Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxx. Capittel.

¶ Noch breeder van de straffinghe Egipti.

1

⁺ENde des HEEren woort gheschiede tot my, ende sprac:

+ A vers 1

2

^† Du menschen kint, propheteert, ende segt: Also spreect de HEEre HEEre: Huylt [ende segt] O wee des daechs, want den dach is na by,

† Ezech. 29.a.2. 31. 32.

3

^† Ia des HEEren dach is na by, Eenen duysteren dach. Den tijt is hier, dat de Heydenen comen sullen,

† Iere. 30.b.7. Amos. 5.c.18. Ioel. 2.a.1. Soph. 1.c.14

4

Ende dat sweert sal ouer Egipten comen, Ende Morenlandt moet verschricken, als de verslaghen in Egipten vallen sullen, ende haer volck wech geuoert, ende hare fondamenten omgheworpen worden.

5

Morenlandt ende Lybia, ende Lijdia, met alderley ghemeyn volck, ende Chub, ende die wten lande des verbonts zijn, Die sullen met haer doort Sweert vallen.

6

Also spreect de HEEre: De beschermheeren Egypti moeten vallen, ende de hoouerdie haerder macht moet tonder, Vanden tooren te Syene aen sullen sy doort sweert vallen, seyt de HEERE HEEre,

7

⁺Ende sullen, ghelijck hare woeste Palen, woest worden, Ende hare steden onder andere woeste steden, woest ligghen, op dat sy beuinden, dat ic de HEERE sy,

+ B vers 7

8

Als ick een vyer in Egipten make, dat alle die haer helpen, verstoort worden.

9

Ter seluer tijt sullen Ambassaten in Schepen van my wt trecken, Morenlant te verschricken, dat nv so seker is. Ende daer sal een verschrickinghe onder haer zijn, ghelijck alst Egipten ghinck, doen haren tijt quam. Want siet, het coemt gewisselijcken.

10

Alsoo spreect de HEERE HEEre: Ick wil de menichte in Egypten^† wtroyen, door NebucadNezar den Coninc tot Babel.

† wechruymen.

11

Wandt hy ende zijn volck met hem, met de Tyrannen der Heydenen, die zijn alhier ghebracht, om dat Lant te verderuen. Ende sullen hare sweerden wt trecken teghen Egipten, dat dat lant ouer al vol verslaghene ligghe.

12

Ende ick wil de waterstroomen drooch maken, ende dat Lant boose Lieden vercoopen, ende wil dat Landt, ende soo wat daer in is, door vreemde verwoesten, ick de HEEre hebt ghesproken.

13

⁺Alsoo spreect de HEERE HEEre:^† Ic wil de Beelden tot Noph wtroyen, Ende de Afgoden vernielen. Ende Egipten Landt en sal gheenen Vorst meer hebben, Ende ick wil een verschrickinge in Egipten lant seynden.

+ C vers 13

† Sach. 13.a.2.

14

Ick wil Patros woest maken, Ende een vyer tot Soan aensteken, Ende dat recht ouer No laten gaen.

15

Ende ick wil mijn gramschappe wtstorten ouer Sin, die daer is een beuestinge Egipti, Ende wil de menichte tot No wtroyen.

16

Ick wil een vier in Egipten aensteken, ende Sin sal ancxt ende bangicheyt hebben, Ende No sal in stucken ghebroken, Ende Noph daghelijcx beancxt worden.

17

De Ionghe mannen tot On, ende Bubasto, sullen doort sweert vallen, Ende de Wijuen gheuanghen wech geuoert worden.

18

Tachpanhes sal eenen duysteren dach hebben, als ick dat Iock Egypti slaen sal, dat de hoouerdie haerder macht daer in een eynde hebbe. Sy sal met wolcken bedect worden, ende hare dochteren sullen gheuanghen wech gheuoert worden.

19

Ende ick wil dat Recht ouer Egipten laten gaen, op dat sy weten, dat ick de HEEre sy.

20

⁺Ende het gheschiede inden elfsten iare opten seuenden dach der eerster maent, dat des HEEren woort tot my geschiede, ende sprack:

+ D vers 20

21

Du menschen kint, Ic wil den arm Pharaonis des Egipschen Conincx in tween breken, Ende siet, Hy en sal niet verbonden worden, op dat hy heelen mochte, noch met windelen toe ghebonden worden, dat hy sterck worden, ende een sweert vatten conde.

22

Daerom spreect de HEEre HEEre alsoo: Siet, Ick wil Pharao den Coninc tot Egipten aen, ende wil zijnen arme in stucken breken, beyde den stercken, ende den swacken, dat hem dat sweert wt zijnder hant ontuallen moet.

23

Ende wil de Egiptenaers onder de Heydenen verstroyen, ende inde landen veriaghen.

24

Maer den arme des Conincx tot Babel wil ic stercken, ende hem mijn sweert in zijne handt gheuen. Ende wil den arme Pharaonis in stucken breken, dat hy voor hem stenen sal, ghelijck een die ter doot toe ghewont is:

25

Ia ick wil de armen des Conincx tot Babel stercken, dat de armen Pharaonis daer henen vallen, op dat sy beuinden, dat ick de HEEre sy.

26

Als ick mijn sweert den Babyloonschen Coninck inde hant gheue, op dat hijt ouer Egipten Lant wt trecke, ende ick de Egiptenaers onder de Heydenen verstroye, ende inde landen veriage, dat sy beuinden dat ic de HEEre ben.