Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ Dat volck wort vermaent, dat si de valsche Propheten niet hooren en souden, Ende den lueghenachtigen Propheten wort haer straffinge bewesen.

1

⁺ENde des HEEren woort geschiede tot my ende sprack:

+ A vers 1

2

Du menschen kint, Propheteert teghen de Propheten Israels, ende spreeckt totten ghenen die wt haer eygen herte propheteren: Hoort des HEEren woort,

3

Alsoo spreeckt de HEEre HEEre:^* Wee den dullen Propheten, die haren eygenen gheest volgen, ende en hebben nochtans gheen ghesichte.

* Ezec. 14.b.9. 34.a.2. Ierem. 23.a.1. Mich. 3.b.5.

4

O Israel uwe Propheten zijn ghelijc als de Vosschen inder woestijnen.

5

Sy en treden niet voor de holen, ende en maken haer niet tot eender haghe, om dat huys Israels, ende si en staen niet inden strijt, inden daghe des HEEren.

6

Haer gesichte is niets niet, ende haer propheteren,^† is enckel lueghen. Sy seggen: De HEEre heuet gheseyt, soo doch de

† Iere. 27.b.10.

[p. 53v]

HEERE haer niet ghesonden en heeft, ende si maken haer moede, op dat si haer dinghen moghen onderhouden.

7

⁺En ist niet also, dat uwe ghesichte niet en is, ende uwe propheteren, enckel lueghen? Ende ghy segt nochtans: De HEERE heuet gheseyt. Hoe wel dat ict niet ghesproken en hebbe?

+ B vers 7

8

Daerom spreect de HEEre HEEre also: Aengesien ghy predict, daer gantsch niet af en coemt, ende propheteert luegenen, Daerom wil ic aen v, seyt de HEERE HEERE,

9

Ende mijne hant sal comen ouer de Propheten, die daer prediken, daer niet wt en coemt, ende luegenen propheteren. Sy en sullen inde vergaderinghe mijns volcx niet zijn,^† ende in dat ghetal des huys Israels en sullen si niet geschreuen worden, noch int Lant Israels comen, Ende ghy sult vernemen dat ick de HEEre HEEre ben.

† Esaie. 4.a.3.

10

^* Daerom dat si mijn volc verleyden, ende seggen:^† Vrede, Alsser noch geenen vrede en is. Dat Volck bouwet de Wandt,^‡ soo plaesteren si de selue met quaden calck.

* Esaie. 3.c.11.

† Iere. 6.b.14 8.b.8.

‡ Ezec. 22.d.28

11

Segt totten plaesteraers, die met quaden calck placken: Dattet af vallen sal.^* Wandt daer sal eenen slachreghen comen, ende daer sullen groote haghelsteenen comen, diet vellen, ende eenen draeywint salt verschueren.

* Mat. 7.c.25.

12

Siet, alsoo sal de Wandt in vallen. Wat gheldet, Dan salmen tot v seggen: Waer is nv dat geplaesterde, dat ghy gheplaestert hebt?

13

Alsoo seyt de HEERE HEERE: Ick wil eenen draeywint laten stormen in mijnder verbolghentheyt, ende eenen plasreghen in mijnen toorne, ende groote hagelsteenen inder gramschappe, die sullen alle dinc om stooten.

14

⁺Also wil ic de wandt om werpen, de welcke ghy met valschen calck geplaestert hebt, ende ic wilse ter Aerden stooten, datmen haer fundament sien sal, dat si daer ligghe, ende ghy sult daer binnen oock vergaen, ende beuinden, dat ick de HEEre sy.

+ C vers 14

15

Alsoo wil ic mijn verbolgentheyt voleynden aenden wandt, ende aenden genen diese met quaden calck plaesteren, ende tot v seggen: Hier en is noch Wandt noch plaesteraer.

16

Dat zijn de Propheten Israels, die Ierusalem propheteren,^* ende prediken, van vrede, alsser noch geenen vrede en is, spreect de HEEre HEEre.

* Iere. 6.b.14. 8.b.8.

17

Ende du menschen kint, Stelt v aensicht teghen de dochteren in dijnen volcke, die daer propheteren wt haer eyghen herte, ende propheteert teghen haer, ende segt:

18

Alsoo spreect de HEEre HEEre: Wee v, ghy die den lieden Cussenen maect onder de armen, ende Pueluwen tot de hoofden, beyde den Ionghen ende den Ouden, om de sielen te vanghen.

19

⁺Als ghy nv de sielen gheuanghen hebt, in mijnen volcke,^† soo segt ghy den seluen dat leuen toe, ende ontheylicht mi in mijnen volcke, om een hant vol gersten, ende eenen bete broots, daer mede dat ghy de sielen ter doot veroordeelt, die doch niet steruen en souden: Ende oordeelt die totten leuen die doch niet leuen en souden, door uwe luegenen onder mijnen volcke, dwelcke geerne lueghenen hoort.

+ D vers 19

† Esaie. 5.c.23. Miche. 3.b.5.

20

Daerom spreect de HEEre HEEre: Siet, Ick wil aen uwe Cussenen, daer mede ghy de sielen vanget, ende vertroost, ende ic wilse van uwen armen wech rucken, ende de sielen die ghy vanget, ende vertroost, los maken.

21

Ende ic wil uwe Pueluwen in stucken schueren, ende mijn volck wt uwer hant verlossen, dat ghijse niet meer vangen en sult, ende ghy sult beuinden dat ick de HEEre sy.

22

Daerom dat ghy dat herte der rechtuaerdigen valschelijck bedroeft, die ic niet bedroeft en hebbe,^† Ende hebt gesterct de handen der godloosen, also dat si haer van hare boose wesen niet en bekeeren, op dat si mochten leuende blijuen.

† Iere. 23.b.14.

23

Daerom en sult ghy niet meer onnutte leeringen prediken, noch propheteren, Maer ick wil mijn volck wt uwen handen verlossen, ende ghy sult beuinden, dat ick de HEEre ben.