Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxv. Capittel.

¶ Hy berispt die Edomiten, die de kinderen Israels quelden ende hateden.

1

⁺ENde des HEEren woort gheschiede tot my, ende sprack:

+ A vers 1

2

Du menschen kint, Stelt v aensichte tegen dat gheberchte^† Seir, Ende propheteert daer teghen, ende spreect tot den seluen:

† Esaie. 21.b.11. Iere. 49.b.7. Ezec. 25.b.13. 32.f.29. 36.a.5

3

Alsoo spreeckt de HEEre HEEre: Siet, ick wil aen v, du berch Seir, ende mijn hant teghen v wtstrecken, ende wil v gheheel woest maken.

4

Ick wil dijne steden eensaem maken, alsoo dat ghy sult tot een woestijne worden, Ende onderuinden, dat ick de HEERE ben,

5

^† Daerom dat ghy eewige viantschap draecht teghen de kinderen Israels, Ende iaechtse int sweert, doent haer qualijc ghinc, ende hare sonde een eynde hadde.

† Num. 20.c.18. Deut. 2.a.7.

6

Daerom soo waerlijck als ick leue, spreect de HEERE HEEre, wil ick v ooc bloedich maken, ende ghy en sult den bloedigen niet ontgaen.^† Aenghesien dat ghy lust tot bloet hebt, so en sult ghy den bloedigen niet ontgaen.

† 1.Mach. 5.a.3

7

Ende ick wil den berch Seir woest, ende eensaem maken, datter niemandt op wandelen noch gaen en sal.

8

Ende wil zijn gheberchte, ende alle houelen, dalen, ende alle valleyen vol dooden maken, die door dat sweert daer sullen verslagen ligghen.

9

Ia tot eener eewigher woestijne wil ick v maken, dat niemant in dijne steden woonen en sal, Ende sult beuinden, dat ic de HEEre sy.

10

Ende daeromme dat ghy segt: Dese beyde volcken, met beyde landen moeten mijn worden, ende wy willense in nemen,^† Oft alschoon de HEEre daer woont,

† Exod. 25.c.22.

11

Daerom, soo waerlijck als ick leue, spreeckt de HEEre HEEre, wil ick na dijnen thorne ende hate met v om gaen, ghelijck ghy met haer om ghegaen hebt wt enckelen hate, Ende ick wil by haer bekent worden, als ick v ghestraft hebbe.

12

Ende ghy sult onderuinden, dat ic de HEEre alle dijn lasteren ghehoort hebbe, dat ghy ghesproken hebt teghen dat gheberchte Israels, ende gheseyt: Sy zijn verwoest, ende ons te verderuen ghegeuen.

13

Ende ghy hebt v tegen my beroemt, ende heftich teghen my ghesproken, dat heb ick ghehoort.

14

So spreect nv de HEERE HEEre: Ic wil v tot eender woestijne maken, dat hem alle dat Lant verhueghen sal.

15

Ende^† gelijc als ghy v verblijt hebt, teghen dat Erue des huys Israels in te nemen, om dattet woest was gheworden, effen alsoo wil ick met v doen, alsoo dat den berch Seir woest moet zijn, met den gheheelen Edom, ende sullen beuinden, dat ick de HEEre ben.

† Ezech. 25.a.6. 26.a.2.