Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ De straffinghe des volcx wort den Propheet geopenbaert, Ende daermede ooc een troostelijcke belofte, die alleen in Christo veruult wert.

1

⁺ENde^† eenen wint nam my op, ende bracht my voor der poorten aenden huyse des HEEren, die ten Oostenwaert staet. Ende siet, onder de poorte waren vijfentwintich mannen, Ende ick sach onder haer Iesania den sone Assur, ende Platia den sone Benaia, de Vorsten inden volcke.

+ A vers 1

† Ezec. 8.a.3. 11.d.24. 43.a.5.

2

Ende hy sprack tot my: Du menschen kint, Dese Lieden hebben onsalighe ghedachten, ende schadelijcke Raetslaghen in deser stadt.

3

Want sy segghen: Ten is soo nae niet, Laet ons slechts huysen timmeren. Sy is den pot soo zijn wy dat vleesch.

4

Daerom suldy, du menschen kint, teghen haer propheteren.

5

Ende de geest des HEEREN viel op my, ende sprac tot my: Segt, Alsoo seyt de HEERE: Ghy hebt alsoo ghesproken, ghy vanden huyse Israels,^† ende ws gheests gedachten kenne ick wel.

† Iob. 42.a.2. 4.Es. 16.f.55. Heb. 4.b.12.

6

Ghy hebter veel verslaghen in deser stadt, ende hare straten ligghen vol dooden.

7

⁺Daerom spreect de HEERE HEEre also: Die ghy daer binnen gedoot hebt^* die zijn dat vleesch, ende^† sy is den pot, maer ghy moeter wt.

+ B vers 7

* Ezec. 24.a.3.

† De stadt.

8

Dat sweert dat ghy vreest, dat wil ick ouer v laten comen, spreect de HEEre HEEre.

9

Ick wil v van daer wt stooten, ende den vreemden inde hant gheuen, ende ic wil v uwe recht doen.

10

Ghy sult doort sweert vallen, inde Palen Israels wil ick v oordee-len, ende ghy sult beuinden dat ick de HEEre ben.

11

Maer de stadt en sal uwen pot niet zijn, noch ghy dat vleesch daer in, Maer inde Palen Israels wil ick v oordeelen.

12

Ende ghy sult vernemen, dat ick de HEEre ben. Want ghy en hebt na mijne gheboden niet gewandelt, ende mijne Rechten niet gehouden,^† Maer ghy hebt ghedaen na der Heydenen wijse die rontom v zijn.

† Leuit. 18.a.3. Deut. 12.d.30. Iere. 10.a.2.

13

Ende doen ick also propheteerde, sterf Platia, de sone Benaia. Doen viel ick op mijn aensicht ende riep met luyder stemmen, ende sprac:⁺ Ach HEEre HEEre, ghy sullet metten ouerghebleuen Israels gantsch wt maken.

+ C vers 13

14

Doen gheschiede des HEEren woordt tot my, ende sprack:

15

Du menschen kint, Vwe broeders ende naeste vrienden, ende dat gheheele huys Israels die noch tot Ierusalem woonen, spreken wel onder malcanderen: Ghene zijn vanden HEEHE verre wech ghevloden, Maer wy hebben dat lant in.

16

Daerom spreeckt ghy: Alsoo seyt de HEERE HEEre: Ia, ick hebse verre wech onder de Heydenen laten drijuen, ende inde landen verstroyt, Nochtans wil ic corts haer Heylant zijn, inden landen, derwaerts sy ghecomen zijn.

17

Daerom segt: Alsoo seyt de HEEre HEEre: Ick wil v vergaderen vanden volcken, ende wil v vergaderen wt de landen, derwaerts ghy verstroyt zijt, Ende wil v dat lant Israels gheuen.

18

Daer sullen sy henen comen, ende alle schouselen ende grouwelen daer wt wech nemen.

19

^† Ende wil v een eendrachtich herte gheuen, ende eenen nieuwen gheest in v geuen. Ende wil dat steenen herte wech nemen wt uwen Lijue, ende een vleesschen herte gheuen,

† Ierem. 31.f.33. Ezech. 18.e.31. 36.d.26.

20

⁺Op dat si in mijne seden wandelen, ende mijne Rechten houden, ende daer na doen.^* Ende sy sullen mijn volck zijn, so wil ick haer Godt zijn.

+ D vers 20

* Heb. 8.c.10. Iere. 24.b.7.

21

Maer den ghenen die na haerder herten schouselen, ende grouwelen wandelen, wil ic haer doen, op haren Cop werpen, spreect de HEEre HEEre.

22

Doen sloegen de Cherubim hare vloghelen, Ende de Raders ghinghen neffens haer, Ende de heerlijcheyt des Gods Israels was bouen ouer haer.

23

^* Ende de heerlijcheyt des HEEren verhief haer wt der stadt, ende stelde haer opten berch, die teghen het Oosten voor de stadt leyt.

* Ezech. 10.c.18. 43.a.4.

24

^* Ende eenen windt hief my op, ende bracht my in een ghesichte, ende inden gheest Gods in Chaldea tot de gheuanghenen. Ende dat Visioen dat ick ghesien hadde, verdwijnde voor my.

* Ezech. 3.a.3. 8.a.3. 11.a.1.

25

Ende ick seyde den gheuanghenen alle de woorden des HEEren, die hy my verthoont hadde.