Den Bibel, Inhoudende dat Oude ende Nieuwe Testament (Biestkensbijbel)

¶ Dat .xx. Capittel.

¶ Een ghemeyn berispinghe, inden welcken der Ioden schalcheyt beswaert wort, Ende de godlijcke goetheyt ende lancmoedicheyt (dat de godloose scalcken soo langhe spaert) hoochlijck ghepresen wordt.

1

⁺ENde het gheschiede inden seuenden Iare, inden thienden dage der vijfster maent,^† quamen sommige vanden Oudtsten Israels, den HEERE te vraghen, Ende stelden haer voor my neder.

+ A vers 1

† Ezech. 14.a.1.

2

Doen gheschiede des HEEren woort tot my, ende sprack:

3

Du menschen kint, Segt den outsten Israels, ende spreeckt tot hen: Also spreect de HEEre HEEre: Sijt ghy ghecomen om my te vraghen? Soo warachtelijck als ic leue, Ick wil van v ongheuraecht zijn, seyt de HEEre HEEre:

4

Maer wilt ghijse straffen du menschen kint, soo muechdy haer alsoo straffen. Hout haer voor de grouwelen haerder vooruaderen, ende segt tot haer:

5

Alsoo seyt de HEEre HEEre:^† Ter tijt doen ick Israel vercoos, verhief ick mijn hant tot dat saet des huys Iacobs, ende ick gaf my haer te kennen in Egipten Landt. Iae ick verhief mijn hant tot haer, ende sprack:^† Ick ben de HEERE uwe Godt.

† Exodi. 3.b.7.

† Exodi. 20.a.2. Deut. 5.a.6.

6

Ick verhief ter seluer tijt mijn hant,^* dat ickse leyde wt Egipten Lant, in een Lant, dat ick haer voorsien hadde,^‡ dat met melck ende honich vloeyt, een edel lant voor alle landen.

* Exo. 13.d.17 14.e.21.

‡ Nu. 13.c.28.

7

Ende sprack tot haer:^* Een yeghelijc werpe wech de grouwelen voor zijnen oogen, ende en veronreynicht v niet aen de Afgoden Egipti. Wandt ick ben de HEEre uwe Godt.$

* Deut. 7.a.5.

8

Maer si waren my onghehoorsaem, ende en wouden my niet volghen, ende haerder gheen en worp de grouwelen wech voor sinen ooghen, ende si en verlieten de Afgoden Egipti niet.^+† Doen dacht ick mijn verbolgentheyt ouer haer wt te ghieten, ende mijnen gantschen toorne ouer haer te laten gaen, noch in Egipten landt.

+ B vers 8

† Ezech. 20.c.22

9

Maer ick lietet om mijns Naems wille, op dat hy niet ontheylicht en soude worden, voor de Heydenen, onder den welcken si waren, ende voor den welcken ick my haer hadde te kennen ghegeuen, Dat icse wt Egipten lant leyden woude.$

10

Ende doen icse wt Egipten lant gheleyt hadde, ende inde woestijne gebracht,

11

^† Gaf ick haer mijne gheboden, ende leerde hen mijne rechten^* Waer door dat de mensche leuet diese onderhout.

† Exodi. 20. 21. 22. 23. Deut. 4. 5.

* Gala. 3.b.12

12

Ick gaf haer oock^‡ mijnen Sabbath, tot een teeken tusschen my ende haer, op dat si leeren souden, dat ick de HEERE sy, die haer heylicht.

‡ Exo. 16.c.23. 20.b.8. 31.c.14

13

^† Maer dat huys Israels was my onghehoorsaem, ooc inder woestijne, ende si en leefden niet nae mijne gheboden, ende verachteden mijne rechten,^* door welcke de mensche leuet diese houdt, ende si ontheylichden mijnen Sabbath gheheel seer.^† Doen dacht ick mijn gramschap ouer haer wt te ghieten inder woestijne, ende haer gantschelijc te verdoen.

† Exo. 32.c.9.

* Leuit. 18.a.5. Roma. 10.a.5 Galat. 3.b.12.

† Nu. 14.b.12.

14

^* Maer ick lietet om mijns Naems wille, op dat hy niet ontheylicht en worde voor de Heydenen, voor den welcken icse wtgheleyt hadde.

* Ezech. 20.c.20

15

^* Ende ick hief mijn hant oock op teghen haer inde woestijne, alsoo dat ickse niet en woude brenghen in dat Lant dat ick haer ghegheuen hadde, dat met melck ende honich vloeyt, een edel Landt voor alle Landen.

* Num. 14.c.22

16

Daeromme dat si mijne Rechten veracht, ende nae mijne gheboden niet gheleeft, ende mijne Sabbaten ontheylicht hadden.^* Want si wandelden den Afgoden haers herten nae,

* Exod. 32.a.1. Num. 25.a.2. Iudic. 2.b.12.

17

Maer mijn ooge spaerde haer, dat icse niet en verdorf, noch gheheelijck en vernielde inder woestijne.

18

⁺Ende ick sprack tot hare kinderen inder woestine: Ghy en sult na uwer vooruaderen gheboden niet leuen, ende hare Rechten niet houden, ende v aen hare Afgoden niet veronreynighen:

+ C vers 18

19

Want ick ben de HEERE uwe Godt.^* Nae mijne gheboden sult ghy leuen, Ende mijne Rechten sult ghy houden, ende daer na doen.

* Leuit. 18.a.4 Ezech. 18.a.9.

20

Ende mijne Sabbathen sult ghy heylighen, op dat si zijn een teeken tusschen my ende v, op dat ghy weten moghet, dat ick de HEERE uwe God sy.

21

^† Maer de kinderen waren my ooc onghehoorsaem. Sy en leefden na mijne gheboden niet, si en hielden oock mijne Rechten niet, dat si daer na hadden ghedaen^† door welcke de mensche leuet, die de selue onderhout, Ende si ontheylichden mijne Sabbathen.

† Num. 25.a.2.

† Leuit. 18.a.5. Roma. 10.a.5 Galat. 3.b.12.

22

^* Doen dacht ic mijn gramschap ouer haer wt te storten, ende mijnen gheheelen thoorne ouer haer te laten gaen inder

* Ezec. 20.b.8.

[p. 57r]

woestijnen. Maer ick keerde mijn hant, ende lietet om mijns Naems wille, op dat hy niet ontheylicht en soude worden voor de Heydenen, voor den welcken icse wtgheleyt hadde.

23

Ick hief oock mijn hant op inder woestijnen teghen haer, dat ickse verstroyde onder de Heydenen, ende veriaechde in de Landen,

24

Daerom dat si mijne gheboden niet gehouden, ende mijne Rechten veracht, ende mijne Sabbathen ontheylicht hadden, ende na de Afgoden haerder vooruaderen sagen.

25

Daeromme ouergaf ickse in de leeringhe, die niet goet en is, ende in de Rechten, daer si gheen leuen in ghehebben en conden,

26

Ende verworpse met haren offer,^† doen si alle eerste gheboorten door tvier verbranden, op dat icse verstoorde, ende si leeren moesten, dat ick de HEEre sy.

† Leuit. 18.c.21. Deut. 12.d.31. 18.b.9. 4.Re. 16.a.3. 17.c.17. Iere. 32.d.35.

27

Daeromme spreeckt, du mensche kint, met den huyse Israels, ende segt tot haer:⁺ Alsoo seyt de HEERE HEERE: Vwe vaders hebben my noch meer ghelastert ende ghetercht. Want doen ickse in dat Lant ghebracht hadde, ouer welcken ick mijn hant opgheheuen hadde, dat ict haer gheuen soude.

+ D vers 27

28

Waer si slechs eenen hooghen berch oft dicken boom saghen, aldaer offerden si hare offeren, ende brachten derwaerts hare onaengename gauen, Ende roocten aldaer haren soeten ruecke, ende goten aldaer wt hare Drancofferen.

29

Maer ick sprack tot haer: Wat sal doch de Hoochte, daer ghy henen gaet? Ende also heetse noch heden op desen dach, de Hoochte.

30

Daerom segt totten huyse Israels: Alsoo seyt de HEERE HEERE: Ghy veronreynicht v in dat wesen uwer vaderen,

31

Ende bedrijft hoererije met hare grouwelen, ende veronreynicht v aen uwe Afgoden, den welcken ghy uwe gauen offert,^† ende uwe sonen ende dochteren door tvier verbernt, tot op desen teghenwoordighen dach toe. Ende ic soude my v vanden huyse Israels laten vraghen? Soo warachtelijck als ick leue, spreect de HEERE HEERE: Ic wil van v ongheuraecht zijn.

† Ierem. 19.a.5 Deut. 12.d.31. 18.b.9. Ezech. 16.c.20 d.36. 4.Re. 17.c.17 21.a.6. 2.Par. 28.a.3.

32

Daer en bouen, tghene dat ghy denckt: Wy willen doen, ghelijck de Heydenen, ende ghelijc andere lieden, inde Landen, hout ende steen aenbeden, dat sal v missen:

33

⁺So warachtelijck als ick leue, seyt de HEERE HEERE: Ick wil ouer v heerschappen met stercker hant, ende wtghestreckten arm, ende met wtghestorte gramschappe.

+ E vers 33

34

Ende wil v vanden volcken leyden, ende wt de Landen, derwaerts ghy verstroyt zijt, vergaderen, met stercker hant ende wtghestrecten arme, ende met wtghestorte gramschappe.

35

Ende ick wil v brenghen in de woestijne der volcken, ende aldaer met v rechten, van aenghesicht tot aenghesicht.

36

Ghelijck ick met uwen vaderen inder woestijnen by Egypten gherecht hebbe, Effen alsoo wil ick oock met v rechten, seyt de HEERE HEERE:

37

Ic wil v wel onder de roede brenghen, ende v inde banden des verbonts dwinghen.

38

Ende wil de afuallighe, ende die teghen my ouertraden, onder v wt vaghen, Iae wt den lande daer ghy nv woont, wil icse leyden, ende int Lant Israels niet laten comen, dat ghy leeren sult, dat ick de HEERE ben.

39

Daerom ghy vanden huyse Israels, so spreect de HEERE HEERE: Want ghy my dan ymmers niet en wilt hooren, so vaert henen, ende een yeghelijc diene sinen Afgodt. Maer laet mijnen Naem voort aen onghescheynt, met uwen offeren ende Afgoden.

40

Want alsoo seyt de HEERE HEERE: Op mijnen heylighen berch, opten hoogen berch Israels,^† aldaer sal my dat geheele huys Israels, ende alle die inden Lande zijn, dienen. Aldaer sullen si my aenghenaem zijn, Ende aldaer wil ick uwen Hefoffer ende eerstelinghen uwer offeren eysschen, met alle dat ghene dat ghy my heylicht.

† Deut. 12.a.5. 14.b.23.

41

Ghy sult my aenghenaem zijn metten soeten ruecke, Als ick v van den volcken brenghen, ende wt de Landen vergaderen sal, derwaerts ghy verstroyt zijt, Ende ick sal in v gheheylicht worden voor de Heydenen.

42

Ende ghy sult beuinden, dat ick de HEERE ben, als ick v int Landt Israels ghebracht hebbe, in dat Lant, waer ouer ick mijn hant op hief, dat ick dat uwen vaderen geuen soude.$

43

^† Aldaer sult ghy gedencken aen uwe wesen, ende aen alle uwen doen, daer ghi in veronreynicht zijt, ende ghy sult een mishaghen hebben aen alle uwe boosheyt, die ghy ghedaen hebt.

† Ierem. 8.a.3. 18.a.8. 31.c.18.

44

Ende ghy sult beuinden, dat ick de HEERE sy, Als ic met v doe, om mijns Naems wille, ende niet nae uwe boose wesen, ende schadelijc doen. Du huys Israels, spreect de HEERE HEERE.$