Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxj. Capittel.

¶ Godt beueelt den Propheet teghen dat Suyden te propheteren, ende den volcke te vercondighen, wat straffinghe dat de Babiloonsche Coninck ten derden mael ouer haer ende de Ammoniten brenghen sal.

1

⁺ENde des HEEREN woort gheschiede tot my, ende sprack:

+ A vers 1

2

Du menschen kint, keert dijn aensicht henen teghen het Suyden, ende druypt teghen den Middach, ende propheteert teghen dat Wout inden velde teghent Suyden.

3

Ende spreect tot den Woude teghent Suyden: Hoort des HEEren woort, Alsoo spreect de HEEre HEEre:^* Siet, Ic wil in v een vier aensteken, dat sal beyde groene ende dorre boomen verteren,^† datmen zijn vlamme niet en sal connen geblusschen. Maer al wat vanden Suyden teghent Noorden staet, dat sal verbrandt worden.

* Esaie. 1.d.31.

† Esai. 34.b.10 66.d.24. Iere. 7.b.19.

4

Ende alle dat vleesch sal sien, dat ict de HEERE aen ghestooct hebbe, ende dat niemandt blusschen en sal mogen. Ende ick sprac:^† Ach HEERE HEERE. Sy segghen van my: Dese spreect enckel bedecte woorden.

† Ierem. 20.b.8

5

Ende des HEEREN woordt gheschiede tot my, ende sprack:

6

Du menschen kint, stelt dijn aensicht tegen Ieru-

[p. 57v]

salem, ende druypt tegen de Heylichdommen, ende propheteert tegen dat Lant Israels.

7

Ende segt totten lande Israels: Alsoo seyt de HEERE HEEre: Siet, Ick wil aen v, Ick wil mijn sweert wt der scheeden trecken, ende wil in v wtroeyen, beyde rechtuaerdighen ende onrechtuaerdighen.

8

Aenghesien dat ick in v beyde den rechtuaerdigen ende onrechtuaerdighen wtroeye, Soo sal mijn sweert wt der scheeden varen ouer alle dat vleesch, vanden Suyden aen totten Noorden toe.

9

Ende alle dat vleesch sal vernemen, dat ic de HEEre mijn sweert hebbe wt zijnder scheeden getogen, ende ten sal niet weder in ghesteken worden.

10

Ende ghy menscen kint sult suchten,^† tot dat v de lendenen wee doen, Iae bitterlijcken sult ghy suchten, dat zijt sien.

† Trene. 1.e.20. 2.c.11.

11

Ende als si tot v segghen sullen: Waeromme sucht ghy? So sult ghy seggen: Om des^† gheroeps wille, dat daer coemt, voor welcke alle herten versagen, ende alle handen sincken, alder Lieden moet vallen, ende alle knien, ghelijc als water gaen sullen. Siet, Het coemt, ende het sal geschieden, seyt de HEERE HEERE.

† Tijdinghen

12

⁺Ende des HEEREN woordt gheschiede tot my, ende sprack:

+ B vers 12

13

Du menschen kint, Propheteert ende segt: Alsoo spreeckt de HEEre: Segt:^† Dat sweert is ghescherpt, ende^* gheslepen. Het is ghescherpt, dattet slaen sal,

† Psalm. 7.b.13

* Gheuaecht.

14

Het is gheslepen, dattet blincken sal. O hoe vrolijcken wouden wy zijn, oft hy schoon alle boomen tot roeden maecte, ouer de boose kinderen.

15

Maer hy heeft een sweert te bruyneren ghegeuen, datment vatten sal. Het is ghescherpt ende gheuaecht, datment den dootslagher in de hant gheue.

16

O du menschen kint, schreyt ende huylt, Want het gaet ouer mijn volck, ende ouer alle Regenten in Israel, die totten sweerde met mijnen volcke vergadert zijn. Daeromme slaet op dijne lendenen,

17

Want hy heeftse dickwils ghecastijt, wat heuet gheholpen? De roede der booser kinderen en wil niet helpen, spreect de HEEre HEEre.

18

Ende du menschen kint, propheteert, ende slaet dijne handen te samen. Want dat sweert sal dubbelt, Iae drieuoudich comen. Een moortsweert, een sweert van veel dootslaghen, dwelcke haer ooc treffen sal in de Cameren, derwaerts si vlieden.

19

Ic wil dat sweert laten clincken, alsoo dat de herten versagen, ende haerder veel vallen sullen aen alle hare Poorten. Ach hoe blincket, ende het is om te houwen ende te slaen gheuat,

20

Ende segghen: Hout daer onder, beyde ter rechter ende ter slincker zijden, soo wat voor v is.

21

So wil ick dan met mijnen handen vrolijc daer ouer zijn, ende mijn verbolgentheyt laten gaen. Ick de HEEre hebt geseyt.

22

⁺Ende des HEEren woort gheschiede tot my, ende sprack:

+ C vers 22

23

Du menschen kint, Maect twee wegen, door welcke comen sal dat sweert des Conincx tot Babel. Ende si sullen alle beyde wt eenen Lande gaen, Ende stelt een teeken voor aenden wech naeder stadt, daert henen wijsen sal.

24

Ende maeckt den wech, dattet sweert come tot Rabbath der kinderen Ammon, Ende in Iuda, totter vaster Stadt Ierusalem.

25

Want de Coninck tot Babel sal hem aen de wegescheydinge setten, voor aen de twee wegen,^† dat hy hem waersegghen late, metten pijlen om dat Lot schiete, sinen Afgodt vrage, ende de Leuere besie.

† Leuit. 19.f.31. 20.a.6. Deut. 18.b.11.

26

Ende de waersegghinghe sal op de rechte side na Ierusalem wijsen, Dat hy Bocken sal laten aenuoeren, ende holen maken, ende dat hijse met grooten ghecrijsch ouerualle ende moorde, ende dat hi Bocken voeren soude tegen de poorten, ende dat hy daer eenen Wal make, ende Bolwerck bouwe.

27

Maer alsulc waersegghen sal hen valsch duncken, hy swere soo dier als hy wil, Maer hy sal der misdaet ghedencken, dat hyse ghewinne.

28

Daerom spreect de HEEre HEEre alsoo: Om dat uwer ghedacht wort van uwer misdaets weghen, ende uwe onghehoorsaemheyt gheopenbaert is, also datmen uwe sonden siet in allen uwen doen, Ia daerom dat uwer ghedacht wort, sult ghy met ghewelt gheuanghen worden.

29

⁺Ende ghy Vorste in Israel, ghy die verdoemt ende veroordeelt zijt, Diens dach voortcomen sal, wanneer de misdaet ten eynde ghecomen is.

+ D vers 29

30

Alsoo seyt de HEERE HEERE: Doet wech den hoet, ende neemt af de croone. Want daer en sal noch hoet, noch croone blijuen.^† Maer die hem verheuen heeft, die sal vernedert worden, Ende die hem vernedert heeft, die sal verheuen worden.

† Matt. 18.a.4 23.b.11. Luce. 14.b.11. 18.b.14.

31

Ic wil de croone tot niet, tot niet, tot niet maken, tot dat Die come, diese hebben sal, dien wil icse gheuen.

32

Ende du menschen kint, propheteert ende segt: Alsoo spreect de HEEre HEEre,^† vanden kinderen Ammon, ende van haren lasteren. Ende segt: Dat sweert, dat sweert is wtgheruct, dattet slaen sal, Het is geuaecht, dattet vermoorden sal, Ende het sal blincken,

† Iere. 49.a.1. Ezech. 25.a.2. Amos. 1.c.13.

33

Om dat ghy v valsche ghesichten seggen laet, ende lueghenen propheteren: Op dat ghi ooc ouer ghegheuen wordt onder de verslaghen godloosen, der welcker dach quam, doen de misdaet totten eynde ghecomen was.

34

Ende oft al weder in de scheede ghesteken werde, So wil ic v nochtans oordeelen in de plaetse, daer ghy gheschapen, ende inden lande daer ghy gheboren zijt.

35

Ende wil mijnen thoorne ouer v wt storten, Ick wil dat vier mijnder gramscappen ouer v blasen, ende wil v ouerleueren dien lieden, die haer des bernens ende verderuens wel verstaen.

36

Ghy moet den viere tot eender spijse worden, ende dijn bloet moet inden lande gestort worden, Ende men en sal dijnder niet meer gedencken. Want ick de HEEre hebt ghesproken.