gheuen. Ende wil dat steenen herte wt uwen vleessche wech nemen, ende v een vleesschen herte gheuen.

+ E vers 26

† Ezech. 11.d.19 18.e.31.

27

^† Ick wil mijnen gheest in v gheuen,^* ende wil alsulcke lieden van v maken, die in mijne gheboden wandelen, ende mijne rechten houden, ende daer na doen.

† Ioel 2.f.28.

* Deut. 8.d.18

28

Ende ghy sult woonen inden lande, dat ick uwen vaderen ghegheuen hebbe, ende ghy sult mijn volck zijn, ende ic wil uwe Godt zijn.

29

Ick wil v van alle uwe onreynicheden los maecken. Ende wil dat coren roepen, ende wilt vermeer-deren, ende en wil v gheenen dieren tijt laten comen.

30

Ick wil de vruchten op de boomen, ende dat ghewasch opten velde vermeerderen, op dat v de Heydenen niet meer en bespotten met den dieren tijt.

31

Als dan sult ghy op uwe boose wesen dencken, ende uwe doen, dat niet goet en was, ende uwe sonde ende Afgoderie sal v berouwen.

32

Sulcx wil ic doen, niet om uwent wille, spreect de HEEre HEEre, dat ghijt weet, maer ghy sult v moeten scamen ende schaemroot woorden, ghy van den huyse Israels, van uwen wesen.

33

⁺Alsoo spreect de HEERE HEEre:^† Ter tijt, als ick v reynighen sal van alle uwe sonden, soo wil ick de steden weder besetten, ende de woestijnen sullen weder ghetimmert worden.

+ F vers 33

† Esaie. 4.a.4. 1.Cor. 6.b.11. Ephes. 5.c.26.

34

Dat verwoeste Lant sal weder gheploecht worden, daer voor dattet verheert was, dattet alle die daer door gaen, sien sullen, ende segghen:

35

Dit lant was verheert, ende nv ist ghelijck eenen lustighen hof. Ende dese steden waren verstoort, in stucken ghebroken, ende woest, Ende staen nv vast ghetimmert.

36

Ende de ouerghebleuen Heydenen rontomme v, sullen beuinden, dat ick de HEEre ben, die daer timmert, soo wat in stucken ghebroken is, ende plantet, so wat verheert was. Ic de HEEre segt, ende doet oock.

37

Alsoo spreect de HEEre HEEre: Ic wil my weder laten vragen vanden huyse Israels, op dat ick my aen haer bewijse,^† Ende ick wilse vermeerderen, gelijck als een Cudde,

† Ierem. 50.a.6

38

Ghelijck een heylighe Cudde, ghelijck een Cudde te Ierusalem, op hare Feesten. Alsoo sullen de verheerde Steden, vol menschen Cudden worden, ende sullen beuinden dat ick de HEEre ben.