Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxiiij. Capittel.

¶ Hy straft ende bekijft de Priesters, Propheten, ende alle ouerste des volcx, Ende beschrijft ooc (onder de ghelijckenisse eens Herders) dat officie eens ghetrouwen ende ongetrouwen Herders.

1

⁺ENde des HEEren woort gheschiede tot my, ende sprack:

+ A vers 1

2

Du menschen kindt, Propheteert teghen de Herders Israels, propheteert, ende segt tot haer: Alsoo spreect de HEEre HEEre:^† Wee den Herders Israels, die haer seluen weyden. En souden die Herders de Cudde niet weyden?

† Ezech. 13.a.3. 14.b.9. Ierem. 23.a.1. Mich. 3.b.5.

3

Maer ghy eet dat vette, Ende cleet v metter wolle, Ende slaet doot dat ghemeste. Maer de schapen en wilt ghy niet weyden.

4

De swacke en wacht ghy niet,^* Ende de crancke en gheneset ghy niet, Dat ghewont is, en verbint ghy niet, Dat verdwaelde, en haelt ghy niet weder om, Ende dat verloren, en soect ghy niet,^† Maer strenghelijck ende harde heerschapt ghy ouer haer.

* Luc. 4.b.18. Sach. 11.c.16

† 1.Pet. 5.a.3. 2.Cor. 2.a.2. Luc. 22.b.26.

5

Ende mijn schapen zijn verstroyt, als die geenen Herder en hebben, Ende zijn allen wilden dieren, tot eender spijse gheworden, ende gheheel verstroyt,

6

Ende gaen^† verdwaelt hier ende daer opde berghen, ende op de hooghe houelen, ende zijn op den gheheelen lande verstroyt. Ende daer en is niemant, die na haer vraghe, oft haerder achte.

† 1.Pet. 2.c.25. Esaie. 52.b.9.

7

⁺Daerom O ghy Herders, hoort des HEEren woort.

+ B vers 7

8

Soo waerlijck als ic leue, spreect de HEEre HEEre, Aenghesien dat ghy mijn schapen laet tot eenen roof, ende mijn Cudde allen wilden dieren tot eender spijse worden, want sy gheenen Herder en hebben, ende mijne Herders na mijne cudde niet en vragen, Maer zijn sulcke Herders, die haer seluen weyden, maer mijne schapen en willen sy niet weyden.

9

Daerom O ghy Herders, hoort des HEEren woort: Alsoo spreect de HEERE HEEre:

10

Siet, Ick wil aen die Herders, ende wil mijn Cudde van haren handen eysschen, ende wil met haer een eynde maken, dat sy niet meer en sullen Herders zijn, ende en sullen haer seluen niet meer weyden. Ick wil mijne schapen wt haren monde verlossen, dat syse voortaen nyet meer verslinden en sullen.

11

Wandt alsoo spreeckt de HEERE HEEre: Siet, ick wil nv mijnder Cudden selfs aennemen, ende die soecken,

12

Ghelijc als^* een Herder zijne schapen soect als sy van zijnder Cudde verdwaelt zijn. Alsoo wil ick mijne schapen soecken, ende wilse verlossen van alle plaetsen, derwaerts sy verstroyt waren, ter tijt, doent doncker ende duyster was.

* Ioan. 10.a.11. Heb. 13.d.20. 1.Pet. 2.c.25. 5.a.4. Esai. 40.b.11.

13

Ick wilse wtleyden van alle volcken, ende wt alle landen versamen, ende wilse in haer landt leyden, ende wilse weyden op de berghen Israels, ende in alle beemden, ende op alle woonplaetsen des lants.

14

⁺Ick wilse op de beste^† weyde brengen ende haer koyen sullen op de hooghe berghen in Israel staen, aldaer sullen sy in bequame koyen ligghen, ende vette weyden hebben, op de berghen Israels.

+ C vers 14

† Ioan. 10.a.9.

15

Ick wil selfs mijne schapen weyden, ende ick wilse daer neder doen ligghen, spreect de HEERE HEEre.

16

^* Ick wil dat verloren weder soecken, ende dat verdwaelde weder brenghen, Ende dat ghewonde verbinden, ende dat swacke waernemen, ende so wat vet ende sterck is, wil ic bewaren, ende wilse voesteren, ghelijck alst recht is.

* Luc. 4.b.18. Ioan. 10.a.3.

17

Maer tot v, mijne Cudde, spreeckt de HEEre HEEre also:^† Siet, ick wil ordeelen tusschen schaep ende schaep, ende tusschen den rammen ende bocken.

† Matt. 25.c.32.

18

En ist niet ghenoech, dat ghy soo goede weyde hebt, ende soo oueruloedich, dat ghyse met voeten treedt? Ende so schoone Fonteynen te drincken, soo oueruloedelijc, dat ghy daer in treet, ende die onclaer maect?

19

Dat mijne schapen eten moeten, soo wat ghy met uwe voeten vertreden hebt, Ende drincken, so wat ghy met uwe voeten onclaer ghemaect hebt.

20

Daerom spreect de HEEre HEEre alsoo tot haer: Siet, ick wil oordeelen tusschen de vette, ende maghere schapen,

21

Daeromme dat ghy springt met de voeten, ende de swacke van v stoot, met uwen hoornen, tot dat ghyse alle van v verstroyt.

22

Ende ick wil mijne cudden helpen, dat sy niet meer tot eenen roof en sullen worden, ende wil oordeelen tusschen schaep ende schaep.

23

^* Ende ick wil haer eenen eenighen Herder verwecken, diese weyden sal, te weten,^† mijnen knecht Dauid, die salse weyden, ende sal haer Herder zijn.

* Esa. 40.b.11 Ioan. 10.b.11.

† Ozee. 3.a.5.

24

⁺Ende ick de HEEre wil hare God zijn:^‡ Maer mijn knecht Dauid, sal de Vorste onder haer zijn. Dat seg ick de HEEre.

+ D vers 24

‡ Iere. 30.b.9. Act. 2.c.36. Mich. 5.a.3.

25

Ende ick wil een verbont des vredes met haer maken, ende alle boose dieren wt den lande wtroyen, alsoo dat sy seker woonen sullen in de woestijne, ende in de wouden slapen.

26

Ick wil haer, ende alle rontsomme, mijne houelen, seghenen, ende op haer laten^† reghenen ter rechter tijt, dattet ghenadighe reghenen sullen zijn,

† Deut. 11.b.14 28.b.12. Ioel. 2.e.23.

27

Also dat de boomen opten velde hare vruchten brenghen, ende dat landt zijne vrucht gheuen sal, ende si sullen seker opten lande woonen. Ende sullen onderuinden, dat ick de HEEre ben, Als ick haer iock ghebroken, ende haer verlost hebbe vander hant der gheenre, dien sy dienen moesten.

28

Ende sy en sullen den Heydenen niet meer tot eenen roof worden, Ende gheen dier op aerden, en salse meer verslinden, maer sullen seker woonen, sonder alle vreese.

29

Ende ic wil haer een vermaerde plante verwecken, dat sy gheenen hongher meer lijden en sullen inden lande, Ende hare versmaetheyt onder de Heydenen, niet meer draghen en sullen. Ende sullen

[p. 64r]

onderuinden, dat ick de HEERE hare Godt, by haer ben, Ende dat sy vanden huyse Israels mijn volck zijn, seyt de HEEre HEEre.

30

Ia^† ghy menschen sult de cudde mijnder weyden zijn^* Ende ick wil uwe Godt zijn, spreect de HEEre HEEre.

† Psa. 79.b.13 95.b.7. 100.a.3

* Hebr. 8.c.10.