Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiij. Capittel.

¶ Aenghesien dat dat Iootsche volck in alderley boosheyt ende lachteringe besmet ende onbeschaemt gheworden is, Soo ghebruyct de Propheet oock een schandelijcke ende onreyne ghelijckenisse om haer te straffen.

1

⁺ENde des HEEREN woort gheschiede tot my, ende sprack:

+ A vers 1

2

Du menschen kint, Daer waren twee vrouwen, eender moeder dochteren,

3

Die bedreuen hoererie in Egipten in haerder iuecht. Aldaer lieten si hare borsten begrijpen, ende de tepelkens haers maechdoms betasten.

4

De groote hiet Ahala, ende hare suster Ahaliba. Ende ic namse te houwelijck, ende si baerden my sonen ende dochteren. Ende Ahala heet Samaria, Ende Ahaliba Ierusalem.

5

Ahala bedreef hoererie, doen icse ghenomen hadde,^* Ende bernde teghen hare boelen, te weten, tegen de Assyriers, die tot

* 4.Re. 15.d.19

[p. 58v]

haer quamen,

6

Teghen de Vorsten ende Heeren, die met zijden gecleet waren, ende teghen alle ionghe lieffelijcke ghesellen, te weten, tegen de Ruyters ende Wagens.

7

Ende boeleerde met alle schoone ghesellen in Assyria. Ende veronreynichde haer met alle hare Afgoden, so waer dat si op eenen^† ontbrande.

† Verliefde.

8

Daer en bouen soo en verliet si ooc niet hare hoererie met Egipten, die by haer gheleghen hadden van haerder iuecht op, ende hare borsten in haren maechdom betast, ende groote hoererije met haer bedreuen hadden.

9

^* Doen ghaf ickse ouer in de handen haerder boelen, den kinderen Assur, teghen den welcken si bernde van lust.

* 4.Re. 17.a.5. Ezec. 16.d.37.

10

Die ontdecken haer schamelheyt, ende namen hare Sonen ende dochteren wech, Ende si doodense met den sweerde, Ende het quam wt, dat dese vrouwen ghestraft waren.

11

⁺Maer doen Ahaliba hare suster dat sach,^* soo ontstack si noch veel erger dan de ander, Ende bedreef der Hoererijen meer, dan haer sustere,

+ B vers 11

* Ierem. 3.b.6.

12

Ende si bernde teghen de kinderen Assur, te weten, teghen de Vorsten ende Heeren (die tot haer quamen wel ghecleedt) Ruyters ende Waghens, ende alle ionghe lieflijcke ghesellen.

13

Doen sach ick, dat si alle beyde gelijckerwijs ontsuyuert waren. Maer dese bedreef haer hoererie meer.

14

Want doen si sach gheschilderde mannen aende wandt in rooder verwen, de beelden der Chaldeen om hare lendenen ghegordt,

15

Ende bonte^† kagelen op hare hoofden, ende alle ghelijck aen te sien, als gheweldighe lieden, ghelijck als de kinderen Babel, ende de Chaldeen in haer vaderlant draghen,

† Hoeden, croonen.

16

So ontstack si tegen hen, so haest als si haerder ghewaer wert, ende seynde Ambassaten tot hen in Chaldea.

17

Als nv de kinderen Babels tot haer quamen, om by haer te slapen na der liefden, so veronreynichde haer die selue met haerder hoererije, ende si veronreynichde haer met hen, dat si haerder moede wert.

18

Ende doen beyde hare hoererie ende schande soo gheheel openbaer was, So werdt ick haerder oock moede, ghelijck als ick haerder suster oock was moede geworden.

19

Maer si bedreef hare hoerderie altijt meer ende meer, ende gedacht op den tijt haerder iuecht, doen si in Egipten lant hoererie bedreuen hadde.

20

^† Ende bernde tegen haer boelen, welcker brant was, ghelijck des Esels ende des Hengsts brant.

† Ezech. 16.c.26

21

⁺Ende ghy bedreeft dijn oneerbaerheydt, als in dijnder iuechden doen die in Egipten uwe borsten handelden, ende uwe tepelkens betast werden.

+ C vers 21

22

Daerom Ahaliba, alsoo spreeckt de HEEre HEEre: Siet, Ick wil dijne boelen, der welcker ghy moede zijt gheworden, teghen v verwecken, ende wilse rontom teghen v brenghen,

23

Te weten, De kinderen Babels, ende alle Chaldeen, metten Hooftlieden, Vorsten ende Heeren, ende alle de Assyriers met haer, De schoone Ionge gesellen, alle Vorsten ende Heeren, Ridders ende Edelingen, ende alderley Ruyters.

24

Ende si sullen ouer v comen gherustet met waghenen ende Ruyteren, ende met eenen grooten hoop volcx, Ende sullen v beleggen, met Spiessen, Schilden, ende Helmen, rontom. Dien wil ick dat recht beuelen, dat si v oordeelen sullen na haren rechte.

25

Ic wil mijnen ijuer ouer v laten gaen, alsoo dat si onbarmhertichlijc met v handelen sullen. Sy sullen v de nuesen ende ooren afsnijden, ende soo wat daer ouer blijft, dat sal doort sweert vallen.

26

Sy sullen uwe sonen ende dochteren wech nemen, ende datter ouer blijuet, metten viere verbernen. Sy sullen v uwe cleederen wt trecken, ende uwe costelijcke Cleynodien wech nemen.

27

Alsoo wil ick dijnder oneerbaerheyt, ende dijnder hoererie met Egipten Lant een eynde maken, alsoo oock dat ghy dijne ooghen niet meer nae haer opheffen, ende Egipten niet meer ghedencken en sult.

28

⁺Want also spreect de HEEre HEEre: Siet, Ick wil v leueren den ghenen dien ghy Viant gheworden, ende welcker ghy moede zijt.

+ D vers 28

29

Die sullen als Vianden met v om gaen, ende alle te samen nemen soo wat ghy verworuen hebt, ende v naeckt ende bloot laten, alsoo dat uwe schamelheydt ontdeckt worde, met dijnder oneerbaerheyt ende hoererie.

30

Alsulcx sal v gheschieden, om uwer hoererien wille, die ghy metten Heydenen bedreuen, aen welcker Afgoden ghy v veronreynicht hebt.

31

Ghy hebt opten weghe dijnder Suster ghegaen, Daeromme gheue ick v oock der seluer kelck inde hant.

32

Alsoo spreeckt de HEEre HEEre: Ghy moest den kelck dijnder Suster drincken, soo diepe ende wijdt als hy is.

33

Ghy sult tot alsoo grooten spot ende gheckernie worden, dattet onlijdelijc zijn sal. Ghy moet v van dien stercken dranc ende iammer vol suypen. Want den kelc dijnder Suster Samarie, is eenen kelck des iammers ende truerens.

34

Den seluen moet ghy reyn wt drincken, daer na de stucken ontwee werpen, ende uwe borsten verschueren. Want ick hebt gesproken, seyt de HEERE HEERE.

35

Daerom so spreect de HEEre HEEre: Daerom dat ghy mijnder vergheten, ende my achter uwen rugghe gheworpen hebt, Daerom draecht oock nv uwe oneerbaerheyt, ende dijne hoererie.

36

⁺Ende de HEEre sprack tot my: Du menschen kint, Wilt ghy Ahala ende Ahaliba niet straffen, ende bewijsen haer hare grouwelen,

+ E vers 36

37

Hoe dat si ouerspel bedreuen, ende bloedt ghestort, ende dat houwelijck ghebroken hebben met den Afgoden?^† Daer toe hare kinderen, die sy my ghebaerdt hadden, verbernden sy den seluen tot eenen offer.

† 4.Re. 16.a.3 17.c.17. 21.a.6 Ierem. 7.d.30 19.a.5. Ezec. 16.d.37.

38

Daer en bouen hebben sy my dat ghedaen, Sy

[p. 59r]

hebben mijne Heylichdommen op dat mael veronreynicht, ende mijne Sabbathen ontheylicht.

39

Want doen sy hare kinderen den Afgoden ghedoot hadden, gingen si des seluen daechs in mijn Heylichdom, om dat selue te ontheylighen. Siet, sulcx hebben si aen mijnen huyse bedreuen.

40

Sy hebben oock Boden wtgesonden nae Lieden, die wt verren Landen comen souden. Ende siet, doen si quamen, soo baydet ghy v, ende blanckettede v, ende verchierde v opt alder fraeyste met Cleynodien, haer Lieden ter eeren.

41

⁺Ende ghy saet op een heerlijc bedde, voor dwelcke stont een Tafele bereyt, daer op wieroocte ghy ende offerde mijn^* Olie daer op.

+ F vers 41

* Exod. 30.d.25

42

Aldaer verhief hem een groot gheroep van vruechden. Ende si gauen den lieden die ouer al van grooten volcke, ende wt der woestijnen gecomen waren, cyraet aen hare armen, ende schoone Croonen op hare Hoofden.

43

Maer ick dacht: Sy is des ouerspels ghewoone van outs herwaerts, Sy en can de hoererie niet ghelaten.

44

Wandt men gaet tot haer in ghelijck alsmen tot eender Hoeren ingaet, Effen alsoo gaetmen tot Ahala ende Ahaliba, den oneerbaren Wijuen in.

45

Daerom sullen haer de Mannen straffen, die dat recht volbrengen,^† ghelijc alsmen de Ouerspeeldersen, ende Bloetstortersen te straffen behoort. Want si zijn Ouerspeelderssen, ende hare handen zijn vol bloets.

† Leuit. 20.b.10 Ezec. 16.d.38.

46

Alsoo spreeckt de HEERE HEERE:^† Voert eenen grooten hoop volcks herwaerts op haer, ende gheeftse om geplondert ende berooft te worden,

† Ezec. 16.d.40

47

Dat zijse steenighen, ende met hare sweerden doorsteken, ende hare sonen ende dochteren vermoorden,^* ende hare huysen metten viere verbernen.

* 4.Re. 25.b.9.

48

Also wil ick der oneerbaerheyt inden Lande een eynde maken, dat alle Wijuen haer daer aen stooten sullen, ende nae sulcker oneerbaerheyt niet doen. Ende men sal uwe oneerbaerheyt op v legghen, Ende ghy sult uwer Afgoden sonden draghen, op dat ghy beuint, dat ick de HEERE HEERE ben.