Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvij. Capittel.

¶ Van dit seuenentwintichste capittel aengaende tot int neghenentwintichste toe, ist een claghe ouer de Vorsten Tyri. Dwelcke in eenen hoogheren verstant op den val Luciferi ghetoghen mach worden, Item een vercondinghe van de straffinghe ouer Sidon.

1

⁺ENde des HEEREN woort gheschiede tot my, ende sprack:

+ A vers 1

2

Du menschen kint, Maeckt een claghe ouer^† Tyrum:

† Ezech. 28.a.2.

3

Ende segt tot Tyrum, die daer leyt voor aen de zee, ende die met veel Eylanden der volcken handelt: Also spreect de HEEre HEEre. O Tyre ghi spreeckt: Ick ben de alderschoonste.

4

Dijne Palen zijn midden inde zee, ende uwe Timmerlieden die hebben v op het alder schoonste bereydet.

5

Sy hebben alle dijn schrijnwerc van^* Abeelen hout wt Sanir ghemaect. Ende Cederen vanden Libano laten voeren, ende uwe mastboomen daer af gemaect,

* Dennen.

6

Ende dijne Riemen vanden Eycken wt Basan, ende dijne bancken, van^† Iuoren, Ende de costelijcke ghestoelten wt de Eylanden Chitim.

† Elpenbeen.

7

Dijn Seyl was van ghestickte zijde wt Egipten, dattet dijn^† Banier ware. Ende dijne deckselen van gheelder zijde ende purperen, wt de Eylanden Elisa.

† Vaenken.

8

Die van Sidon ende Aruad waren dijne Bootsghesellen, ende de bequaemste tot Tyro waren uwe Schiplieden.

9

De Outste ende de subtijlste van Gebal moesten uwe Schepen timmeren. Men vant by v alle Seeschepen ende Schiplieden, die hadden haer hanteringhe in v.

10

Die wt Persia, Lidia, ende Libia waren v Crijchsuolck, die hare Schilden, ende Helmen in v ophinghen, ende hebben v soo schoon ghemaect.

11

Die van Aruad waren onder dijn heyr, rontom uwe mueren, ende Wachters op uwe thoornen, die hebben hare Schilden ouer al van uwe mueren afghehanghen, ende v soo schoone ghemaect.

12

⁺Ghy hebt uwe hanteringhe op de zee ghehadt, ende alderley ware, siluer, ijser, Tin, ende Loot, op uwe Merckten ghebracht.

+ B vers 12

13

Iauan, Tubal ende Mesech, hebben met v ghehandelt, ende hebben v^* Lijfeyghen lieden, ende Metael op uwe Mercten ghebracht.

* Slauen.

14

Die van Thogarma hebben v Peerden ende Waghens, ende Muylen, op uwe Mercten ghebracht.

[p. 60v]

15

Die van Dedan zijn dijne Cooplieden gheweest, Ende ghy hebt ouer al inden Eylanden gehandelt, die hebben v Iuoren been, ende Heben hout vercocht.

16

De Syriers hebben van v ghehaelt dijn hantwerck, soo wat ghy ghemaeckt hebt, Ende Robijnen, Purpur, Tapisserie, Sijde, ende Fluweel, ende Christal op uwe Mercten ghebracht.

17

Iuda ende dat Landt Israels hebben oock met v ghewandelt, ende hebben v Tarwe van Mimith, ende Balsem, ende Honich, ende Olie, ende mastich op uwe Mercten ghebracht,

18

Daer toe heeft oock Damascus van v ghehaelt, dijn hantwerck, ende alderley ware, voor stercken wijn ende costelijcke wolle.

19

Dan ende Iauan, ende Mehusal, hebben oock op uwe Mercten gebracht, ijser werck,

20

Casia, end Calmus, dat ghy v daer mede geneeren sout. Dedan heeft met v gecoopmanschapt met banclaken, daermen op sittet.

21

Arabia ende alle Vorsten van Kedar, hebben met v ghecoopmanschapt, met Schapen, Rammen, ende Bocken.

22

De Cooplieden wt Saba ende Raema, hebben met v gehandelt, ende alderley costelijcke Specerie, ende edel ghesteente, ende gout op uwe Mercten ghebracht.

23

Haran, ende Canne, ende Eden, metten Cooplieden wt Seba, Assur, ende Kilmad, zijn oock uwe Cooplieden gheweest.

24

Die hebben alle met v gehandelt, met costelijck ghewaet, met zijden, ende ghesticte lakenen, welcke si in costelijcke kisten van Cederen ghemaect, ende wel bewaert, op dijne Merckten gheuoert hebben.⁺

+ C vers 24

25

Maer de Seeschepen zijn de principaelste op uwe Mercten gheweest. Alsoo zijt ghy rijck ende heerlijck gheworden op de gantsche zee, Ende uwe Schiplieden hebben v op groote wateren aengheroert.

26

Maer eenen Oosten wint sal v midden op de zee in stucken breken,

27

Alsoo dat dijn ware, Cooplieden, Handelaers, Factuers, Schippers, ende de ghene die Schepen maken, ende uwe hanteerders, ende alle uwe Crijchslieden, Ende alle tvolck in v, midden op de zee vergaen sullen, ter tijt als ghy ondergaet.

28

Alsoo dat de Hauenen oock beuen sullen van dat gheroep dijnder Schippers.

29

Ende alle die aen de Riemen trecken, met de Schipknechten ende Stierlieden, sullen wt de Schepen aent landt treden,

30

Ende luyde ouer v roepen, bitterlijcken clagen, ende sullen stof op hare hoofden werpen, ende haer inde asschen wentelen.

31

Sy sullen haer kael scheren om uwen wille, ende sacken om haer gorden, ende van herten bitterlijcken om v weenen, ende trueren.

32

Hare kinderen sullen v oock beclaghen: Ach wie is oyt op de zee soo stille geworden, als ghy Tyrus?

33

Doen ghy uwe Coopmanschap op de See hanteerdet, doen maecte ghy veel Landen rijck, Iae met de menichte dijnre waren ende Coopmanschap, maecte ghy rijck de Coninghen op der Aerden.

34

Maer nv zijt ghy vande See inde rechte diepe wateren ghestooten, alsoo dat dijn neeringhe, ende alle dijn volc in v, vergaen is.

35

Alle die inden Eylanden woonen, die zijn veruaert van v, Ende hare Coninghen ontsetten haer, ende sien iammerlijcken.

36

De Cooplieden inde Landen pijpen v aen, om dat ghy soo bottelijcken onderghegaen zijt, ende niet meer op comen en cont.