Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxij. Capittel.

¶ Hy straft de Inwoonders Ierusalems, Propheten, Priesters ende Ouerheeren, om haren schandelijcken laster wille, die si bedreuen.

[p. 58r]

1

⁺ENde des HEEren woort geschiede tot my, ende sprack:

+ A vers 1

2

Du menschen kint, En wilt ghy niet straffen de^* bloetghierighe stadt, ende haer voorhouden alle hare grouwelen?

* Moordadige

3

Segt: Also spreect de HEEre HEEre: O stadt, die du der uwen bloet vergiet, op dat dijnen tijt come, Ende ghy die Afgoden by v maket, op dat ghy v veronreynighest,

4

^† Ghy beschuldicht v aen dat bloet, dat ghy stort, Ende veronreynicht v aen de Afgoden, die ghi maect. Daer mede brengt ghy dijne dagen herwaerts aen, ende maeckt dat dijne iaren comen moeten.

† 4.Re. 21.d.16 2.Pa. 24.e.21 4.Esd. 1.e.32.

5

^* Daerom wil ic v tot eenen spot onder de Heydenen, ende tot een schimperie in alle landen maken. Beyde naby ende verre sullen si v bespotten, alsoo dat ghy een schandelijck gherucht hebben, ende grooten iammer lijden moet.

* 3.Reg. 9.b.7. Psal. 79.a.4.

6

Siet, de Vorsten in Israel, een yegelijck is machtich by v, bloet te storten.

7

^* Vader ende Moeder verachten si,^† Den vreemdelingen doen si ghewelt ende onrecht, den weduwen ende weesen beswaren si.

* Deut. 5.b.16. 27.c.16.

† Esaie. 1.c.23. Exod. 22.c.21. Iere. 5.d.26. Malach. 3.a.5

8

Ghy verachtet mijn Heylichdom, ende ontheylicht mijne Sabbathen.

9

Verraders zijn in v, op dat sy bloet storten.^‡ Sy eten op de berghen, ende handelen moetwillichlijck in v.

‡ Deut. 12.a.2.

10

^* Sy ontdecken de schaemte der vaders, ende verachten de vrouwen in haerder cranckheydt,

* Leui. 18.a.7

11

^+† Ende bedrijuen onder malcanderen die^* naeste met des naesten huysurouwe grouwelen. Sy scheynden haerder sonen wijuen, met alle moetwillicheydt,^* Sy vercrachten hare eyghen susteren, haers vaders dochteren.

+ B vers 11

† Ierem. 5.b.8.

* Vrient.

* 3.Re. 13.d.14.

12

Sy^† nemen geschencken om bloet te vergieten.^* Sy woeckeren, ende nemen ouerschot onder malcanderen, ende bedrijuen haer ghiericheyt teghen haren naesten, ende doen haer onder malcanderen ghewelt, ende vergheten mijnder alsoo, spreect de HEERE HEERE.

† Deut. 27.c.26 Ezech. 13.d.19 Exod. 23.a.8. Eccle. 20.d.31. Psalm. 15.a.5

* Exo. 22.c.25. Leuit. 25.f.35. Deut. 23.c.19. 2.Esd. 5.a.7. Psalm. 15.a.5

13

Siet, Ick sla mijne handen te samen, ouer de ghiericheyt die ghy bedrijft, ende ouer dat bloet dat in v ghestort is.

14

Maer meyndy dattet dijne herte sal moghen lijden, oft dijne handen verdragen, wanneer ict met v maken sal? Ic de HEEre hebt gesproken, ende wilt ooc doen,

15

^* Ende wil v verstroyen onder de Heydenen, ende v verstooten in de Landen. Ende ick wil dijnre onsuyuerheden een eynde maken,

* Ezech. 12.c.15. 15.b.7.

16

Dat ghy by de Heydenen moet veruloeckt gheacht worden, ende leeren, dat ick de HEEre ben.

17

Ende des HEEren woort geschiede tot my, ende sprack:

18

Du menscen kint:^† Dat huys Israels is my tot schuyme gheworden, Alle metael, tin, ijser, ende loot, is inden ouen tot siluer schuym gheworden.

† Esaie. 1.c.22.

19

⁺Daerom seyt de HEEre HEEre also: Aengesien dat ghy dan alle schuym gheworden zijt. Siet, so wil ick v alle na Ierusalem te samen doen,

+ C vers 19

20

Ghelijc alsmen siluer, metael, ijser, ende loot tsamen doet in den ouen, Datmen een vier daer onder op blase, ende smelte het.

21

Alsoo wil ick v oock in mijnen thoorne ende verbolghentseyt tsamen doen, in legghen, ende smelten.

22

Iae ick wil v vergaderen, ende dat vier mijnder gramschappen onder v op blasen,^† alsoo dat ghy daer inne smelten sult, ghelijck dat siluer smelt inden ouen, alsoo sult ghy oock daer in versmelten, Ende beuinden, dat ick de HEERE mijne gramschap ouer v wt ghegoten hebbe.

† Iere. 6.d.27. 9.a.7.

23

Ende des HEEREN woordt gheschiede tot my, ende sprack:

24

Du menschen kint, Segt tot haer: Ghy zijt een Landt, dat niet te reynighen en is, ghelijck een, dat niet bereghent en wort, inder tijt der gramschappen.

25

^† De Propheten die daer in zijn, hebben haer te samen gerottet, om de sielen te verslinden, ghelijc een brullende Leeuwe als hy rooft.^* Sy schrabben ghelt ende goet tot haer, ende maken der weduwen vele daer in.

† Mich. 3.c.11.

* Esaie. 56.c.11

26

Hare Priesters verkeeren mijne wetten vermetelijck, ende ontheylighen mijn Heilichdom.^+* Sy en houden tusscen dat heylighe ende onheylighe gheen onderscheyt, ende en leeren niet, wat reyn oft onreyn sy, ende en wachten mijne Sabbathen niet. Ende ick worde onder haer ontheylicht.

+ D vers 26

* Leuit. 10.c.10.

27

Hare^† Vorsten zijn daer in, ghelijck verschuerende woluen, bloet te storten, ende sielen te verdoen, om haerder ghiericheyts wille.

† Mich. 3.b.11. Sopho. 3.a.3.

28

Ende hare Propheten^† plaesterense met quaden calck, ydelheydt prediken sy, ende propheteren haer lueghenen, ende segghen: Alsoo spreect de HEERE HEERE, hoe wel dattet de HEERE niet ghesproken en heeft.

† Ezech. 13.b.10

29

Dat volck inden Lande gebruyct gewelt, ende si roouen met macht, ende scheynden de arme ende ellendighe,^† Ende doen den vreemdelinghen ghewelt ende onrecht.

† Exod. 22.c.21.

30

Ick sochte onder haer, oft yemant hem tot eender muere maeckte, ende teghen de schuere stont, teghen my voor dat lant, dat ickt niet en verdorue, Maer ick en vant niemanden.$

31

Daerom goot ic mijnen thoorne ouer haer, Ende met dat vier mijnder verbolghentheyt maecte ick haerder een eynde, Ende gaf haer alsoo haer verdienste op haren cop, spreeckt de HEEre HEEre.