Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ Den Propheet wordt een Visioen vertoont.

1

⁺ENde ick sach, Ende siet, Aen dat gehemelte, bouen thooft der Cherubim, wast gestelt als eenen Saphir, Ende bouen den seluen wast aen te sien, ghelijck als eenen throone.

+ A vers 1

2

Ende hy sprack totten man inde^* lijne cleederen: Gaet henen in tusschen de Raders, onder den Cherub, ende grijpt de handen vol gloeyender kolen die tusschen de Cherubim zijn, ende stroytse ouer de stadt. Ende hy ghinc in, dat ict sach.

* Ezech. 9.a.2.

3

Maer de Cherubim stonden ter rechter sijden aent huys, doen de selue man daer in ghinck, ende den voorhof werdt binnen vol neuels.

4

^* Ende de heerlijcheyt des HEEren verhief haer vanden Cherub tot den dorpel aent huys,^† Ende dat huys wert vol neuels, ende den voorhof vol claerheyts, van de heerlijcheyt des HEEren.

* 2.Par. 7.a.2.

† Exo. 40.c.35.

5

Ende men hoorde de vloghelen der Cherubim ruysschen, al buyten wt totten voorhof, ghelijck als een stemme des Almachtighen Gods, als hy spreect.

6

Ende als hy den man inde lijne cleederen beuolen hadde, ende geseyt: Neemt vyer tusschen de Raderen onder de Cherubim, doen ghinck de selue in, ende trat by dat Radt.

7

⁺Ende de Cherub strecte zijn hant wt, tusschen de Cherubim, totten vyere, dat tusschen de Cherubim was, nam daer af, ende gaft den man int lijnen cleedt, inde handen. Die ontfinghet, ende ghinc henen wt.

+ B vers 7

8

^* Ende het scheen aen de Cherubim, ghelijck als eens menschen handt, onder hare vloghelen.

* Ezech. 1.a.8.

9

Ende ick sach, ende siet, vier Raders stonden by de Cherubim, by eenen yegelijcken Cherub een Rat,^* Ende de Raders waren aen te sien ghelijck als eenen Turkoys,

* Ezech. 1.b.16.

10

Ende sy waren alle vier deen als dander, recht oft deen Radt ware int ander gheweest.

11

Wanneer sy gaen souden, soo costen sy in alle de vyer hoecken gaen, ende en dorsten haer niet om weynden, als sy ghinghen. Maer soo waer dat voorste henen ghinc, daer ghinghen sy na, ende en dorsten haer niet om weynden, met haren gheheelen lichaem, rugghen, handen, ende vloghelen.

12

Ende de Raders waren vol ooghen rontom, aen alle de vier Raders.

13

Ende hy riep tot den Raderen, Galgal, dat ict hoorde.

14

^* Een yeghelijck hadde vyer aensichten. Dat eerste aensicht, was een Cherub:^† Dat ander was een mensche: Dat

* Ezech. 1.a.6.

† Apoc. 4.b.7.

[p. 52v]

derde een Leeuwe: Dat vierde een^* Arent.

* Ezech. 27.a.3. Dan. 7.a.4.

15

Ende de Cherubim^† sweefden inder hoochte, Het is effen dat dier, dat ick sach aent water Chebar.

† Dreuen.

16

⁺Als de Cherubim ghinghen, soo ghinghen de Raders oock neffens haer. Ende als de Cherubim hare vloghelen sloeghen, also dat sy haer vander Aerden verhieuen, so en weynden haer de Raders ooc niet van haer.

+ C vers 16

17

Als ghene stonden, soo stonden dese oock, Verhieuen sy haer, soo verhieuen haer dese oock, Want daer was eenen leuendighen windt in haer.

18

^* Ende de heerlijcheyt des HEEren ghinck weder wt, vanden dorpel aent huys, ende stelde haer ouer de Cherubim.

* Ezech. 11.d.23. 43.a.4.

19

Doen sloegen de Cherubim haer vloghelen, ende verhieuen haer vander Aerden, voor mijnen ooghen. Ende doen sy wt ghinghen, ghinghen de Raders neffens haer, Ende sy traden inde poorte aenden huyse des HEEren, tegen het Oosten, Ende de heerlijcheyt des Gods Israels was ouer haer.

20

Dit is dat Dier, dat ick onder den Godt Israels sach aent water Chebar, Ende ick merckte, dattet Cherubim waren,

21

Doen een yeghelijck vier aensichten hadde, ende vier vloghelen,^* Ende onder de vloghelen ghelijck als menschen handen.

* Ezech. 1.a.8. 20.b.8.

22

Hare aensichten waren ghestelt gelijc ickse aent water Chebar sach, Ende ghingen stracx voor haer henen.