Den Bibel, Inhoudende dat Oude ende Nieuwe Testament (Biestkensbijbel)

¶ Dat .xij. Capittel.

¶ Godt vertoont den Propheet de wellust des Conincx ende der zijnen.

1

⁺ENde des HEEREN woort gheschiede tot my, ende sprac:

+ A vers 1

2

Du menschen kint, ghy woont onder een ongehoorsaem huys,^† Het welcke wel oogen heeft, dat sy sien connen, ende en willen

† Esai. 6.b.9.

[p. 53r]

niet sien, ooren, dat si hooren connen, ende en willen niet hooren,^* Maer het is een ongehoorsaem huys.

* Ezech. 2.a.5. 3.d.17.

3

Daerom du menschen kint, Schickt v daer nae, dat ghy wandelt, ende treckt inden lichten dach daer af voor haren ooghen. Van uwer plaetse sult ghy wech trecken op een ander plaetse, voor haren ooghen, oft zijt misschien mercken wouden, dat si een onghehoorsaem huys zijn.

4

Ende ghy sult uwe ghereetschap daer wt brenghen, recht oft ghy^† wandelen wout, by lichten daghe voor haren ooghen, Ende ghy sult wech trecken des auonts voor haren ooghen, ghelijck alsmen wech trect, wanneermen wandelen wil.

† Verhuysen.

5

Ende ghy sult door de Wandt breken, voor haren ooghen, ende aldaer door wt trecken,

6

Ende ghy sultet op uwe schouderen nemen, voor haren ooghen, ende alst doncker geworden is, wt draghen. Ghy sult v aensicht bedecken, op dat ghy dat Lant niet en siet, Wandt ick hebbe v den huyse Israels tot eenen wonderTeecken gheset.

7

⁺Ende ick dede als my beuolen was, ende droech mijne ghereetschap wt, recht als^† wandelgereetschap, by lichten dage. Ende aenden Auont brack ic met der hant door de wandt, ende doent doncker gheworden was nam ickt op de schouderen, ende droecht wt voor haren ooghen.

+ B vers 7

† Huysraet.

8

Ende des morghens vroech geschiede des HEEren woort tot my, ende sprac:

9

Du menschen kint, en heeft dat huys Israels, dat onghehoorsaem huys, niet tot v gheseyt? Wat maeckt ghy?

10

Soo segt tot haer: Alsoo spreect de HEERE HEERE: Desen last gaet den Vorsten tot Ierusalem aen, ende dat gantsche huys Israels, dat daer in is.

11

Spreect: Ick ben uwe wonderteeken. Ghelijck als ick ghedaen hebbe, also sal v gheschieden, dat ghy sult moeten wandelen ende gheuanghen gheuoert worden.

12

Hare^† Vorst sal op de schouder draghen int doncker, Ende moet wech trecken door de wandt, die si breken sullen, op dat si daer door wt trecken. Sijn aensicht sal bedect worden, op dat hy met gheenen ooghe dat lant en sie.

† Ierem. 21.b.7 24.b.8. 32.a.4. 34.a.1.

13

Ic^* wil ooc mijn nette ouer hem werpen, op dat hy in mijnder Iacht gheuanghen worde, Ende ick wil hem nae Babel brenghen inder Chaldeen lant, dat hi doch niet sien en sal, ende hy sal aldaer steruen.

* Ezec. 17.c.20. 32.a.4.

14

⁺Ende alle die rontom hem zijn, zijne hulpers, ende alle sinen aenhanck, wil ick in alle winden verstroyen, ende dat sweert achter hen wt trecken.

+ C vers 14

15

Alsoo^* sullen si beuinden, dat ic de HEEre ben, als icse onder de Heydenen verstoote, ende inden lande verstroye.

* Ezech. 15.b.7. 22.b.15.

16

Maer ick wil haerder sommige ende weynich laten ouerblijuen voor dat sweert, honger, ende Pestilentie, die sullen gheender grouwelen vertellen onder de Heydenen, derwaerts si comen sullen, ende sullen vernemen, dat ick de HEEre sy.

17

Ende des HEEren woort geschiede tot my, ende sprack:

18

Du menscen kint, Ghy sult dijn broot eten, met beuen, ende dijn water drincken met^† sitteren ende sorghen.

† Rijelen, schudden.

19

Ende segt totten volcke inden Lande: Alsoo seyt de HEEre HEEre vanden Inwoonders tot Ierusalem, inden lande Israels: Sy sullen haer broot eten in sorghen, ende haer water drincken in ellenden.^† Wandt dat landt sal woest worden van al dat daer in is, om der boosheyt wille aller Inwoonders.

† Leuit. 26.e.32 Esai. 1.a.7.

20

Ende de steden, die wel bewoont zijn, sullen verwoest, ende dat Lant eensaem worden, Alsoo sult ghy beuinden, dat ick de HEEre sy.

21

⁺Ende des HEEren woort geschiede tot my, ende sprac:

+ D vers 21

22

Du menschen kint, Wat hebt ghy voor een spreeckwoort inden Lande Israels? Ende segt:^† Aengesien dattet soo langhe vertrect, soo en salder voortaen niet af comen van der propheteringe.

† Roma. 2.a.4 2.Pet. 3.b.9.

23

Daerom segt tot haer: Also seyt de HEEre HEEre: Ick wil dat spreecwoort neder legghen, datment niet meer ghebruycken en sal in Israel. Ende segt tot haer: De tijt is na by, ende alle tgene datter ghepropheteert is.

24

Wandt ghy sult nv voortaen beuinden, dat gheen ghesichte faelgeren, ende gheen prophecie lieghen en sal teghen dat huys Israels.

25

Want ic ben de HEERE, soo wat ick spreke dat sal gheschieden, ende niet langher vertogen worden. Maer in uwer tijt ghy onghehoorsaem huys, wil ick doen, soo wat ick spreke, seyt de HEERE HEERE.

26

Ende des HEEREN woordt gheschiede tot my, ende sprack:

27

Du menschen kint, Siet, dat huys Israels seyt: Dat ghesichte dat dese siet, daer ist noch lange henen, ende propheteert op den tijt die noch verre is.

28

Daerom segt tot haer: Also seyt de HEEre HEEre: So wat dat ick spreke, dat en sal niet langer vertogen worden, Maer het sal geschieden, seyt de HEERE HEERE.