Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxiij. Capittel.

¶ De gherechticheyt onser wercken woort hier neder gheleyt, Ende gheleert dat alleen onse salicheyt aen de ghenade ende bermherticheyt Gods staet, Dat officie der neersticheyt ende getrouwicheyt eens Propheten, wort onder de ghelijckenisse eens wachters bediet ende te verstaen ghegeuen. De Propheet breect den Ioden haren valschen hope.

1

⁺ENde des HEEren woordt geschiede tot my, ende sprack:

+ A vers 1

2

Du menschen kint, Predict teghen dijn volc ende segt tot haer: In dien ick een sweert ouer dat Landt brochte, ende dat volck inden Lande name eenen man onder haer, ende maecten hem tot haren^† wachter:

† 4.Re. 9.d.17.

3

Ende hy saghe dat sweert comen ouer dat Lant, ende bliese de Trompette ende waerschoude dat volck:

4

So wie nv der trompetten gheluyt hoorde, ende en woude hem niet laten waerschouwen ende dat sweert quame, ende name hem wech, des seluen bloet sy op zijnen cop.

5

Wandt hy heeft der trompetten ghe-

[p. 63r]

luyt ghehoort, ende en heeft hem nochtans niet laten waerschouwen, Daerom sy zijn bloet op hem. Maer soo wie hem [seluen] laet waerschouwen, die sal zijn leuen daer af brenghen.

6

Maer in dien de Wachter dat sweert saghe comen, ende de trompette niet en bliese, noch zijn volck niet en waerschoude, ende dat sweert quame, ende name sommighe wech, Die selue werden wel om haerder sonden wille wech genomen. Maer haer bloet wil ic van des Wachter hant eysschen.

7

⁺Ende nv du menschen kint,^* Ic hebbe v tot eenen Wachter gheset ouer dat huys Israels, als ghy wat wt mijnen monde hoort, dat ghyse van mijnent weghen waerschouwen sult.

+ B vers 7

* Ezech. 3.a.7.

8

Als ick nv totten godloosen segghe: Ghy godloose moet den doot steruen. Ende ghy en segt hem sulcx niet, op dat hem de godloose late waerschouwen voor zijnen wesen, So sal effen wel de godloose, om zijns godloosen wesens wille, steruen. Maer zijn bloet wil ick van uwer hant eysschen.

9

Maer in dien ghy den godloosen voor zijn wesen waerschout, dat hy hem daer af bekeere, Ende dat hy hem van zijnen wesen niet en wil bekeeren, Soo sal hy om zijnder sonden wille steruen, ende ghi hebt uwe siele^† ghesalueert.

† Behouden, beurijdt.

10

Daeromme du menschen kint, segt den huyse Israels: Ghy segt alsoo: Onse sonden ende misdaden ligghen op ons, dat wy daer onder vergaen, Hoe connen wi dan gheleuen?

11

Soo segt tot haer: So warachtelijck als ick leue, seyt de HEEre HEEre:^† Ick en heb gheen welbehagen aen den doot des godloosen,^* Maer dat hem de godloose bekeere van zijnen wesen, ende leue. Daeromme bekeert v doch nv, van uwen boosen wesen. Waeromme wilt ghy steruen, ghy vanden huyse Israels?

† Ezech. 18.c.32. Sap. 1.c.13.

* Esa. 55.b.7.

12

Ende du menschen kindt, segt tot dijnen volcke:^† Wanneer een rechtuaerdighe wat quaets doet, so en salt hem niet helpen, dat hy^* vroom gheweest is.⁺ Ende als een godloose vroom wort, soo en salt hem niet schaden, dat hy godloos gheweest is. Daerom en can oock de Rechtuaerdighe niet gheleuen, als hy sondicht.

† Ezec. 18.d.26.

* Oprecht.

+ C vers 12

13

Want wanneer ick totten Rechtuaerdighen spreke: Hy sal leuen, ende hy verlaet hem op zijn gerechticheyt, ende doet wat quaets, So en sal alle zijnder vromicheyt niet ghedacht worden, Maer hy sal steruen in zijn boosheyt, die hy doet.

14

^† Ende wanneer ick tot den godloosen spreke: Hy sal steruen, ende hy bekeert hem van zijnder sonde, ende doet soo wat recht ende goet is,

† Esaie. 55.a.7. Iere. 18.a.7.

15

Alsoo dat de godloose dat pant weder geuet, ende betaelt, so wat hy gherooft heeft, Ende na dat woort des leuens wandelt, dat hy niet quaets en doet, so sal hy leuen, ende niet steruen.

16

Ende^† alle zijner sonden die hy ghedaen heeft, en sal niet ghedacht worden, Want hy doet nv, soo wat recht ende goet is, Daeromme sal hy leuen.

† Heb. 8.b.12.

17

^* Nochtans spreeckt dijn volck: De HEEre en oordeelt niet recht, Hoe wel sy nochtans onrecht hebben.

* Ezec. 18.e.29.

18

^† Want in dien de Rechtuaerdige hem keeret van zijnder gherechticheyt,⁺ ende doet wat quaets, so sterft hy ymmers met rechts daeromme.

† Ezech. 3.b.11.

+ D vers 18

19

Ende in dien de godloose hem bekeert van zijnen godloosen wesen, ende doet so wat recht ende goet is, So sal hy ymmers billichs leuen.

20

Noch segt ghy: De HEERE en ordeelt niet recht, Daer ick nochtans v vanden huyse Israels,^† eenen yeghelijcken na zijn wesen ordeele.

† Iere. 17.b.10. Mat. 16.d.27 Roma. 2.a.6.

21

Ende het gheschiede inden twelfsten iare onser geuanghenissen, opten vijfsten dach der thiender maent, doen quam tot my een die ontloopen was van Ierusalem, ende seyde: De Stadt is gheslagen.

22

Ende de hant des HEEren was ouer my des auondts, eer de ontloopene quam, ende dede my mijnen mont op, tot dat hy des smorghens tot my quam. Ende hy dede my mijnen mont op, also dat ick niet meer gheswijghen en conde.

23

Ende des HEEREN woort gheschiede tot my, ende sprack:

24

Du menschen kindt: De inwoonders deser woestijnen inden lande Israels, segghen also: Abraham was een eenich man, ende beerfde dit Lant, Maer onser is vele, Soo hebben wy ymmers tlant billicker.

25

⁺Daerom segt tot haer: Alsoo seydt de HEERE HEEre:^* Ghy hebt bloedt verslonden, ende uwe ooghen op gheheuen totten Afgoden,^† ende bloet ghestort, Ende meynt ghy dat Lant te besitten?

+ E vers 25

* Leui. 17.c.10.

† Deut. 5.c.17.

26

Ia ghy vaert altoos voort met moorden, ende doet grouwelen,^† Ende deene scheynt den anderen zijn wijf, Ende meynt ghy dit Lant te besitten?

† Ezech. 22.b.11

27

Daeromme spreect tot hen: Also spreect de HEERE HEEre: So waerachtelijck als ick leue, Alle die in der woestijnen woonen, sullen door tsweert vallen, Ende soo wat opten velde is, dat wil ick den beesten te verslinden gheuen,

28

Ende die in de sterckten ende speluncken zijn, die sullen aender Pestilentie steruen. Want ick wil dat Lant gheheel verwoesten, ende zijnder hoouaerdie ende macht een eynde maken, dattet gheberchte Israels soo woest worde, datter niemandt ouer en ga.

29

^† Ende sullen onderuinden, dat ick de HEEre ben, als ick dat Lant geheel verwoest hebbe, om alle haerder grouwelen wille, die sy doen.

† Ezech. 25.c.17

30

⁺Ende du menschen kindt, Dijn volck spreect teghen v, aen de wanden ende onder de huysdueren, Ende een yeghelijck seyt totten anderen: Lieue, coemt, ende laet ons hooren, wat de HEEre seyt.

+ F vers 30

31

Ende sy sullen tot v comen in de vergaderinghe, ende voor v sitten, als mijn volck, ende sullen dijne woorden hooren, maer niet daer na doen. Maer sullen v aenpijpen, ende effen wel voortaen leuen na haerder ghiericheit.

32

Ende siet,^* Ghy moet haer Liedeken zijn, dat sy gheerne singhen ende spelen sullen.

* Iob. 30.a.9. Psal. 69.b.13. Tren. 3.f.63.

33

Alsoo sullen sy dijne woorden hooren, ende daer niet na doen.

[p. 63v]

34

Maer alst coemt datter comen sal, Siet, so sullen sy beuinden, dat een Propheet onder haer gheweest is.