Den Bibel, Inhoudende dat Oude ende Nieuwe Testament (Biestkensbijbel)

[p. 62r]

¶ Dat .xxxj. Capittel.

¶ Teghen Pharao den Coninck in Egipten.

1

⁺ENde het gheschiede inden elfsten iare, opten eersten dach der derder maendt, dat des HEEren woort tot my gheschiede, ende sprack:

+ A vers 1

2

^† Du menschen kint, Segt tot Pharao den Coninck te Egipten, ende tot alle zijn volc: Wien meynt ghy dan, dat ghy ghelijck zijt in dijner heerlijcheyt?

† Ezec. 26. 30. 32

3

Siet,^* Assur was ghelijck als eenen Cederboom opten Libanon, van schoone tacken, ende dick van loof, ende seer hooch, dat zijnen Top hooch stont, onder groote dicke meyen.

* Dan. 4.a.9.

4

De wateren maecten dat hy groot wert, Ende de diepten, dat hy soo hooch wiesch. Sijne waterstroomen ghinghen rontom zijnen stamme henen, Ende zijne Beken tot alle boomen inden velde.

5

Daerom is hy hoogher gheworden, dan alle boomen opten velde, ende hy creech veel tacken, ende lange^† schueten, Want hy hadde waters ghenoech hem wt te breyden.

† Meyen.

6

Alle voghelen des Hemels nestelden op zijne tacken, Ende alle de dieren int velt, hadden Iongen onder zijne meyen ende onder zijne schaduwe woonden alle volcken.

7

Hy hadde scoone, groote ende lange tacken, want zijne wortelen hadden veel waters.

8

Ende geenen Cederboom en was hem ghelijck, in Gods Hof. Ende de Denne boomen en waren by zijne tacken niet te ghelijcken, Ende de^† Mandel boomen en waren niet teghen zijne meyen: Ia hy was also schoone als eenigen boom inden Houe Gods.

† Castaneen oft Ahornen.

9

Ick heb hem soo schoon ghemaect, dat hy soo veel tacken creech, dat hem alle lustighe boomen inden Hof Gods benijdeden.

10

⁺Daerom spreect de HEEre HEEre alsoo: Aenghesien dat hy soo hooch gheworden is, dat zijnen Top stont onder groote, hooghe, dicke meyen, Ende zijn herte hem verhief, om dat hy soo hooch was,

+ B vers 10

11

Daerom gaf ick hem den aldermachtichsten onder de Heydenen inde handen, dat hy met hem soude omgaen, ende verdrijuen, ghelijck als hy verdient hadde, met zijnen godloosen wesen.

12

Dat hem vreemden souden wtroyen, te weten, De Tyrannen der Heydenen, ende hem verstroyen, Ende dat zijne tacken op de Berghen, ende in alle dalen ligghen moesten, ende zijne meyen in stucken ghebroken, aen alle Beken int Lant.

13

Dat alle volcken opter Aerden van zijne schaduwe aftrecken moesten, ende hem verlaten, ende alle Voghelen des Hemels op zijnen omgheuallen Stam saten,

14

Ende alle dieren int Velt leyden haer op zijne tacken, op dat voortaen geenen boom aenden water hem verheffe van zijnder hoochte, dat zijnen Toppe onder groote dicke meyen stae, Ende geenen boom aenden water hem en verheffe ouer den anderen. Wandt sy moeten alle onder de Aerde, ende den doot ouerghegheuen worden, ghelijck als ander menschen, die inde Cuylen varen.

15

⁺Alsoo spreect de HEERE HEEre:^† Ter tijt, doen hy hier onder inde Helle voer, doen maeckte ick een trueren, dat hem de diepte bedecte, ende zijne waterstroomen stille staen moesten, ende de groote wateren niet gheloopen en conden. Ende ick maecktet, dat de Libanon om zijnent wille truerde, Ende alle Veltboomen verdorden van zijnen tweghen.

+ C vers 15

† Esai. 14.c.11. Ezech. 32.c.19.

16

Ick verschrickte de Heydenen, doen sy hem hoorden vallen, Doen ick hem hier onder stiet, ter Hellen, met den ghenen die inde Cuylen varen. Ende alle lustighe boomen onder der Aerden. De edelste, ende de beste op den Libanon, Ende alle die aen dat water ghestaen hadden, gundent hem wel.

17

Want sy moesten oock met hem hier onder ter Hellen, tot de verslaghene metten sweerde, aenghesien sy onder de schaduwe zijns arms ghewoont hadden, onder de Heydenen.

18

Hoe groot meynt ghy dan, dat ghy [Pharao] zijt, met dijn pronckerie, ende heerlijcheyt onder de lustighe boomen? Wandt ghy moet met de lustighe boomen onder de Aerde henen wech varen, ende onder de onbesneden ligghen, die metten sweerde verslaghen zijn. Alsoo salt Pharao gaen, met alle zijnen volcke, spreect de HEEre HEEre.