Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxv. Capittel.

¶ Hy leert hier met ghelijckenissen, dat wy (als ons Godt straft) onse leuen beteren, ende veranderen sullen, ende ons niet verblijden, alst den anderen qualijcken gaet, Want soo wie dat doet, die en salt niet te vergheefs ghedaen hebben.

1

⁺ENde des HEEren woort geschiede tot my, ende sprack:

+ A vers 1

2

Du menschen kint, Keert dijn aensicht tegen de kinderen Ammon, Ende propheteert, teghen haer, ende segt totten Kinderen^† Ammon:

† Ezech. 21.d.32 Iere. 49.a.1.

3

Hoort des HEEREN HEEREN woort. Also seyt de HEERE HEERE: Daerom dat ghy ouer mijn Heylichdom spreeckt, He He, Het is ontheylicht, Ende ouer dat Landt Israel, Het is verwoest, Ende ouer dat huys Iuda, Het is gheuanghen wech gheuoert.

4

Daerom siet, ick wil v den kinderen teghen den Oosten ouergheuen, dat si hare Borchten daer in bouwen, ende hare wooninghen daer in maken sullen. Sy sullen uwe vruchten eten, ende v melck drincken.

5

Ende ick wil Rabbath tot eenen stal der Kemelen maken, Ende de Kinderen Ammon tot Schaepskoyen, ende ghy sult beuinden dat ick de HEERE ben.

6

Wandt alsoo spreeckt de HEERE HEERE: Daerom dat ghy met uwen handen gheclapt, ende met uwen voeten ghestampt, ende v ouer dat Landt Israels, van gantscher herten, soo spotachtelijck verblijt hebt.

7

⁺Daerom siet, Ick wil mijn hant ouer v wt strecken, Ende v den Heydenen tot eender buete geuen, ende v vanden volcken wtroeyen, Ende wt de Landen verdoen, ende v vernielen, Ende ghy sult ghewaer werden, dat ick de HEEre ben.

+ B vers 7

8

Alsoo spreeckt de HEERE HEERE,^* Daerom dat Moab ende Seir seggen: Siet, dat huys Iuda is effen gelijck als alle Heydenen,

* Esai. 16.a.1. Iere. 48.a.1. Seph. 2.b.8.

9

Siet, Daerom wil ick Moab aen de zijden openen in sine steden, ende in sine Palen des edelen lants, te weten, BethIesimoth, BaalMeon, Kiriathaim,

10

Den kinderen teghen den Oosten, met den kinderen Ammon. Ende wilse haer tot een erffenisse gheuen, datmen der kinderen Ammon niet meer gedencken en sal onder de Heydenen.

11

Ende ick wil dat Recht laten gaen ouer Moab, Ende si sullen beuinden, dat ick de HEEre ben.

12

Alsoo spreeckt de HEEre HEEre: Om dat^† Edom hem aenden huyse Iuda ghewroken heeft, ende hem met sinen wreken sculdich maect.

† Psal. 137.b.7

13

^† Daerom spreect de HEERE HEERE alsoo: Ick wil mijn hant wt strecken ouer Edom, ende wil wt roeyen van hem beyde menschen ende beesten, ende wilse woest maken van Theman aen tot Dedan toe, ende doort sweert vellen.

† Esaie. 21.b.11. Iere. 49.b.8. Ezech. 32.f.29 35.a.2.

14

⁺Ende ick wil my weder aen^* Edom wreken, door mijn volck Israel, Ende sy sullen met Edom omgaen nae mijnder gramschappen ende toornicheydt, dat sy mijne wrake vernemen sullen, seyt de HEEre HEEre.

+ C vers 14

* Psal. 137.b.7. Gene. 25.d.22.

15

Alsoo spreeckt de HEERE HEERE:^† Daerom dat de Philisteen haer ghewroken hebben, ende den ouden haet gheboet, na alle haren wille aen de schade [mijns volcx]

† Esaie. 15.a.2. Iere. 47.a.1. Seph. 2.a.4.

16

Daerom spreeckt de HEERE HEERE also: Siet, ick wil mijn handt wt strecken ouer de Philisteen, ende de Krijghers wtroeyen, Ende wil de ouerghebleuen aen de Hauen vander See vernielen.

17

Ende ick wil groote wrake aen haer oeffenen, ende met verbolghentheyt haer straffen,^† dat sy beuinden sullen dat ick de HEERE sy, als ick mijne wrake aen haer ghedaen hebbe.

† Ezech. 33.e.29