Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvj. Capittel.

¶ Een claghe ouer die stadt Tyrum, van haerder straffinghen wegen, die si lijden sal.

1

⁺ENde het geschiede inden elfsten iare, opten eersten dach der eerster maent, dat des HEEren woordt tot my ghesciede, ende sprack:

+ A vers 1

2

Du menschen kint,^† Daerom dat Tyrus spreeckt ouer Ierusalem, He He, De poorten der volcken zijn in stucken ghebroken, het is tot my gheweynt. Ick sal nv vol worden, de wijle dat si woeste is.

† Esaie. 23.a.1. Iere. 47.a.3. Ezech. 27.a.2. 28.a.2.

3

Daerom spreect de HEEre HEEre alsoo: Siet, ick wil aen v O Tyre, ende wil veel Heydenen ouer v wt brengen, ghelijck als hem een zee verheft met zijne baren:

4

Die^† sullen de mueren tot Tyro verderuen, ende hare thorens af breken, Ia ick wil oock dat stof voor haer wech veghen, ende wil een bloote steenrootse van haer maken,

† Math. 11.c.21. Luce. 10.b.13.

5

Ende tot eenen^† werf inder zee, daermen de Visschers netten op wt spant. Want ick hebt ghesproken, seyt de HEERE HEERE. Ende sy sal den Heydenen tot eenen roof worden,

† Schoor.

6

⁺Ende hare dochteren, die opten velde

+ B vers 6

[p. 60r]

ligghen, sullen doort sweert vermoordt worden, Ende sullen beuinden dat ick de HEERE ben.

7

Wandt alsoo spreeckt de HEERE HEERE: Siet, ick wil ouer Tyrum laten comen NebucadNezar den Coninck tot Babel vanden Noorden herwaerts (die een Coninck alder Coningen is) met Peerden, Waghens, Ruyters, ende met eenen grooten hoop volcx.

8

Die sal uwe dochteren die opten velde liggen, metten sweerde vermoorden. Maer tegen v sal hy bolwercken opslaen, ende eenen Wal maken, ende Schilden teghen v rusten.

9

Hy sal met Bocken uwe mueren in stucken stooten, ende uwe thoornens met sine wapenen om rucken.

10

Dat stof vande menichte zijnder Peerden sal v bedecken. Vwe mueren sullen oock daueren vant ghedruysch zijnder Peerden, Raderen, ende Ruyters, ende als hy tot uwer poorten in trecken sal, ghelijck alsmen plach tot eender onstucken ghebroken stadt in te trecken.

11

Hy sal met de voeten zijnder Peerden alle uwe straten vertreden. V volck sal hy metten sweerde vermoorden, Ende uwe stercke Pilaernen ter Aerden rucken.

12

Sy sullen dijn goet roouen, ende uwe Waere plonderen. Vwe mueren sullen si af breken, Ende uwe fijne huysen omrucken, ende sullen uwe steenen, hout, ende stof int water werpen.

13

Also^† wil ick met dat ghetier van uwen sanc een eynde maken, datment geclanck dijnder Herpen niet meer hooren en sal.

† Ier. 7.d.33. 16 b.9. 25.b.10.

14

⁺Ende ick wil een bloote steenrootse van v maken, ende eenen werf, daermen dat vischgaren op wtspant, dat ghy niet meer ghebouwet en wort. Want ick ben de HEERE die sulcx spreeckt, seyt de HEERE HEERE.

+ C vers 14

15

Also spreect de HEERE HEERE teghen Tyrum: Wat gheldet, De Eylanden sullen beuen, als ghy soo grouwelijc veruallen sult, ende dijne gewonde suchten sullen, die in v vermoort sullen worden?

16

Alle Vorsten aende zee sullen van haren stoelen afsitten, ende hare Rocken van haer leggen, ende hare ghesticte cleederen wt trecken, ende sullen in truercleederen gaen, ende opter Aerden sitten, Ende sullen verscricken, ende hen ontsetten om ws onuersienden vals wille.

17

Sy sullen v beclaghen, ende van v segghen: Ach,^* Hoe zijt ghy soo gantsch woeste gheworden, ghy beroemde stadt? Ghy die aen de zee laghet, ende soo machtich waert op de zee, met uwe Inwoonders, dattet gantsche Landt hem voor v vreesen moeste.

* Tren. 1.a.1.

18

Ach hoe ontsetten haer de Eylanden ouer uwen val, Iae de Eylanden inder zee verschricken van uwen onderganck.

19

⁺Alsoo spreeckt de HEEre HEEre: Ick wil v tot eender woester stadt maken, ghelijck als andere steden daer niemant in en woont. Ende eenen grooten vloet ouer v laten comen, dat v groote wateren bedecken:

+ D vers 19

20

Ende wil v hier onder stooten tot den ghenen, die inde Cuylen varen, te weten, totten dooden. Ick wil v onder der Aerden hier af stooten, ende ghelijck een eewighe woestijne maken, met den ghenen die inde Cuylen varen, op dat niemandt in v en woone. Ick wil v ghy^† vertaerde inden Lande der leuendigen, maken,

† Verweende.

21

Ia tot eender verschrickinghe wil ic v maken, dat ghi niet meer en zijt. Ende alsmen nae v vraecht, datmen v nemmermeer vinden en conde, spreeckt de HEERE HEERE.