Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxij. Capittel.

¶ Een claghe ouer Pharao, ende dat volck Egipti.

1

⁺ENde het geschiede inden twelfsten Iare opten eersten dach der twelfster maendt, dat des HEEREN woort tot my gheschiede, ende sprack:

+ A vers 1

2

Du menschen kindt, Maeckt een claghe ouer^† Pharao, den Coninck te Egipten, ende segt tot hem:

† Ezec. 29. 30. 31.

3

Du bist gelijck als een Leeuwe onder de Heydenen, ende ghelijck als eenen Seedraeck, ende springt in dijne waterstroomen, ende maect dat water met uwe voeten^* droeuich, ende maeckt dijne stroomen onreyn.

* Onclaer.

4

Alsoo spreect de HEERE HEEre:^† Ick wil mijn net ouer v wtwerpen, door eenen grooten hoop volcx, die v sullen in mijn gharen iaghen.

† Ezech. 12.b.13 17.c.20.

5

Ende ick wil v opt Landt trecken, ende opt Velt werpen, dat alle voghelen des Hemels op v sitten sullen, Ende alle dieren op Aerden van v sat worden.

6

Ende wil dijn aes op de berghen werpen, ende met dijner hoochten de dalen veruullen.

7

Dat Lant daer ghy in swemmet, wil ick van dijnen bloede root maken, al tot aen de berghen toe, dat de beken van v vol worden.

8

Ende alst nv gantsch met v wt is, soo wil ick den Hemel bedecken, ende zijne sterren verduysteren,^* Ende de sonne met wolcken ouertrecken, Ende de Mane en sal niet schijnen. Alle lichten aen den Hemel wil ick ouer v laten doncker worden, Ende wil een duysternisse in dijnen lande maken, spreeckt de HEERE HEEre.

* Esaie. 13.b.10. Ioel 2.b.10. 3.c.15. Mat. 24.c.29 Mar. 13.c.24. Luc. 21.c.23.

9

⁺Daer toe wil ic veler volcken herte verschrict maken, als ick den Hey-

+ B vers 9

[p. 62v]

denen dijne plaghen ghewaer laet worden, ende vele landen, die ghy niet en kent.

10

Vele volcken sullen haer van v verwonderen, ende haren Coninghen sal van v grouwelen, als ick mijn sweert teghen haer laet blincken, Ende sy sullen bottelijcken verschrict worden, dat haer dat herte ontsincken sal, van dijnen val.

11

Want also spreect de HEEre HEEre: Dat sweert des Conincx tot Babel sal v treffen.

12

Ende ick wil dijn volck vellen door dat sweert der Helden, ende door allerley Tyrannen der Heydenen, die sullen de heerlijcheyt Egypti verheeren, dat alle haer volck vernielt worde.

13

Ende ick wil alle hare dieren verdoen aen de groote wateren, alsoo dat haer gheens menschen voet, ende geens diers clauwe, onclaer maken en sal.

14

⁺Dan wil ick hare wateren claer maken, dat hare stroomen vlieten ghelijck als olye, spreect de HEEre HEEre,

+ C vers 14

15

Als ick dat Lant Egypti verwoest, ende al dat inden lande is, eensaem ghemaect, ende alle die daer in woonen, verslaghen hebbe, op dat sy onderuinden, dat ick de HEERE ben.

16

Dat sal den iammer zijn, die men wel mach beclagen. Ia vele dochteren der Heydenen sullen sulcken een claghe maken ouer Egipten, Ende alle haer volck salmen beclaghen, spreeckt de HEEre HEEre.

17

Ende inden twelfsten iare, opten vijftienden dach der seluer maent, gheschiede des HEEren woort tot my, ende sprac:

18

Du menschen kint, Beweent dat volck in Egipten,^† ende stootet metten dochteren der stercker Heydenen henen af, onder der Aerden, tot den ghenen die in de cuylen varen.

† Esai. 14.c.11. Ezech. 31.c.15.

19

Waer is nv dijne wellust? Hier onder, ende legt v by de onbesnedene.

20

Sy sullen vallen onder de verslaghene mettten sweerde. Dat sweert is alreets gheuat, ende wtghetoghen ouer haer gantsche volck.

21

⁺Daer af sullen segghen inder Hellen, de stercke Helden, met hare medehulpers, die alle hier onder gheuaren zijn, ende ligghen daer onder de onbesneden, ende verslagene vanden sweerde.

+ D vers 21

22

Aldaer leghet Assur met alle zijnen volcke rontom begrauen, die alle verslaghen, ende door het sweert geuallen zijn.

23

Haer grachten zijn diep in de cuylen, Ende zijn volck leget ouer al rontomme begrauen, die alle verslaghen, ende doort sweert gheuallen zijn, daer haer de gheheele werelt voor ontsach.

24

Daer leghet oock^† Elam met alle zijne hoopen rontom begrauen, Die alle verslaghen, ende door tsweert geuallen zijn, ende hier onder gheuaren, als de onbesneden, onder der Aerden, Waer voor haer oock de gheheele wereldt vreesde, Ende sy moeten hare schande draghen metten ghenen, die in de cuylen varen.

† Iere. 49.f.34 Dan. 8.a.2.

25

Men heeftse onder de verslaghen geleyt, met alle haren hoopen, ende sy liggen rontomme begrauen, Ende si zijn alle als de onbesneden,⁺ ende de verslaghen vanden sweerde, Voor den welcken haer oock de gheheele wereldt ontsien moeste. Ende sy moeten hare schande draghen, metten ghenen die in de cuylen varen, ende onder de verslaghene blijuen.

+ E vers 25

26

Daer leghet Mesech ende Tubal, met alle haren hoopen rontom begrauen, die alle onbesneden, ende metten Sweerde verslaghen zijn, voor de welcke haer ooc de gheheele werelt vreesen moeste.

27

Ende alle andere Helden, die onder de onbesnedene gheuallen zijn, Ende met haerder crijchsgeweere ter Hellen geuaren zijn, ende hare sweerden onder hare hoofden hebben moeten leggen, Ende hare misdaet ouer hare ghebeente gecomen is, welcke nochtans Helden waren, ontsien inde geheele werelt.

28

Also moeten sy liggen. Daerom moet ghy oock vrijelijcken onder de onbesnedene tot puluer in stucken gheslaghen worden, Ende onder de ghene, die metten sweerde verslaghen zijn, ligghen.

29

Daer leyt^† Edom met zijnen Coninghen, ende alle zijne Vorsten, onder de verslaghene metten sweerde, ende onder de onbesneden,⁺ metten anderen die inde cuylen varen, die nochtans machtich gheweest zijn.

† Iere. 49.b.7. Ezec. 25.b.13. 35.a.2.

+ F vers 29

30

Ia alle Vorsten vant Noorden die moeten daer henen, ende alle Sidoniers die met de verslaghene henen af gheuaren zijn. Ende haer veruaerlijck ghewelt is tot schanden gheworden, ende sy moeten ligghen, onder de onbesneden, ende onder de ghene, die metten sweerde verslaghen zijn, ende hare schande draghen, metten ghenen, die in de cuylen varen. Dese sal Pharao sien, ende hem seluen vertroosten, met alle zijnen volcke, die onder hem metten sweerde verslagen zijn, ende met zijnen gheheelen heyre, spreect de HEERE HEERE.

31

Wandt de gantsche wereldt sal haer oock eens voor my vreesen, dat Pharao ende alle zijnen hoope, sal ligghen onder de onbesnedene ende metten sweerde verslaghen, seyt de HEEre HEEre.