Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ God laet den Propheet de boosheyt sien, die dat volck inder stadt Ierusalem, ende inden huyse Gods bedreef.

1

⁺ENde het gheschiede inden sesten iare, opten vijfsten dach der sester maent, dat ick sat in mijn huys, ende de Ouden wt Iuda saten voor my. Aldaer viel de handt des HEEREN HEEREN op my.

+ A vers 1

2

Ende siet, ick sach: Dat van zijnen lendenen onderwaerts was, dat was ghelijck vyer, maer bouen ouer zijne lendenen, wast gantsh claer.

3

^† Ende reckte wt gelijck als een hant, ende^* greep my byden hayre mijns hoofts. Doen voerde my eenen windt tusschen Hemel ende Aerde, ende bracht my tot Ierusalem, in een godlijck ghesichte, tot de binnenste poorte, die teghen het Noorden staet, Daer een Beelt sat tot verdriet den Huysheere.

† Ezech. 3.a.3. 11.d.24.

* Hist. vanden Draeck. 15.

4

Ende siet, daer was de heerlijcheyt des Gods Israels,^* ghelijc ickse te voren gesien hadde inden velde.

* Ezech. 1.a.4.

5

Ende hy sprac tot my: Du menschen kint, Heft uwe oogen op teghen het Noorden. Ende doen ick mijne ooghen op hief teghen het Noorden, Siet, doen sat teghen het Noorden dat verdrietelijck Beeldt aen de poorte des Altaers, effen aldaermen ingaet.

6

Ende hy sprack tot my: Du menschen kint, Siet ghy wel wat dese doen? Te weten, groote grouwelen, die dat huys Israels hier doet, dat sy my ymmer verre van mijnen Heylichdom verdrijuen, Maer ghy sult noch meer ende grooter grouwelen sien.

7

Ende hy bracht my voor de duere des voorhofs, daer sach ick, ende siet, daer was een gat inde Wandt.

8

⁺Ende hy sprack tot my: Du menschen kint, Graeft door de Wandt. Ende doen ick door de Wandt groef, Siet, doen was daer een duere.

+ B vers 8

9

Ende hy sprack tot my: Gaet daer in, ende besiet de boose grouwelen die sy hier doen.

10

Ende doen ick daer in quam, ende sach, Siet, doen waren daer alderley beelden, der Wormen ende dieren, enckel schouselen, ende alderley Afgoden des huys Israels, ouer alle rontom, aen de Want ghemaect.

11

Voor de welcke stonden^* tseuentich Mannen, van den Outsten des huys Israels, Ende Iasania de sone Saphan, stont oock onder haer. Ende een yegelijck hadde zijn Ruecwerck inder hant, Ende daer ghinck eenen dicken neuel op van dat Ruecwerck.

* Exod. 18.d.25 Num. 11.d.25.

12

Ende hy sprac tot my: Du menscen kint, Siet ghy wel wat de Outste des huys Israels doen inder duysternisse, een yegelijck in zijn schoonste Camer? Wandt sy segghen:^† De HEEre en siet ons niet, Maer de HEERE heeft dat Lant verlaten.

† Iob. 22.b.13. Esaie. 29.c.15. 47.b.10. Iere. 13.d.24. Ezech. 9.c.9. Eccle. 23.d.25.

13

Ende hy sprac tot my: Ghy sult noch meer ende grooter grouwelen sien, die sy doen.

14

Ende hy bracht my henen in totter poorten, aen des HEEren huyse, die Noortwaerts staet: Ende siet, aldaer saten Wijuen, die weenden ouer den Thamus.

15

Ende hy sprack tot my: Du menschen kint, Siet ghy dat wel? Maer ghy sult noch grooter grouwelen sien, dan dese zijn.

16

Ende hy bracht my inden binnensten Hof aenden huyse des HEEren, ende siet, voor de duere aenden Tempel des HEEren, tusscen dat voorhuys ende den Altaer, daer waren ontrent vijfentwintich mannen, die haren rugghe teghen den Tempel des HEEren, ende haer aensicht teghen den Oosten ghekeert hadden, Ende

[p. 52r]

baden teghen der Sonnen opganck.

17

Ende hy sprack tot my: Du menschen kint, Siet ghy dat wel? Ist den huyse Iuda te weynich, dat sy alsulcke grouwelen hier doen? Wandt sy doch anders inden gantschen lande enckel ghewelt ende onrecht bedrijuen, Ende gaen toe, ende verwecken my ooc daer toe tot toornicheyt, Ende siet, Sy houden de wijnrancken aen de nuesen.

18

Daerom wil ick oock tegen haer met verbolghentheyt omgaen, Ende mijn ooghe en sal haer niet sparen, ende ick en wil niet ghenadich zijn,^* Ende al riepen sy met luyder stemmen voor mijnen ooren, so en wil ickse nochtans niet hooren.

* Prou. 1.c.28. Iere. 11.b.11. 14.b.12. Mich. 3.a.4. Esaie. 1.b.15. 4.Esd. 1.d.26