Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvij. Capittel.

¶ De ontrouwe des Conincx Sedekie die wordt hier met verborghen woorden ghestraft, om dat hi heymelijck metten Egipschen Coninc ouercomen was, ende hulp van hem begheerde, Hy propheteert van dat nieuwe Volck, dat door Christum gheplant is.

1

⁺ENde des HEEren woort geschiede tot my, ende sprack:

+ A vers 1

2

^† Du menschen kint, Legt den huyse Israels een raetsel voor, ende een ghelijckenisse, ende segt:

† Ezech. 24.a.3

3

Alsoo seyt de HEERE HEERE: Een groot^† Arent met groote vlueghelen, ende langhe wiecken, ende vol vederen, die bont waren, quam op Libanon, ende nam de tacken vanden

† Danie. 7.a.4 4.Esd. 11.a.1 Ezech. 1.b.10. 10.b.14.

[p. 55v]

Cederboomen, ende brack den bouensten tack af,

4

Ende voerde dien in het Kreemerlant, ende setteden in de Stadt, daermen de comenschap hanteert.

5

Hy nam ooc saet wt den seluen Lande, ende saeydet in dat selue goede Lant, daer veel waters is, ende settedet los in.

6

Ende het wiesch ende wert eenen grooten wtghebreyden wijnstock, nochtans hadt eenen leeghen stamme. Want sine rancken bogen haer tot hem, ende sine wortelen waren onder hem. Ende was als eenen wijnstock, die rancken creech ende tacken.

7

Ende daer was eenen anderen grooten Arent met groote vlueghelen, ende veel vederen. Ende siet, de wijnstoc hadde een verlanghen aen sine wortelen, tot desen Arent, ende strecte sine rancken wt tot hemwaerts, op dat hi gewatert werde van de plaetse zijnder planten.

8

Ende was nochtans op een goet landt, aen veel waters gheplant, dat hy wel hadde moghen spruyten brengen, vruchten dragen, ende eenen heerlijcken wijnstock worden.

9

⁺Daeromme segt nv: Also seyt de HEEre HEEre: Soude die voorspoet hebben? Ia men sal sine wortelen wtroeyen, ende sine vruchten af breken, ende sal verdorren, dat alle de bladeren van zijn ghewas, verdorren sullen. Ende ten sal niet gheschieden door eenen grooten arme, noch veel volcx, op datmen hem van zijne wortelen wech voere. Siet, hy is wel gheplant, maer soude hy gheluck hebben?

+ B vers 9

10

Ia, so haest als hem den Oosten wint aenroeren sal, so sal hy verdorren op sine voren.

11

Ende des HEEren woort gheschiede tot my, ende sprack:

12

Lieue, segt totten ongehoorsamen huyse: En weet ghy niet wat dat is? Ende segt: Siet,^* De Babiloonsche Coninck quam tot Ierusalem, ende nam haren Coninck ende hare Vorsten, ende voerdese wech tot hem na Babel.

* 4.Re. 24.a.2 b.10.

13

Ende nam vanden Coninclijcken sade, ende maecte een verbont met hem, ende nam eenen Eedt van hem.

14

Maer de gheweldighe int Lant nam hy wech, op dat dat Conincrijck ootmoedich bleue, ende hem niet en verhieue, op dat zijn verbont ghehouden werde, ende vast bleue.

15

Maer dat selue [saet] viel van hem af, ende sandt sine Legaten in Egipten, datmen hem Peerden ende veel volcx seynden soude. Salt dien wel gelucken? Sal hy daer af comen, die sulcx doet? Ende soude die, die dat verbont breect, ontcomen?

16

Soo warachtelijck als ick leue, seyt de HEEre HEEre: In de plaetse des Conincx,⁺ die hem tot eenen Coninck gheset heeft, wiens Eedt hy veracht, ende welcx verbont hy gebroken heeft, aldaer sal hy steruen, te weten, tot Babel.

+ C vers 16

17

Ooc en sal hem Pharao niet by staen inden strijde, met een groot heyr ende veel volcx, Alsmen de Wallen optrecken sal, ende dat Bolwerck oprecht, om veel lieden ter doot te brenghen.

18

Wandt aenghesien dat hy den Eedt veracht, ende tverbont ghebroken heeft, daer hy zijn handt op gheheuen heeft, ende sulcx alle doet, daerom en sal hy niet ontcomen.

19

Daerom spreect de HEEre HEEre alsoo: Soo warachtelijck als ick leue, soo wil ic mijnen Eedt, dien hi veracht heeft, ende mijn verbont dat hy gebroken heeft, op sinen cop brenghen.

20

^† Want ick wil mijn Net ouer hem werpen, ende hy moet in mijnder Iacht gheuanghen worden. Ende ick wil hem nae Babel brenghen, ende wil aldaer met hem rechten, om des wille, dat hy hem alsoo aen my ontgaen heeft.

† Ezech. 12.b.13 32.a.4.

21

Ende alle sine veltvluchtige, die hem aenhinghen, sullen doort sweert vallen,⁺ Ende haer ouerghebleuen sullen in alle winden verstroyt worden. Ende salt beuinden, dat ict de HEEre ghesproken hebbe.

+ D vers 21

22

Alsoo spreeckt de HEERE HEERE:^† Ick wil oock vanden tack des hooghen Cederbooms nemen, ende bouen van sine tacken breken, ende wilt op eenen hooghen opghehoopten berch planten,

† Psalm. 29.a.5

23

Te weten, opten hooghen berch Israels, wil ick hem planten, dat het tacken crijghe, ende vruchten brenghe, ende eenen heerlijcken Cederboom worde: Also, dat alderley voghelen onder hem woonen, ende alderley vlieghende, onder de schaduwe zijnder tacken blijuen moghen.

24

Ende alle veltboomen sullen beuinden, dat ick de HEERE, den hooghen boom vernedert, ende den vernederden boom verheuen hebbe. Ende den groenen boom verdorret, ende den dorren boom, groen ghemaect hebbe. Ick de HEERE spreeckt, ende doet oock.