Den Bibel, Inhoudende dat Oude ende Nieuwe Testament (Biestkensbijbel)

¶ Dat .xix. Capittel.

¶ Hy beschrijft dat iammerlijck ongheual, dat ouer den Coninck Iuda soude gaen, Ende daer mede verhaelt hi dat stoute gewelt, ende vermetenheyt der Coninghen ende Vorsten.

1

⁺MAer maect ghy een clage ouer den Vorsten Israels, ende segt:

+ A vers 1

2

Waerom leyt dijne moeder de Leeuwinne, onder de Leeuwinnen, ende trect hare ionghen op onder de ionghe Leeuwen?

3

Der seluen eenen tooch si op, ende daer wert eenen ionghen Leeuwe af, Die gewende hem de lieden te verschueren, ende te verslinden.

4

Doen dat de Heydenen van hem hoorden,^* vinghen sy hem in hare cuylen, ende voerden hem in ketenen in Egipten lant.

* 4.Re. 23.f.34

5

Doen nv de moeder sach, dat haren hope verloren was, doen si langhe ghehoopt hadde, nam si eenen anderen van haren iongen, ende maecte daer eenen ionghen Leeuwe af.

6

Doen die onder de Leeuwinnen wandelde, werdt hy eenen iongen Leeuwe, die gewende hem ooc de lieden te verschueren ende te eten.

7

Hy leerde hare weduwen kennen, ende verwoestede hare steden dattet lant ende so wat daer in was, vande stemme zijns brullens hem ontsettede.

8

Doen leyden haer de Heydenen

[p. 56v]

wt alle landen rontsom hem,^* ende worpen een net ouer hem, ende vinghen hem in hare cuylen,

* 4.Re. 25.a.5. Iere. 39.b.7. 52.b.8.

9

Ende stieten hem ghebonden in een gyoole, ende voerden hem totten Coninck te Babel. Ende men liet hem bewaren, Also dat sine stemme niet meer ghehoort en werde, op de berghen Israels.

10

⁺Dijne moeder was ghelijc een wijnstock, ghelijck als ghy, aent water gheplant, Ende hare vruchten ende rancken wiessen vanden grooten water,

+ B vers 10

11

Dat sine rancken soo sterck werden, dat si tot Heeren scepters goet waren, ende werdt hooch onder den rancken.

12

Ende doen men sach, dat hy soo hooch was, ende veel rancken hadde, werdt hy in toornicheydt ter Aerden geruct, ende verworpen. Den Oosten wint verdorrede sine vrucht, ende sine stercke rancken werden in stucken gebroken, dat si verdorreden ende verbrandt werden.

13

Maer nv is si geplant inder woestijnen, in eenen dorren, dorstighen Lande.

14

Ende daer is een vier wtgegaen van hare stercke rancken, dat verslindet hare vrucht, alsoo dat in haer gheen stercke rancke meer en is tot eens Heeren scepter. Dat is een claghelijck ende iammerlijck dinck.