Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxix. Capittel.

¶ De straffinghe die ouer den Coninc Egipti gaen sal, Ende wat straffinghe dat de Egiptenaers verwachtende zijn, Van dat soudt ende loon NebucadNesars voor zijnen arbeyt.

1

⁺INden thienden iare, opten thienden dach der twelfster maent, gheschiede des HEEren woort tot my, ende sprac:

+ A vers 1

2

Du menschen kint,^* Richt dijn aen-sicht teghen Pharao den Coninck in Egipten, Ende propheteert teghen hem, ende teghen dat gantsche Egipten Landt.

* Esaie. 19.a.1 20.a.4. Iere. 46.a.2. Ezec. 30. 31. 32.

3

Predickt, ende segt: Alsoo spreeckt de HEEre HEEre: Siet, ick wil aen v Pharao, ghy Coninck in Egipten, ghy grooten drake, ghy die in v water ligt ende segt: De waterstroom is mijn, Ende ick hebbe hem my ghemaect.

4

^* Maer ick wil v een ghebit inden mont legghen, Ende de Visschen in uwe wateren aen uwe schellen hanghen: Ende ick wil v wt uwen waterstroom hier wt trecken, met alle de Visschen in uwe wateren, die aen dijne schellen hanghen.

* Esaie. 37.e.29

5

Ick wil v metten Visschen wt dijne wateren wech werpen inde woestijne. Ghy sult opt Lant vallen, ende niet weder opghelesen noch vergadert worden, Maer den dieren opten lande, ende den voghelen des Hemels tot een aes worden.

6

Ende alle die in Egipten woonen, sullen beuinden, dat ick de HEEre ben,^* Daerom dat sy den huyse Israels eenen Rietstock gheweest zijn.

* 4.Re. 18.d.21 Esaie. 26.a.6. 30.a.2. 31.a.1.

7

Den welcken als sy hem inde handt vaeten, soo brack hy, ende stack haer door de sijden: Ende als sy daer op leenden, so brac hy in stucken, ende stackse inde lendenen.

8

Daerom spreect de HEEre HEEre alsoo: Siet ick wil dat sweert ouer v laten comen, ende beyde menschen ende beesten in v wtroyen.

9

⁺Ende Egipten lant sal tot eender woestijnen, ende eenlijck worden, Ende sullen beuinden dat ick de HEERE sy.^* Daerom dat hy spreeckt: De waterstroom is mijn, ende ick bent diet doet.

+ B vers 9

* Esai. 47.b.8.

10

Daerom siet, ick wil aen v, ende aen uwe waterstroomen, ende wil Egipten Landt woest ende eensaem maken, vanden tooren te Siene aen, tot aen de Palen des Morenlants,

11

Also oock dat noch Beesten, noch Lieden daer in gaen, oft aldaer woonen en sullen, veertich iaer lanck.

12

Wandt ick wil Egipten lant woest maken, ghelijck als hare woeste Palen, ende hare steden woest laten ligghen, gelijck ander woeste steden, veertich Iaer lanck. Ende wil de Egiptenaers verstroeyen onder de Heydenen, ende in de Landen wil ickse veriaghen.

13

Doch, alsoo spreect de HEEre HEERE:^‡ Als de veertich Iaren om zijn, so wil ick de Egiptenaers weder verghaderen, vanden volcken, waer onder sy verstroyt sullen worden. Ende ick wil de gheuanckenisse Egipti weynden,

‡ Iere. 46.e.26

14

Ende haer weder in dat lant Patros brengen, dwelcke haer Vaderlant is, Ende sullen aldaer een cleyn Conincrijcke zijn.

15

Want sy sullen cleyn zijn tegen ander Conincrijcken, Ende niet meer heerschappen ouer de Heydenen. Ende ick wilse gantsch cleyn maken, dat sy ouer de Heydenen niet heerscappen en sullen,

16

Dattet huys Israels hem op haer niet meer en verlate, ende haer daermede besondighe, als sy haer aen haer hanghen, ende sullen beuinden dat ick de HEERE HEERE ben.

[p. 61v]

17

⁺Ende het gheschiede inden seuenentwintichsten iare, opten eersten dach der eerster maent, dat des HEEren woort tot my gheschiede, ende sprack:

+ C vers 17

18

Du menschen kint, NebucadNezar de Babiloonsche Coninck, heeft zijn heyr met grooter moeyte voor Tyro ghebracht, alsoo dat alle de hoofden kale, ende alle sijden beschaeft waren, Ende nochtans en is noch hem, noch zijnen heyre, zijnen arbeyt voor Tyro niet beloont gheworden.

19

Daerom spreect de HEERE HEERE also: Siet, Ick wil NebucadNezar den Coninck tot Babel, Egipten Landt gheuen, dat hy alle haer goet wech nemen, ende haer beroouen ende plonderen sal, op dat hy zijnen heyre de Soudie gheue.

20

Maer dat Landt Egipti wil ick hem gheuen voor zijnen arbeyt, dien hy daer aen ghedaen heeft, Want sy hebben my ghedient, spreeckt de HEERE HEEre.

21

Ter seluer tijt wil ick den hoorne des huys Israels laten wassen, ende wil uwen mont onder haer op doen, op dat sy beuinden dat ick de HEEre ben.