Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Hy straft de ghene, die soo onbeschaemdelijcken ende vermetelijcken teghen Godt sondigen, ende dies niet te min Godt den HEERE bidden doruen. Die alsulcke zijn, die laet God door de valsche Propheten verleydt worden, ende hy en verhoortse niet al baden oock de gherechtige voor haer.

1

⁺ENde daer^† quamen sommige vanden Outsten Israels tot my, ende stelden haer by my.

+ A vers 1

† Ezech. 20.a.1.

2

Doen gheschiede des HEEREN woort tot my, ende sprack:

3

Menschen kint, Dese lieden hangen met haer herte aen hare Afgoden, ende houden vaste aender argernisse haerder misdaet. Soude ic haer dan antwoorden, als si my vraghen?

4

Daerom spreect met hen, ende segt tot hen: Also seyt de HEERE HEERE: Soo wat mensche vanden huyse Israels met der herten aen sinen Afgod hanghet, ende hout vaste aender argernisse zijnder misdaet, ende coemt totten Propheet, So wil ick de HEEre, den seluen antwoorden, gelijc hy verdient heeft met zijnder grooter Afgoderie,

5

Op dat dat huys Israels bedroghen worde in haerder herten, daerom dat si van my geweken zijn, door menigherley Afgoderie.

6

Daerom sult ghy totten huyse Israels segghen: Also seyt de HEEre HEEre: Keert ende weynt v van uwer Afgoderie, ende keert uwe aensichte van alle uwe grouwelen.

7

Want so welcke mensche vanden huyse Israels, oft een vreemdelinck, die in Israel woont, van my wijcket, ende met zijnder herten aen sinen Afgodt hangt, ende vast hout aender argernisse zijnder Afgoderie, ende totten Propheet coemt, op dat hy my door hem vraghe, dien wil ick de HEEre selfs antwoorden,

8

⁺Ende wil mijn aensicht teghen den seluen setten, dat si sullen woest, ende tot een Teecken ende spreecwoort worden, ende wilse wt mijnen volcke roeyen, dat ghy beuinden sult, dat ick de HEERE sy.

+ B vers 8

[p. 54r]

9

Maer indien een bedrogen Propheet yet spreect,^* dien wil ick de HEEre wederom laten bedroghen worden, ende ick wil mijn hant ouer hem wtstrecken, ende hem wt mijnen volcke Israels roeyen.

* Ezech. 13.a.3. 34.a.3. Ierem. 23.a.1.

10

Also sullen si alle beyde hare misdaet draghen: Ghelijc als de misdaet des vraghers, alsoo sal oock zijn de misdaet des Propheten,

11

Op dat si dat huys Israels niet meer en verleyden van my, ende haer niet meer en veronreynighen, in alderley haerder ouertredingen.^* Maer sy sullen mijn volck zijn, ende ick wil haer God zijn, seyt de HEERE HEERE.

* Ezech. 11.d.20 Iere. 24.b.7. 31.f.33. Hebre. 8.c.10.

12

Ende des HEEREN woordt gheschiede tot my, ende sprack.

13

Du menscen kint, Als dat Lant aen my sondicht, ende my daer toe versmaet, Soo wil ick mijn hant ouer dat selue wtstrecken,^* ende den voorraet des broots wech nemen, ende wil daer dieren tijt in seynden, also dat ick beyde menschen ende beesten daer in wtroeye.

* Ezech. 4.b.16 5.d.16. 4.Reg. 25.a.3 Esaie. 3.a.1.

14

^+† Ende oft dan al schoon de drie mannen, Noah, Daniel, ende Hiob, daer inne waren,^† soo sullen si alleen haer eyghen siele verlossen, door hare gherechticheyt, spreect de HEERE HEERE.

+ C vers 14

† Ierem. 15.a.1.

† Galat. 6.a.7.

15

Ende indien ick boose dieren int lant brachte, die de lieden veriaechden, ende dat selfde verwoesten, datter niemant in ghewandelen en conde, vanden dieren,

16

Ende dese drie Mannen waren oock daer in, Soo warachtelijck als ick leue, seydt de HEERE HEERE, Sy en souden noch Sonen noch Dochteren verlossen, Maer alleen haers selfs, Ende dat Lant moest woest worden.

17

Oft indien ick dat Sweert liet comen ouer dat lant, ende sprake. Sweert, vaert henen doort Lant, ende dat ick alsoo beyde, menschen ende beesten wtroeyde,

18

Ende die drie mannen daer in waren, So warachtelijck als ick leue, seyt de HEERE HEERE, si en souden noch sonen noch dochteren verlossen, mer si alleen souden verlost zijn.

19

Oft indien ick Pestilentie int Landt sonde, ende mijn gramschap ouer dat selue wtstortede, ende bloet vergoot, alsoo dat ick beyde menschen ende beesten wtroeyde,

20

⁺Ende Noah, Daniel, ende Hiob waren daer in, So warachtelijck als ick leue, seyt de HEERE HEERE, sy en souden noch sonen noch dochteren,^† maer alleen haer eyghen sielen, door hare gherechticheyt verlossen.

+ D vers 20

† Ezech. 18.c.20

21

Wandt alsoo spreeckt de HEERE HEERE:^* Indien ick mijn vier boose straffinghen, als sweert, hongher, boose dieren, ende Pestilencie ouer Ierusalem sonde, op dat ick daer in wtroeyde, beyde menschen ende beesten,

* Iere. 27.b.13.

22

Siet, so sullen sommighe daer in ouerghebleuen daer af comen, die sonen ende dochteren daer wt brenghen sullen, ende tot v herwaerts comen, dat ghy sien sult, hoe dattet haer gaet, ende sult v troosten van dat ongheluck, dat ick ouer Ierusalem heb laten comen met alle dander, dat ick ouer haer heb laten comen.

23

Sy sullen uwen troost zijn, als ghy sien sult, hoe dattet haer gaet. Ende ghy sult beuinden, dat ict niet sonder oorsake ghedaen en hebbe, soo wat ick daer in ghedaen hebbe, spreeckt de HEERE HEERE.